7 ฌางคู พี่ อ โจ ดี๊ ที๊ง ท เฌ๊ช้า แอ พ๊า ดี๊ เกม๊า ท พู ท ลี้ง เก ทาง พี่ ม ล้างเปิ่ง ลู่ง โพล้ง เซิง เท่อ พล้ะ เท่อ อ ฌ่าง, อ นอ, กแช่ แยว้ ไป๊ป้อง แบ-อ้ะ ล้อ
กแช่แยว้ ไจ้ะเว๊, “เกม๊า ฌางคู กึทาง ทดุ้ทแล, เมะเว๊ ทดุ้ทแล ทซูงทแซ พี่ เกล๊าง ทคลี๊ง, ดี๊ เซง พี่ อ โอ ดี๊ อซูงอแซ ล มยู๊ แบ ล มยู๊, โอ ดี๊ อ คลี๊ง ลู่ง อ แซ พ้า, เกทาง ลู่ง ฌางคูโคล๊งคู”, ดี๊ โอทาง เว๊ บี่นอ ล้อ
ยาคุ้ เฌ๊ฆ้าง โอ เบ้า, ดี๊ น๊าม๊า-อ้ะ, ฌ้อง อีซาฮ้ะ น๊า ดุ้ เว๊ อ กลื่ง ลู่ง ไช๊แค่ ล้อง, ดี๊ ชูฌี้ เว๊ บี่อี้ง “แคว่เซ้อ, จ พูแคว๊ อ กลื่ง บี่ซุ้ดี๊ ท อ กลื่ง ลู่ง ทเคแกล้, พี่ กแช่ยาเว ชูฌี้ เว๊
โพล้ง พี่ อ ฌาง ไจทาง ลู่ง อ โฌ๊งทาง ท อ คลี๊ง, บี่ซุ้ ม ฆวีงล้าง เว๊ นอ ม ไท้ อ เด้า ดี๊ อ ลู่ง ซองลี้ เซิงมึซ้ะมึ เท่อ ลู่ง อ เฌ๊ไท้ โฌ๊ง ดี๊ บืงโด ปะ
อเว๊ ม นี่แบ ทชูฌี้ชูแอว้ ดี๊ กแช่ยาเว ดี๊ นี่แบ ทอเกิ้งอแบ ดี๊ อ กแช่แยว้, พี่ แม้พ้องพลิ้ เท่อ
เมะเว๊ ก ม ลู๊งล้าง ที๊ง ฌางคูคู พี่ ซู๊โอ้ ซ้ะ เท่อ ดี๊ ลู๊งล้าง ที๊งกล้อง ฌางคู ซู๊งไฆ๊ คู ก ม ลู๊งล้าง กวีงกแล้ ลู่ง นชื้อนชะ อ ล้อง ดี๊ ลู๊งล้าง ก ท ชูฌี้ชูแอว้ ลู่ง น พู น ลี้ง อ ล้อง
ก ม ดึ้ เกม๊า อ ซื๊งเว๊ ดี๊ ทล่างทเกล้ วะชวะ ก ทลู่ง นอ, เก ทชูฌี้ อ ล่าง, ก ม โซ๊งล้าง ทเฌ๊ช้า แบ อว๊างอแค๊, เก ทเฌ๊ช้า ลู่ง ทชูฌี้
เกม๊า ฆวีงล้าง ทแบกแช่แยว้อซ้ะ ลู่ง น กแช่ อ ฌ่าง เกม๊า เก้านี่ ทเอทกวี้ง พี่ อเฌิ่งอค๊า อซูงอแซ เกม๊า น เท๊ ฌางคู พี่ โอโปล้ นอ อไฌ่บี่อี้ง, เก อช๊าอโท่ พี่ ม อางฆื๊ง กแช่ยาเว บี่ซุ้ กแช่แยว้, ม เฌ๊ ฆวีงล้าง เอะ แน้ ทแบกแช่แยว้อซ้ะ
ก ม อางแบเลา ก ทชูฌี้, เกม๊า อ เฌ๊ล้าง แบ แน้, ลู่ง ฆู๊ง เนง ล เนง พ้า, บี่ซุ้ ม โอ ดี๊ ทดุ้ทแล ทซูงทแซ, กู้ง อาง ซ๊า เนง ฌ่าง
กแช่ยาเว ซึ้คู ดูทึชองทึ ไจ้ะเว๊, เกม๊า แม้นี่ ทชี๊งเชโป้ง ฆวี้ทะ, เฌ๊ อางกี ลู่ง ทล่าง อางกีซยอง เท่อ อ พ้า บี่ซุ้ ทอาง ม โอ ลู่ง ก ล่างโอ พ้า, เกม๊า น แม้แคว่ดุ้ เฆ้อ ลู่ง ท ล ไฌ่ อี้ง, ก ม เว่พ้ะ เอะ แน้ ป้อง ลู่ง มุ้คู, ดี๊ ลู๊งล้าง เอะ แน้ ทชูฌี้ ล้างอวีงล้างพะ ชี่-อ้า
อ ไฌ่ บี่ อี้ง, โพล้ง กุ้ อ แฌ้ พี่ อ อางท่าง เท่อ นอ, ม นี่ แบ เว๊, กุ้ อ แฌ้ พี่ อ อางฆื๊ง เท่อ นอ, ม แด แบ เว๊, ดี๊ กุ้ อ แฌ้ พี่ อ ดู เซ๊ เท่อ นอ, ม อุ้พ้ะ ทาง เอะ-อ้ะ
โพล้ง แม้ ไชะ ลู่ง อ แม้ เท่อ น้ะ นอ, เกิ้ง ม นี่ แบ วี่ง ท ซูง ท แซ
ด๊างพื่งวี่ ซีง-เอ้อ, เกม๊า น เอ้า น ซ้ะ ท้อง กแช่ เยซู ม เฌ๊ ไท้, น แคว่ ฆึ้ กแช่ นอ เอ้า อ ซ้ะ บี่ จะ เล้, พี่ อ โอ คุ้ นี่ ท แซ ลู่ง อ ฆวี้ ฌี้ ฌางคู คู อี้ง, อ เว๊ เอ้า อ ซ้ะ แคว่แล่ ท ช้า เฌ๊ แบ อ แค๊ นอ ล้อ
