21 โอ ก้ะ ลู่ง ไค๊ ล นี้ง แย๊ นอ, กแช่ยาเว ม แม้เตาแม้แต๊ กเย่ เท่อ พี่ อ โอ ลู่ง มุ้คู ลแพ นอ ดี๊ แม้เตาแม้แต๊ กเย่ ที๊งค่าง อ กจุ้แฆว้ ลู่ง ฌางคูโคล๊งคู
กแช่แยว้ พี่ แม้ซี๊ง กดูกแซย่ อเว๊ เก ทล้าง ซ้ะเม, ลู่ง กจุ้แฆว้ ฌางคูโคล๊งคู ลแพ นอ อ ฌ่าง
ท่อง ทอดูทึโท๊ทึ กแช่ แม้ อ ทไพ้ะทแม้ เลาพะ, ลู่ง ทลู่ง ซีโยง ดี๊ ลู่ง เยรูซเลง ฌ้องทางเกทาง เย้า นอ, กแช่แยว้ ม แม้เตา แม้แต๊ ท อางปฆ้า, เฌ๊นี่ ลู่ง อะซีเรีย อ กจุ้แฆว้ อ เซิงพ้าซ้ะพ้า ทื่งดูล้าง ซ้ะ, ดี๊ ท ชีอูพู๊ ล้าง ซ้ะ ลู่ง อ เมะคลี้ง แคว่แช้แคว่เด เท่อ
ก ม แม้เตาแม้แต๊ ฌางคูโคล๊งคู ลู่ง ทอ้าทซ๊าง อกย้อง ดี๊ แม้เตาแม้แต๊ โพล้งอ้าโพล้งซ๊าง ลู่ง อ ซื๊งเว๊ อ ทเด้บ้ะ อกย้อง ก ม ดึ้ เกม๊า โพล้ง ลือ เท่อ อ ท ชีอูงพู๊ ล้าง ซ้ะ ทึไฆวะ ดี๊ ดึ้ เกม๊า โพล้งดู้งโพล้งลู่ อ ท ชีดูชีพู๊ อ ซ้ะ ล้างพือ
เมะเว๊ กแช่ยาเว ซึ้คู ดูทึ แด้ เว้ มื่ง ล นี้ง พี่ ม ดึ้ โละซ้ะ ดี๊ ทกุ้เม้ง, พี่ ทื่งดู ล้าง ซ้ะ ดี๊ ชีอูงพู๊ อ ซ้ะ เลา ดี๊ ทกุ้เม้ง ลู่ง อ แบ ท โชะทาง พี่ ม ล้างพือ ล้างปี๊
ฌางคูโคล๊งคู ม ฌางล้างย้าล้าง ดี๊ ล้างไย้ะไฆวะ ฌางคูคู นอ ล้างเละล้างโม้ ดี๊ ล้างไย้ะไฆวะ โพล้ง คูดูโมะโท๊ ลู่ง ฌางคูโคล๊งคู นอ, ล้างเละล้างโม้
กเย่ น เว่ง อ ป้ะตู๊ง นอ, ม อุ้พ้ะ อ ซ้ะ ครึๆ เลา มแน้ เลา มแช๊, ม ล แบ ท กาไบ้ะ แบ บี่ซุ้ โพล้ง ม เฌ๊โชะ โพล้ง กุ้ชื้อกุ้ชะ, อ ทโอทช๊อง ลู่ง น โอ ดี๊ กเย่ อ กจุ้แฆว้ นอ, ม แบ ท เกม๊า นึ แฮ้ ซยอง เท่อ
ดี๊ แน้, กโพล้ง อ พู-เอ้อ, เกม๊า โล้ล้าง ท อลู่งอแท๊ ดึ้ซึ้ โกะ, ดี๊ โล้ บี่อี้ง, “ทอดูทึโท๊ทึกแช่ยาเว ไจ้ะเว๊ บี่อี้ง, อี้งเซ้อ, ก เกดีงเกแด้ ดี๊ แน้, โอ้, โกะ พี่ เก เมเชะ ดี๊ ทูบาง อ กแช่ พี่ ล้างเปิ่ง ล แฌ้
น ม ล้างเทะเค้า ลู่ง ไชะคูแน้พ้า, เมะเว๊ ก นี่ ไคล้ล้าง เย้า, ทอดูทึโท๊ทึกแช่ยาเว โล้ เว๊ บี่อี้ง ล้อ
อีไย้ะ ม เกทางก้ะ ทล่าง โอโปล้ะก้ะ ดี๊ เอโดง ม เกทางก้ะ แพะคูทเคแกล้ โอโปล้ เป๊งนี่ ลู่ง ทแม้ชองแม้จุ้ พี่ แม้ เอะ โพล้ง ยูดา นอ อกย้อง ดี๊ ท แม้ล้าง โพล้ง อ ทไพ้ะทแม ล โอ แบ อ ซวีง, ล้าง ลู่ง อ ที๊งล่างค่างพ้า
ฌ้อง ลู่ง กแช่ยาเว อ ทลื่งทาง อ มื่งนี้ง พ้า นอ “ก ม แม้เตาแม้แต๊ กจุ้แฆว้ อ โพล้ง เก ท อคูอแน่ ซีง ลแพ, ดี๊ กเย่ อ พูแคว๊ เลา ดี๊ โพล้ง กุ้แฌ้ พี่ ไต้ อ ซ้ะ ดี๊ ทฆ้าทโฆ่ ลชื้อแด
กจุ้แฆว้ ล แพ อี้ง ม ดึ้ โละ ซ้ะ ดี๊ แกะ พู, แบเด้าะ แกะ พู ดี๊ อ พู อ ลี้ง ซีง ม น้า เว๊, อ ไฌ่ บี่ อี้ง แกะ พู นอ เก กแช่ ดู ทึ ดี๊ เก กจุ้แฆว้ ดู ทึ, เมะ อ พู อ ลี้ง ซีง นอ เก โพล้ง พี่ กแช่ แยว้ กุ้ นี่ เว๊ ดี๊ อางลึ นี่ เว๊ ดี๊ เก โพล้ง โต้ โพล้ง ล้อง”
กเย่ กจุ้แฆว้ ฌางคู โคล๊ง คู อี้ง, พี่ อ แม้ กแม มืง กแม แคว๊ ดี๊ โอ โบ โอ โย๊ ดี๊ เว่ง ล เว่ง นอ, ม ฌางล้าง ย้าล้าง เท่อ ลู่ง เว่ง นอ อ ฌ่าง, เป๊งนี่ อ แด แบ มี คูง ทาง พี่ อ อาง ไฆวะ เว่ง นอ
