17 กแช่ แยว้ ซ้ะทาง ดี๊ โพล้ง เล้ ท้องบ้ะ อ เนง ลี่ง ชี๊ง, เมะ เว๊ อ ซ้ะทาง ดี๊ โพล้ง พี่ อ แม้ ท เด้บ้ะ, โพล้ง ล แพ นอ อ จู แบ ท ญ๊อง ไฆวะ-อ้ะ ลู่ง แพะคู ตเค แกล้
น ซื๊ง จู ม โอท๊าง ลู่ง แพะคูทเคแกล้ พ้า อี้ง กเย่ น โพล้ง เลาพะ พี่ อ โญะ โอ คี๊ง ชี๊ง ทาง อ เช๊คู ล โค๊, พี่ อ เอ้งไฌ้ แย้ นอ
โพล้ง กุ้ แฌ้ พี่ อ แด แบ จ โฌ่ง จ พ้าง, ดี๊ แด แบ ทล้ะทเล่, กุ้เม้ง พี่ จ แม้-อ้ะ ลู่ง ค่าง อีไย้ะ พ้า, ดี๊ แพะคูทเคแกล้, แบเด้าะ อ แม้แคว่ดุ้ แย้ อ พ๊า ล ชี๊ง, ดี๊ ล ช๊องแน จ ลู่ง แบ
ทึ เมะ น ซื๊ง ซีงแฌ๊ ท ล แพ อี้ง ล้างที๊ง ล้างช้ะ กุ้ อ เม้ง เย้า ฌี้ๆ, จ แบ ซ้ะ เกม๊า น ซื๊ง นาง แบ ทาง ไท้-อ้ะ เด้าะ, เมะ เว๊ กแช่ แยว้ แม้ช้า โพล้ง อีซลาเอง เกม๊า อ พ้อง ไฆวะ ดี๊ โพล้ง อีไย้ะ อ ค่าง อู้, แบเด้าะ ลู่ง ไค๊ นอ แม้ ซี๊ง ไฆวะ โพล้ง พี่ ล ทื๊ง ล นะ-อ้ะ แบ ล แพ นอ ล้อ
เกม๊า ไคล้ บี่อี้ง, “กแช่ยาเว ไจ้ะเว๊ บี่อี้ง กโพล้ง อ จู ม ลี่งแล่ อ ซ้ะ บี่ซุ้ดี๊ ทพูแฆ่ อ อี ลู่ง ญ้าง พ้า บี่ซุ้ดี๊ บืงโพ่ พี่ อ ล้างเทะ โพะ โพล้ง เก้า บืง อ ไค๊ ดี๊ โพล้ง ล โอ ฆี๊ นี่ เว๊ น่างแฌ้ แบ”
เกม๊า น โล้ เอะ อซื๊งเว๊ บี่อี้ง, กแช่ยาเว ไจ้ะเว๊, ‘จ โอม๊า บี่จะเล้ นอ, จ ม แม้ เอะ น ซื๊ง บี่ซุ้ดี๊ เท่อ พี่ น ไคล้-อ้ะ ท้อง ลู่ง จ แน่ นอ ล้อ
โพล้ง พี่ อ เฌ๊ไท้ ไคล้อ้าไคล้ซ๊าง ที๊งล่างค่างพ้า นอ, แบ ทแช๊ ซี๊ง ลู่ง กแช่ยาเว อ เมะแซ พ้า
จ แช๊เมะไฌ๊ซ้ะ ดี๊ โพล้ง ล ชื้อ นอ, ลี่งชี๊ง เนง ดี๊ ไจ้ะ บี่อี้ง, “อซื๊งเว๊ เก ชื้อชะ, พี่ โอ ดี๊ อ ซ้ะ เฌ๊พลุ้เฌ๊เชง ดี๊ อซื๊งเว๊ ล ซีงแฌ๊ จเกล้จพ้า แบ”
