5 บี่ซุ้ดี๊ ทคู่ ลู่ง ทล่าง ซู๊งไฆ๊ พ้า กแช่แยว้ แม้ โอโท๊ไฆวะ โพล้งลชื้อแด อ ลู่ง ทเอิง อ ซยืง แม้ โอโท๊ ไฆวะ ทคู่ บี่จะเล้ นอ โพล้ง แม้ชองแม้จุ้ เท่อ อ ลู่ง ซ้ะอวีงแท๊ นอ, ลเซ๊ลคละ ล้า แบ บี่นอ ล้อ
กแช่แยว้ ย้างแย่ทาง ทเอิง, เก ท กางกดื้งทะ ดี๊ มี, เกม๊า ทพ้าง ลู่ง มแน้แค๊
ก ม แม้เตาแม้แต๊ ฌางคูโคล๊งคู ลู่ง ทอ้าทซ๊าง อกย้อง ดี๊ แม้เตาแม้แต๊ โพล้งอ้าโพล้งซ๊าง ลู่ง อ ซื๊งเว๊ อ ทเด้บ้ะ อกย้อง ก ม ดึ้ เกม๊า โพล้ง ลือ เท่อ อ ท ชีอูงพู๊ ล้าง ซ้ะ ทึไฆวะ ดี๊ ดึ้ เกม๊า โพล้งดู้งโพล้งลู่ อ ท ชีดูชีพู๊ อ ซ้ะ ล้างพือ
แบเด้าะ แน้ น แบ ท ไควะทางไฆวะ ช้างชื้ง ดี๊ น แซวคู พ้า เก บี่ซุ้ดี๊ เซงได้ แบ ท ญ๊องไฆวะ โพล้ง พี่ แบ ท แม้ซี๊ง นอ, ม เก บี่ซุ้ดี๊ ไช๊แค่ พี่ คลึไบ้ะ ล้าง แน้, เมะเว๊ โพล้ง พี่ แบ ทชิ้ ดี๊ น้ะ พี่ ลี้ล้าง ลู่ง ท โยะคิ้ พ้า อ ไล๊ เก ทจู พี่ แบ ท ไย่เละค๊างพะ
เมะเว๊ กแช่ยาเว ไคล้ ดี๊ แย้ บี่อี้ง ไจ้ะเว๊ “ก ม แคว่ กโช้ เท่อ โอ นี่ ลู่ง ก ล่าง เปิ่งโอเปิ่งช๊อง บี่ซุ้ดี๊ ทคู่ พี่ อ คู่เล้าคู่ล๊าง ลู่ง ทคู่ล้าง อ แกล้ บี่ซุ้ดี๊ ปช้างที๊ง อ ทไค้ะซวี๊ง, ลู่ง ท เก้านี่ ดิ้นี่ แค๊ อ ทคู่เล้า พ้า”
ทลู่ง คู อี้ง นอ, กแช่ยาเว ซึ้คู ดูทึชองทึ ม ลื่งอาง โพล้ง กุ้ชื้อกุ้ชะ เมะเว๊ ทลื่งอาง ดี๊ ท พี่ อบองอซู, ดี๊ ไซ้ะ ซไบ้ะแซ ที๊ง พี่ อ ล้างด้ะ เย้า ดี๊ ท อบองอซู พี่ อ ฆีง พ้า โอ ดี๊ อซูอไย้, ดี๊ ไซ้ะ ซไบ้ะแซ ที๊ง ล้างด้ะ พี่ คะจ้าง เย้า
อ ซื๊งเว๊ ลแพ นอ, ล ซู๊อางซ้ะ เท่อ-อ้า, ซู๊โอ้ซ้ะ เท่อ-อ้า แบ ทคู่ ต้องแช๊-อ้า, มื่ง-อ้า, ม ล แม้เฌ๊ฌ้อง-อ้ะ แบ เมะเว๊ กแช่แยว้ พี่ ย๊างซ้ะ แบ อ ซื๊งเว๊ นอ, ม ลี้ฌ้า อ ซื๊งเว๊ ดี๊ ม ลี้ฌ้า-อ้ะ ลู่ง ที๊ง ทางชุ้
ดี๊ น ม ลี้ฆ้าง บี่ซุ้ดี๊ ทแม้อ้า อ ซ้ะ, น ม กลึ้ไบ้ะ ค่าง นอ, บี่ซุ้ดี๊ ทเอิง, เมะเว๊ แน้ ดี๊ น โพล้ง ดึ้ซึ้ เท่อ พู, เลา ดี๊ โพล้ง อ ชื้อ แอฌี่งแอฌ้อง พี่ โอ ดี๊ แน้
