8 ฌ้อง นอ กแช่แยว้ ไคล้ ดี๊ แย้ ไจ้ะเว๊, “กโพล้ง อ พู-เอ้อ, เกม๊า น แพล้ พล๊อง ฆ้าง กางแป พ้า” ดี๊ ท่อง จ แพล้ พล๊อง ฆ้าง กางแป นอ, อี้งเซ้อ, ป้ะตู๊ง โอ ล เช้า
ทล่าง ไค้ะเซยา ละฌี้, ทล่าง ไค้ะซ๊าโญ๊ง ฌี้ นอ, ล โอ แบ พี่ โพล้งอ้าโพล้งซ๊าง ม โอคุ้ซูง อ ซ้ะ ซี
ท เซงทื่งเฌ๊ฌ้อง แบ โพล้ง พี่ อางกีซูงไฆวะ อ ท ช๊องมองเว้ทแม้ โยะคิ้ ดี๊ กแช่ยาเว พี่ อ ทไพ้ะทแม้ โอ ทไค้ะ พ้า อ ซื๊งเว๊ ไจ้ะเว๊ บี่อี้ง, “โพล้งเล้ ม แด เฆ้อ?, โพล้งเล้ ม ซีงแฌ๊ กไฌะกไฌ่? ”
ลู่ง น ไช๊ คางไท้ะ ทุ้ นอ โพล้ง ซยาง พี่ อ ทไพ้ะทแม ล โอ แบ, อ ซวีง บึ้ เว๊ ล้อ พี่ อ เว๊ อางฌูงอางแบล เท่อ นอ, น ล นี่ พองทะ-อ้ะ แบ แบเด้าะ, ทึเมะ โอ ดี๊ ท อไฌ่อกย้อง, ล เม้ง ดี๊ ล เม้ง, ลแพ อี้ง ฌี้ นอ
กแช่ยาเว ไจ้ะเว๊, “โพล้งเล้ ม โอคุ้ซูงไฆวะ เฆ้อ, ลี้ โอ ลู่ง ท กดื้งกทะ พ้า, บี่ซุ้ ก ล แด-อ้ะ แบ ซี ชี่ โบ่?, ก ล นี่ โอ ฆวี้ ทมุ้คู ดี๊ ฌางคูโคล๊งคู แบ โบ่?”, กแช่ยาเว โล้ เว๊ บี่อี้ง ล้อ
ดี๊ กแช่แยว้ เฌ๊ฌ้า แย้ ท้อง ทล่าง พ้ะเล่ อ ป้ะตู๊ง, ดี๊ ท่อง จ แคว่ เท่อ นอ, แคว่-เซ้อ, ทเช้าทที่ โอ ล เช้า ลู่ง กางแป พ้า
ดี๊ กแช่แยว้ ไคล้ ดี๊ แย้ ไจ้ะเว๊, “เกม๊า น นึฆ้าง, ลี้ แคว่ ท ล้าง ซ้ะลูซ้ะไล้ะ ลู่ง ออ้าอซ๊าง, พี่ อ ซื๊งเว๊ ซีง ลแพ แม้ ซกุ้ เว๊ พี่อี้ง”
