5 โล้ะ พี่ อ ลี้ ดี๊ อาบราง นอ, โอ ดี๊ อ แมะ, อ แกะ, ดี๊ อ งู้ น๊างมู๊ง, ดี๊ อ เด้ ปะ
อาบราง นอ, ลี้ เว๊ บี่ซุ้ดี๊ กแช่ยาเว อ ทโล้ทละ นอ ล้อ, โล้ะ ลี้ เว๊ ปะ, พี่ อาบราง ไจทางไฆวะ เว่ง ฮาราง นอ, อ โญะ โอ เนว๊ ชี๊ง เย่ เนง
อาบราง ลี้ฌ้า อ แม๊ น่าง ซาไร, ดี๊ อ พื่ง อ พูแคว๊, เมะเว๊ โล้ะ ดี๊ อคองอแซย้ เลาพะ, พี่ อางกีซยองนี่ เว๊ นอ, เลา ดี๊ กเย่ โพล้ง พี่ อ นี่แบ เว๊ ลู่ง ฮาราง นอ, ไจทาง ลี้ ลู่ง ค่าง คานาอาง พ้า, ท่อง อ ลี้ นึฆ้าง ค่าง คานาอาง พ้า เย้า นอ
ฌางคู ล่าง พี่ นอ, ล เล่ แบ, พี่ ม เกม๊า อ ซื๊งเว๊ โอซยอง โละซ้ะ ซี, อไฌ่บี่อี้ง, อ ซื๊งเว๊ อคองอแซย้ โอ แอ มะ, อกย้องบี่นอ, โอซยอง โละซ้ะ ล ซี แบ
ท่อง พืงแซ แคว๊ คี๊ง แฌ้ ดูทาง เย้า นอ, เอโซ นอ เก โพล้ง ลู่ง อ ค้ะ เท่อ โต้, เมะ ยาคุ้ นอ, เก โพล้ง ลเซ๊ลคละ แบ, โอ ลู่ง เด้ พ้า ล้อ
น่าง อาดา อ พู โอ, กุ้ เว๊ อ เม้ง ยาบาง, อ เว๊ เก โพล้ง อ คางไท้ะ ล ดอง พี่ เปิ่งโอเปิ่งช๊อง ลู่ง เด้ พ้า, ดี๊ เก โพล้ง ลื่ง ทพูแฆ่
อ ซื๊งเว๊ อ เด้, ดี๊ อ แมะ อ แกะ น๊างมู๊ง ม แบ ท ลู่นี่ ก้ะ เลา ดี๊ ตไก้ยะ กางทะ เท่อ, ดี๊ อ ทฆ้าทโฆ่ กุ้เม้ง อ เอ้า นอ, ม แบ ท แม้นี่ ไท้ ม้อง แดไฆวะ-อ้ะ ดี๊ โพล้ง ม กุ้ซย้ะ-อ้ะ บี่อี้ง, ‘ท ไพ้ะฆิ้โค๊ฆิ้ โอ กุ้แพ้’
