1 ทมุ้คูพู คี๊ง แฌ้ นอ, เฌ๊ ท้อง เว่ง โซโดง ลู่ง มื่งแฌล้างโค๊, โล้ะ ชี๊น้าง โอ ลู่ง เว่ง โซโดง อ เกล้ ป้ะตู๊งไท้ะ, ท่อง โล้ะ แด ทมุ้คูพู คี๊ง แฌ้ นอ, อ เว๊ เฌ้เทิงทาง ลี้ ตองช๊าฮะช๊า เว๊, ดี๊ ซย๊องล้าง อ ซ้ะ, ทุ้เท่ง ล้าง อ เมะ ฌางคูคู
อ อี้ง นอ, เก เทรา อชื้ออชะ, เทรา อ พู โอ, อ เม้ง อาบราง, นาโฮ, ดี๊ ฮาราง, ฮาราง นอ, อ พู โอ, อ เม้ง โล้ะ
อาบราง นอ, เปิ่งโอเปิ่งช๊อง ลู่ง ค่าง คานาอาง พ้า, เมะ โล้ะ นอ, เปิ่งโอเปิ่งช๊อง ลู่ง เว่ง ล จอง แบ ล จอง อซุ้อแกล้, ลู่ง ทแด้คู, ดี๊ แญ่ อ เด้ ลี้ กางทาง เว๊ ท้อง ลู่ง เว่ง โซโดง นอ ล้อ
ฌ้อง โพล้ง แคว๊ ลแพ นอ, เฌ๊เทิงทาง นี่ พี่ นอ, แคว่ฆ้าง เท่อ ลู่ง เว่ง โซโดง ล โค๊ นอ, ดี๊ อาบราฮาง ลี้โซ๊ง อ ซื๊งเว๊ นอ ล้อ
โพล้ง แคว๊ ลแพ นอ, แกยไฆวะ อ ซ้ะ ดี๊ ทล่าง พี่ นอ, ลี้ ลู่ง เว่ง โซโดง ไวะ, แบเด้าะ อาบราฮาง ชี๊เทิง โอคุ้ เท่อ ลู่ง กแช่ยาเว อ เมะแซ พ้า ได้ะ
แบเด้าะ โพล้ง แคว๊ คี๊ง แฌ้ นอ, เยาฆ้าง อ จูง ทึ้ ฆ้าง โล้ะ ลู่ง เด้า พ้า, ฌ้อง กาไบ้ะไฆวะ ป้ะตู๊ง เฆาะ
ไจ้ะเว๊, “จ เซงคู-เอ้อ, จ อางโฆอางแย๊ แน้, อวีงซ้ะชู้ แน้ ลี้ แว่ ลู่ง น เพล่ อ เด้า, มี๊งโท่ ล ซ๊าง, อางซฌ้ะ น คาง, ฌ้อง เฌ้เทิงทาง ลู่ง โฌ้ โค๊ ลี้ก้ะ เท่อ เด้าะ”, อ เว๊ คี๊ง แฌ้ นอ ไจ้ะเว๊, “ก ล ลี้ แบ, ก ม มี๊งโท่ ลู่ง เว่ง อ คว้าง พ้า นอ ล้อ”
อาบราฮาง นอ, ซย๊องล้าง อ ซ้ะ แบ้ล้าง เท่อ ลู่ง โพล้ง ล ค่าง นอ อ เมะแซ พ้า
โยซิ้ เกม๊า อ พู คี๊ง แฌ้, ไจล้างไฆวะ ลู่ง อ คางมโล่ง คู, ฌ้อง ซย๊องล้าง อ ซ้ะ แบ้ล้าง เท่อ ท้อง ฌางคู คู ล้อ
พี่ จ ไจทาง เฌ๊ ลู่ง เว่ง อ ป้ะตู๊ง นอ พี่ จ ชี๊น้าง ลู่ง เว่ง อ คว้าง พ้า
(โพล้ง ที๊งไย้ค่างไย้ ล นี่ มี๊งโท่ ลู่ง เกล้มื่ง ฆ้อง แบ จ เว่พ้ะทาง เด้า อ เกล้ ป้ะตู๊ง เอะ โพล้ง ลี้เท่อไท้เท่อ)
โพล้ง พี่ ชี๊น้าง ลู่ง เว่ง อ ป้ะตู๊ง นอ, ไคล้ แบฆ้ะ ดี๊ จไฌ่จกย้อง โพล้ง ม้าไซ้ะ ช๊องมองทางนี่ แท๊, ซ้ะอวีง เว๊ แม้ไฌ๊ซ้ะ แย้
ม แม้ อ ซ้ะ บี่ ซุ้ ลู่ง โล้ะ อ ชู้ แค๊ อู้ ปะ, โพล้ง อาง เท่อ โอ้ เท่อ, ฆวี้ เท่อ อางแช๊ เท่อ, เซิง เท่อ พล้ะ เท่อ, เตะ เท่อ ไต้ เท่อ
ซ้ะนาง ตองช้า ฮะช้า โพล้ง กมวี้ง ล ฌี้, อ ไฌ่ บี่ อี้ง, โพล้ง พี่ อ แม้ บี่ อี้ง นอ แบ พ๊าๆ, ตองช้า ฮะช้า แบ ท มุ้คู พู แบเด้าะ ล คลึ้ ซีงแฌ๊ ล้าง อ ซ้ะ แบ
โบอ้ะ ลี้ ลู่ง เว่ง อ ป้ะตู๊งไท้ะ ดี๊ ชี๊น้าง พี่ นอ, แคว่เซ้อ, อมื่งอแคว๊ เท่งซ้ะ ลู่ง ม เทะนี่ไท้ เท่อ ซี พี่ โบอ้ะ เฆว้ง แบ เว๊ ล แฌ้ นอ เฌ๊ฆ้าง พี่ นอ เมาะ, โบอ้ะ ไคล้ ดี๊-อ้ะ ไจ้ะเว๊, “ฌุ้พาง-เอ้อ, เฌ๊ เว่ ชี๊น้าง พี่ อี้ง แบๆ, เซ้อ”, อ เท่อ เฌ๊ ชี๊น้าง เว๊ ล้อ
