8 ดี๊ ลู่ง เครุ้ ซีง ลแพ อ โป้ง พ้า นอ, โอ ดี๊ ท พี่ อ โพลทาง, บี่ซุ้ดี๊ กโพล้ง อ จูง โอ ลู่ง อ ได้ะ เช๊ละ
ฌ้อง เซราฟีง ล ดื้ง ลู่ง เซราฟีง อ โป้ง พ้า นอ, เฌ๊ ยู้ง ฌูง แย้, อ จูงพ้า โอ ดี๊ มีอีอ้า พี่ อ เว๊ แม้นี่ ท้ะไทะ ไทะ นี่ เว๊ ลู่ง ทลื่งล่าง
ลู่ง อ ได้ะ เช๊ละ นอ, โอ ดี๊ จูง บี่ซุ้ดี๊ กโพล้ง อ จูง, โอ ลู่ง อ เฌาแพ้ล้อง ลี่งแพ้ เลา, ลี่งดื้ง นอ, ล ดื้งๆ, อ เมะ โอ ตบลึ้ เบง, ดี๊ อ ได้ะ โอ ตบลึ้ แพ้
เครุ้ กุ้ แฌ้ นอ, อ เมะ โอ ลี่ง เบง, ดี๊ อ ได้ะ โอ ลี่งแพ้, ดี๊ กโพล้ง อ จูง อเค่งอฌ้าง โอ อ ได้ะ เช๊ละ
เครุ้ ล ดื้ง, เยาทาง นี่ อ จูง ลู่ง เครุ้ ลแพ นอ อ เบ้าช้า, ลี้ ลู่ง มี พี่ โอ เครุ้ อ เบ้าช้า นอ, ฌ้อง นอ พองทาง มี ล น้าง, ดี๊ ชวี๊งล้าง เว๊ กแคว๊ พี่ ซุ้ ไช๊ช้าง ตไก้ยะ ลูงไว้ะไก้ นอ อ จูง ย๊างซ้ะ พ้า, กแคว๊ นอ พองนี่ เว๊ ดี๊ ไจทาง โชะ เว๊
ฌ้อง นอ จ แคว่ เท่อ, แคว่-เซ้อ, ท อ คางไร้ะ โอ ลี่ง วอง, ลู่ง เครุ้ ลแพ นอ อ ฌ๊างไท้ะ, ท อ คางไร้ะ โอ เครุ้ อ ฌ๊างไท้ะ ล ดื้ง ล วองๆ, ท อ คางไร้ะ นอ, อมยู๊อฮ๊าง บี่ซุ้ดี๊ เบรีง อ พ้าง
