3 กแช่ยาเว ไจ้ะเว๊, “จวีงจแล้ ล ดึ้ โละซ้ะ ดี๊ กโพล้ง แบ ล้างชู้ล้างแกย, เมะเว๊ กโพล้ง นอ, เก ที่ไพ้ะแย, อ มื่งนี้ง อช๊าอโท่ นอ, เมะเว๊ ล แย้ คี๊ง ชี๊ง เนง นอ ล้อ”
กแช่แยว้ อ พูแคว๊ แด เว๊ กโพล้ง อ พูมืง นอ ฌี้ มะ, ฌ้อง อางลึนี่ เว๊ ดี๊ ฮะนี่ เว๊ เก อ แม๊
กแช่แยว้ โก้งซ้ะ ดี๊-อ้ะ ตบลึ้ เนง, ดี๊ โล้ ซีงแฌ๊ เอะ เว๊ อ เท่อ ดี๊ วีงฌี้แล้แอว้, เฌ๊ เว๊ ดี๊ กแช่แยว้ อ โมไคล้คิ้, อ เว๊ ล ดุ้ อ แน่ คุ้ช๊องแน เว๊ แบ อกย้องบี่นอ, กแช่แยว้ อางกีล้าง-อ้ะ ลู่ง โพล้ง กุ้ที๊งกุ้ค่าง ลู่ง ที๊งล่างค่างพ้า นอ อ จูง พ้า
กแช่แยว้ นางแบทางไท้ เว๊, อซื๊งเว๊ เก ที่ ไพ้ะแย ล้อ เก ลี้ง พี่ ลี้ พ้องไฆวะ เย้า, ฌ้อง ล เฌ๊ไท้ๆ, ล้าแบ
เฆ้อ ซีง ลแพ ก โญะ นอ, เมะเว๊ เนว๊ชี๊ง เมะชองเมะไคล๊ ล โค๊ นอ, ท้อง โฆะชี๊ง แบเด้าะ ลู่ง ทโอม๊า อ แค๊ นอ, โอ ที่ ทน้ะทโน๊ง, ดี๊ ทเมะมองแน๊อึ้ ล ไยะ แบ นอ, ล้างแม่ไฆวะ, ดี๊ เฆ้อ ก ซี๊งไฆวะ เว๊ ล้อ
ทเม้งเล้ โอ พี่ ม แม้-อ้ะ ซี ได้ะ, ลู่ง ก โซ๊ง ซไบ้ะแซ อ ฌ่าง พี่ ก ล นี่ แม้ เอะ-อ้ะ ได้ะ แบ พี่ ก มื้งแล่ อ้ะ ม ซูงทางแซทาง ซไบ้ะแซ ช๊า แบทเล้ แซทาง ก้ะ ลู่ง อ แซ ไช?
เมะเว๊ ก ล ดึ้ เท่อ ล้างชู้ล้างแกย-อ้า ซ้ะทาง เท่อ ครึๆ-อ้า แบ เมะเว๊ วีงแล้ ม ซ้ะนางซ้ะไพล้ อ ซ้ะ ลู่ง ก เมะแซ พ้า เมะเว๊ ทม๊า ซีง ลแพ พี่ ก ไต้ล้าง เว๊ นอ ล้อ
แบเด้าะ อ ซื๊งเว๊ ลแพ นอ, นี่ กไบล้ะกแบล ดี๊ ดึ้ เกม๊า กแช่แยว้ อ วีงฌี้แล้แอว้ อ ซ้ะ เฌ๊ฌ้อง ทบี่นอ, กแช่แยว้ แกยไฆวะ อ ซ้ะ, เก อ ซื๊งเว๊ ซีง ลแพ อดีงอแด้ ดี๊ กแช่แยว้ ดึ้ โละซ้ะ ดี๊ อ ซื๊งเว๊ ลแพ นอ ล้อ
อกย้องบี่นอ, กแช่ยาเว ไจ้ะเว๊ บี่อี้ง, อี้งเซ้อ, ก ม ดึ้ เกม๊า ท กึทาง อ ซ้ะ ลู่ง ออ้าอซ๊าง นอ, เฌ๊ ล้างแบ-อ้ะ, พี่ อ เว๊ ไจคุ้ซูงไฆวะ ล พ้อง แบ, ทึเมะ อ เว๊ ม โล้ล้าง ทน้ะทโน๊ง ดี๊ เฆ้อ ฌี้ นอ, ก ล คุ้ช๊องแน-อ้ะ แบ
เมะเว๊ ก นี่ โล้แบ ซีงแฌ๊ น พี๊งชู้พู๊งชู้ ลู่ง แย๊ อู้ง เมาน่าง, พี่ ก ไจทางฌ้าไฆวะ อ ซื๊งเว๊ ลู่ง ค่าง อีไย้ะ พ้า, ก โล้ เอะ-อ้ะ พ๊าๆ, เย้า พ๊าๆ, เด้าะ, ทึเมะ ท้อง กุ้ มื่งนี้ง อี้ง ฌี้ นอ, ก โล้ เอะ-อ้ะ บี่อี้ง, เกม๊า คุ้ช๊องแน ก ลู่ง
จ ม เฌ๊ล้าง ไคล้ เท่อ ดี๊ แน้ พี่ นอ, ดี๊ จ ม แม้นี่ จ วีง จ แล้ พี่ อ โอ ดี๊ แน้ นอ, อางกีล้าง ดี๊ โพล้ง ลแพ นอ ปะ, ดี๊ เกม๊า อ ซื๊งเว๊ อวีงช้า ยุ้ช้า โพล้งเฌงพูฆ๊างพู อ เท่อ ซกุ้ ดี๊ แน้, บี่ซุ้ น ล แบ ยุ้-อ้ะ ล แฌ้ แบ
โพล้ง กึ ทาง นี่ ดี๊ อ มู่ อ แพ่ นอ, นี่ แบ ท ม๊า ลู่ง อ ไพ้ะ อ แย นอ ล้อ, แบ เด้าะ โพล้ง กึ ทาง ดี๊ วีง ฌี้ แล้ แอว้ นอ, นี่ แบ ท ม๊า ลู่ง อ วีง อ แล้ ล โค๊ ล้อ
น ซื๊ง ลือ เท่อ ย่าง อี้ง บี่ เล้ น ซื๊ง แน่ ตาง ล ชู่ง กแช่ แยว้ อ ลู่ง แบ เต้ๆ, น ซื๊ง ด้างทะ วีง ฌี้ แล้ แอว้ ครึๆ, ล้อ, ด้อง ซุ้ น พี๊ง พู๊ง ลู่ง เอะ อู้ง แม้ เว๊ นอ ล้อ
แม้ ไทะทะ วีง ฌี้ แล้ แอว้ ล ฌี้
