11 อีซลาเอง โล้ เอะ โยซิ้ ไจ้ะเว๊, “แพ่ ล ช๊องมอง แบ, พี่ ม แด แบ น เมะ ได้ะ, แบเด้าะ กแช่แยว้ เกม๊า แพ่ แด แบ แน้, ดี๊ น พู คี๊ง แฌ้ ปะ”
อ แพ่ นางแบ เว๊, ฌ้อง ไจ้ะเว๊, “อ อี้ง นอ, เก ก พู อ ไช๊แค่ พ้ะโท๊, ทพูแฆ่ อ้า ไอซี๊ง อางไฆวะ-อ้ะ เย้า, ก พู โยซิ้ แบ ท ซย๊างยะ เก ล ไก้ๆ, เต้ๆ, ล้อ”
อ พูมืง พูแคว๊ กุ้แฌ้ นอ, เฌ๊ อางเลว๊ อ แพ่, แบเด้าะ อ เว๊ ล ญ่อง ฮะนี่ ท อางเลว๊ แบ, ไจ้ะเว๊, “อางเลว๊ แย้ ล ฌี้, จ ม ลี้ ลู่ง พลื่งค่าง, ลี้ฌูง จ พู ล พ๊าฆ่าง ดี๊ ท ฌางล้างย้าล้าง”, อ แพ่ ฌาง ช๊องมอง แบ เว๊ บี่อี้ง ล้อ
อ แพ่ ยาคุ้ ไจ้ะเว๊, “น ซื๊ง แม้ ล้างมื่งล้างพ้ะ แย้ ดี๊ จ พู, โยซิ้ ล โอ ล้า แบ, ซีเมโอง ล โอ ล้าแบ, น ม แม้นี่ เกม๊า เบงยามีง ลี้ ล แฌ้ ได้ะ, เลาพะ อี้ง นอ, เก ทน้ะทโน๊ง ลู่ง แพ่ อ ฌ่าง กุ้เม้ง ล้อ”
อซื๊งเว๊ ไท้ โล้ เอะ อ แพ่ ไจ้ะเว๊, “โยซิ้ โอม๊า ได้ะ, เก โพล้ง โพะคอง ค่าง อีไย้ะ เลาพะ”, แบเด้าะ ยาคุ้ นอ, ท ล้างตุ้ท๊า-อ้ะ, เป๊งนี่ ล นะ อซื๊งเว๊ แบ ล้อ
อีซลาเอง นอ อ เมะ ไค้ะ, ลู่ง อ ซ้ะแซย่ อกย้อง, แคว่ เท่อ ล แด น่างเม้ง ล้าแบ, โยซิ้ เฌ๊ฆ้างฌ้า อ พูแคว๊ คี๊ง แฌ้ นอ, เฌ๊ฆ้าง เบ้า ดี๊ อ แพ่, อีซลาเอง โพะโฌ๊ง น๊าม๊า อซื๊งเว๊ ล้อ
โยซิ้ เกม๊า อ พู คี๊ง แฌ้, ไจล้างไฆวะ ลู่ง อ คางมโล่ง คู, ฌ้อง ซย๊องล้าง อ ซ้ะ แบ้ล้าง เท่อ ท้อง ฌางคู คู ล้อ
เกม๊า น แด แบ นพูนลี้ง เกม๊า ทฆู๊งทพุ้ โอ ลู่ง อีซลาเอง พ้า
พูลี้ง นอ, เก โพล้ง ซ้ะแซย่ อ คูคล้าง ดี๊ พูแคว๊ อฆี๊งอแล้ นอ, เมะเว๊ อ แพ่ ล้อ
กแช่ แยว้ อ ดู้ง อ ยาง แม้ เท่อ ลู่ง ก ซ้ะ พ้า, ดี๊ แม้ เท่อ ซี แอ นี่ ก อางท่าง ดี๊ ก ช๊องมอง-อ้ะ ได้ะ
