10 ท่อง โพล้งเฌงพูฆ๊างพู กุ้ อ แฌ้, แด ทเอิง อ เทิง ช๊างล้าง อ ซ้ะ ลู่ง อ กแช่ อ เด้ อ ป้ะตู๊งไท้ะ พ๊า ฌี้ๆ, นอ, อ ซื๊งเว๊ ม เฌ้เทิงทาง โบงทางแบ้ทาง เท่อ โอ ลู่ง อ กแช่ อ เด้ อ ป้ะตู๊งไท้ะ
ฌ้อง กจุ้แฆว้ แกยไท้ อ ซ้ะ, ดี๊ ชูฌี้ แบ โพล้ง อีซลาเอง น๊างมู๊ง เลาพะ, พี่ ล พ๊า แย๊ โพล้ง อีซลาเอง น๊างมู๊ง เลาพะ ชี๊เทิง อ แค๊ นอ
ฌ้อง ซาโลโม ลี้ ชี๊เทิง ลู่ง กแช่ยาเว อ ทลื่งล่าง อ เมะแย๊, ลู่ง โพล้ง อีซลาเอง น๊างมู๊ง เลาพะ นอ อ เมะแซ พ้า, ดี๊ เยาทาง อ จูง ลู่ง ทมุ้คู
กแช่ยาเว ลี้ฌ้า วี่ง อ ซื๊งเว๊ อ เกล้, ลู่ง มแช๊ แค๊ นอ ดี๊ ทเอิง อ เทิง, ลู่ง มแน้ แค๊ นอ ดี๊ มี อ เทิง, เกม๊า เว๊ ทพ้าง แบ-อ้ะ บี่ซุ้ ม ลี้ เท่อ ซี, เลา ดี๊ มแช๊ ดี๊ มแน้
กแช่ยาเว ไคล้ ลี้ง ดี๊ โมเซ คี๊ง แฌ้ นอ บี่ซุ้ดี๊ ซกุ้ ฌุ้พาง ก้างแก้ โละซ้ะ เท่อ, ฌ้อง โมเซ ไท้ ลู่ง ทล่างโอซยอง พ้า นอ ไวะ, แบเด้าะ นูง อ พูแคว๊ โยชูวา, พี่ อ เก โพล้ง แม้ แยว้ อ เท่อ นอ, อ น่างบางซ้ะบาง ได้ะ, อ เว๊ ล ไจทางไฆวะ ลู่ง เด้ พ้า นอ แบ
ท่อง โมเซ ลี้ นึฆ้าง เด้ พ้า เย้า นอ, ทเอิง อ เทิง เฌ๊ ดี้งล้าง ช๊างล้าง อ ซ้ะ ลู่ง เด้ อ เกล้ ป้ะตู๊งไท้ะ, ฌ้อง กแช่แยว้ ไคล้ ดี๊ โมเซ
ฌ้อง โพล้งเฌงพูฆ๊างพู นะ เว๊, พี่ อ แน่ฌ๊า เว๊ กแช่ยาเว เฌ๊ แคว่ซูง โพล้ง อีซลาเอง, ดี๊ แด อ ซื๊งเว๊ อ ทน้ะทโน๊ง นอ, อ ซื๊งเว๊ ไคล้ะล้าง อ คาง โบงทางแบ้ทาง เท่อ นอ ล้อ
แบ เด้าะ โพล้ง กิ้ นี่ ท อ ค๊อง ล แฌ้ นอ ชี๊เทิง ลู่ง อ ไย้, แคว่ ทาง ท มุ้คู ล เบิง แบ, แบ เด้าะ ท่าง ล้าง อ ซ้ะแน๊ ไจ้ะ เว๊ บี่ อี้ง, ‘กแช่ แยว้-เอ้อ, อวีงซ้ะชู้ ย๊างซ้ะ แบ แย้ ไช้ะ พี่ จ เก โพล้ง ท เด้บ้ะ อี้ง’
