10 ทบี่นอ, จ ลี้ นึฆ้าง, ดี๊ แด แบ-อ้ะ, แคว่-เซ้อ, เก ทฌ้าง แพล้กีง ลู่ง ท อ แพ้ ล้อง วะชวะ, โอ ดี๊ ทพูแฆ่ แจว้เคว้ ดี๊ ทพูแฆ่ ล้าง ซ้ะลูซ้ะไละ กุ้เม้ง อ ฌ้าง, เลา ดี๊ อีซลาเอง อชื้ออชะ อ ทเค่งทฌ้าง เลาพะ
ไต้ทางนี่ ทเค่งทฌ้าง ลู่ง น กแช่ อ ฌ่าง น่าง เม้ง ล ฌี้, ทฌ้าง เม้ง ฌี้ๆ, พี่ อ โอ ลู่ง มุ้คู ท้ะ ฌี้, ฌางคู คู ฌี้, ลู่ง ที๊ง พ้า ฌางคู ละ ฌี้
ซแล้ แม้ เซง เชิ่งพลี้ง ทู เท่อ, อ เว๊ กวิ้ ท อ ฌ้าง ดี๊ ลิ้จ๊าง เซง, อ เว๊ แม้ฌี้แม้แอว้ เว๊ ดี๊ ท้ะแพล้, ดี๊ กวิ้ เว๊ อ ฌ้าง ดี๊ ท ว้างลี้ว้างไท้, อ เว๊ แม้ เว๊ บี่ซุ้ดี๊ โพล้ง อ ฌ้าง, บี่ซุ้ดี๊ กโพล้ง อ ทฌี้ทแอว้, บี่ซุ้ เกม๊า เว๊ อ โอ เด้า พ้า ล้อ
ดี๊ ก ม แม้แอทาง แกไท้ อ ทไพ้ะทแม, ดี๊ อ ทเด้บ้ะ เก คี๊งโทะ, เป๊งนี่ อ เว๊ ดึ้ เกม๊า ก ค่าง แบอ้า ดี๊ ท ล้าง ซ้ะลูซ้ะไล้ะ อ จู, ดี๊ ดึ้ เกม๊า กคองกแซย้ โอฆวี้ ดี๊ อ ซื๊งเว๊ อ ท ล้าง แช๊เมะไฌ๊ซ้ะ นอ ล้อ”
เป๊งนี่ อ แคว่ เว๊ อ ท เอโบ้งเอพะ แช่ น้ะ ได้ะ นอ, อ เว๊ ดึ้ เกม๊า ที๊งล่างค่างพ้า แบอ้าแบซ๊าง ลู่ง ท ลี้ เอโบ้งเอพะ ดี๊ ไล๊ ดี๊ เซง มื่งเทิง
“ทน๊าม๊า อ ฌ่าง พี่ น นี่ เช้า เทว๊-อ้ะ ลู่ง ยูดา อ เว่ง พ้า กุ้ เว่ง, ดี๊ ลู่ง เว่ง เยรูซเลง อ เกล้คูเกล้ พ้า, เลา ดี๊ น กแช่, น พี๊งชู้พู๊งชู้ ลู่ง แย๊, กเย่ กจุ้แฆว้ ดี๊ นคูนแน่, ดี๊ โพล้ง เฌงพูฆ๊างพู ลู่ง ค่าง นอ, กแช่ยาเว ล นี่ นางแบท๊าง เว๊ แบ-อ้า?, กแช่แยว้ ล นี่ นางแบทางไท้ เว๊ แบ-อ้า?
เม้งฌี้ๆ, นอ, ก นี่ เจ่ทาง กเย่ ก เพล่ ซีง ลแพ, เมะเว๊ โมไคล้คิ้กแช่แยว้ ลแพ นอ, เฌ๊ ลู่ง น โอ พ๊าๆ, เย้า พ๊าๆ, เด้าะ ไจ้ะเว๊, ‘อวีงซ้ะชู้ แม้ เท่อ พี่ อ ล้าง ซ้ะลูซ้ะไล้ะ, พี่ ก แช๊เมะไฌ๊ซ้ะ-อ้ะ อี้ง ล ฌี้’
ดี๊ น ซื๊ง ม ซีงแฌ๊-อ้ะ, เฆ้อ เมะเว๊ ยาเว, น ซื๊ง ล นี่ แม้โพะ ก ท อเค้อะอต้าง อ ไค๊-อ้า, แม้โพะ ก ทอางกีล้าง อ ไค๊-อ้า แบ, แบเด้าะ นี่ แม้โพะ โพล้ง กุ้ชื้อกุ้ชะ, พี่ โอ วะ นฆูนฆ้อง ลแพ นอ อ ทอางกีล้าง อ ไค๊ ล้อ”
แบเด้าะ อ เว๊ โละกวี้ เอโบ้ง เท่อ น้ะทาง ได้ะ, อ เว๊ แด กแคว๊ อ ฌ้าง แพล้กีง โอ ลู่ง ท อ แพ้ล้อง, เก โพล้ง เคลเดีย อ ฌ้าง พี่ กวิ้ เว๊ ซี่ง โฌ้จีลี
ดี๊ อีซลาเอง อชื้ออชะ อ โพล้งเม้งโพล้งแซย่ เนว๊ชี๊ง แฌ้, ชี๊เทิง โอ ลู่ง ทฌ้าง ลแพ นอ อ เมะแซ พ้า, ดี๊ ชาฟาง อ พู ยาอาซางยา ชี๊เทิง โอ ลู่ง อ ซื๊งเว๊ ลแพ นอ อ โป้ง พ้า, ล แฌ้ๆ, นอ โอ ดี๊ มีอ้าโด้งล่าง ลู่ง อ จูง พ้า, ทน๊าม๊า อ กลื่ง ดี๊ อ คูง นอ, ดี้งทาง ลู่ง ท้ะโค๊
ดี๊ กแช่แยว้ ไคล้ ดี๊ แย้ ไจ้ะเว๊, “เกม๊า น นึฆ้าง, ลี้ แคว่ ท ล้าง ซ้ะลูซ้ะไล้ะ ลู่ง ออ้าอซ๊าง, พี่ อ ซื๊งเว๊ ซีง ลแพ แม้ ซกุ้ เว๊ พี่อี้ง”
อซื๊งเว๊ ล โบง ทาง แบ้ ทาง กแช่ แยว้ พี่ อ โอ ล้างชู้ ล้างแกย ล แฌ้ นอ ล้า แบ, แบเด้าะ โบง ทาง แบ้ ทาง ก้ะ ท เค่ง ท ฌ้าง พี่ อ บี่ ซุ้ โพล้ง ลู่ง อ ซี๊ง ซี, ดี๊ โบง ทาง แบ้ ทาง ทู, ท พู ท แฆ่ ลู่ง อ คาง ลี่ง โค๊ ดี๊ ท พู ท แฆ่ ลู่ง อ แจว้ ซี นอ อ ฌ้าง
“ท พี่ อ ล้าง ซ้ะลูซ้ะไล้ะ นอ, อาง ล ฌี้
ปโล่ ล้าง น ซ้ะ แดเทา, ไค๊ไก้ะ น ซื๊ง ม เฌ๊พลุ้, ไต้ทางนี่ ทเค่งทฌ้าง แพล้กีงแพล้ไว้ ลู่ง น กแช่ อ ฌ่าง, เก ทเค่งทฌ้าง ล เม้ง แบ ล เม้ง, เก ทฌ้าง อ แพ๊ ฌี้, อ มู่ ฌี้
ล้างโฌ่ ท เม้งฌี้ๆ, พี่ อ ไจเคว้ ฌางคู คู ล้างโฌ่ แยพู เม้งฌี้ๆ, พี่ อ โอ ที๊ง พ้า, ลู่ง ฌางคู เช๊ละ
ปโล่ ล้าง น ซ้ะ เมะ ฌี้, ไค๊ไก้ะ น ซื๊ง ซีง ลแพ, ม ซ้ะนาง กแช่ยาเว น กแช่แยว้ อ ท เอิ้งล้าง, พี่ อ แม้ เว๊ ดี๊ น ซื๊ง, ดี๊ ไต้ทางนี่ก้ะ ทเค่งทฌ้าง แพล้กีงแพล้ไว้, เก ทฌ้าง ล เม้ง แบ ล เม้ง, พี่ กแช่ยาเว น กแช่แยว้ ล เกม๊า แม้ แบ นอ
ท้อง น พู โอ, ดี๊ น ลี้ง โอ, ดี๊ โอ แบ ที๊งล่างค่างพ้า นอ, นี่ อช๊าอโท่ ไยะ เย้า, ดี๊ น เมะ เฌ๊พลุ้, ไต้ทางนี่ ทเค่งทฌ้าง แพล้กีงแพล้ไว้, เก ทฌ้าง เม้งฌี้ๆ, ดี๊ แม้ ทอ้าทซ๊าง ลู่ง กแช่ยาเว น กแช่แยว้ อ เมะแซ พ้า นอ, เก ท พี่ ล แบ อ ซ้ะ แบ ล้อ
