25 จี้ เลาพะ พี่ นี่แบ ดี๊ โพล้ง น๊างมู๊ง นอ, เค๊ง ดุ้ เว๊ ฆ๊า เมาะ, ซ๊า ม๊า ลี่ง แย้ ซ๊า ชี๊ง กีโล, อ นอ ที๊ ซุ้ ดี๊ นางเค๊ง ลู่ง ทแบ้แยว้ล่างลู่งอฌี้ พ้า เจ่ เว๊ นอ
กแช่ยาเว ไคล้ ดี๊ โมเซ ไจ้ะเว๊
“ท่อง น แม้ เอะ โพล้ง อีซลาเอง อ ไละ พี่ น ดว้ะ-อ้ะ นอ, เกม๊า อ ซื๊งเว๊ เฌ๊ โชะ ดี๊ อ จี้ เทว๊ เอะ กแช่ยาเว, เก จี้ เทะนี่ไท้ อ กแช่, อ นอ, ทอ้าทน้ะ ล กึทาง ดี๊ อ ซื๊งเว๊ แบ พี่ น ดว้ะ-อ้ะ นอ
เกม๊า น แม้นี่ จี้ ทเทะนี่ ล้างไท้ ซ้ะ ดี๊ โพล้ง อีซลาเอง, ดี๊ อางกี เจ่-อ้ะ ลู่ง ทแม้ แยว้ อ เท่อ ลู่ง เด้ทโอซยองอล่าง พ้า, บี่ซุ้ กแช่ยาเว ม นางแบทางไท้ โพล้ง อีซลาเอง ลู่ง น ซื๊งซีง เทะนี่ ล้างไท้ ซ้ะ อ ฌ่าง”
“เกม๊า น แม้ เอะ โพล้ง อีซลาเอง น๊างมู๊ง กเย่ อ แคว๊ เลาพะ นอ อเม้งอแซ เมะ โอ ชี่แอ ชี่แซย้ เล้, แม้-อ้ะ บี่ซุ้ดี๊ อ ซื๊งเว๊ อ ชื้อ ล ดองๆ, นอ ล้อ, แม้-อ้ะ อ เม้ง นอ ล ฆ๊างๆ, กุ้ อ แฌ้
“เกม๊า แม้ เอะ โพล้ง อีซลาเอง น๊างมู๊ง อ ไละ ทดว้ะนี่-อ้ะ เลาพะ พี่ อ โญะ โอ คี๊ง ชี๊ง เนง ทาง อ เช๊คู ล โค๊ นอ, แม้-อ้ะ บี่ซุ้ดี๊ อ ซื๊งเว๊ อชื้ออชะ ล ดองๆ, นอ, เมะเว๊ โพล้ง กุ้ อ แฌ้ ลู่ง โพล้ง อีซลาเอง อ ซุ้ อ แกล้, พี่ อ ม ดึ้ซึ้ เท่อ ซี นอ”
