5 เกม๊า ดึ้ซุ้ทาง เอะ อาโรง อ ไช๊ อ ช้าง, เมะเว๊ ไช๊พ้ะโท๊แย๊โค๊ลท๊า, ดี๊ ไช๊อคี่งพ้าลท๊า พี่ อ ชุ้ โละซ้ะ ดี๊ ไช๊อเบงคูลท๊า นอ, ไช๊อเบงคูลท๊า ดี๊ ตไก้ยะกล้ะทะซ้ะแน๊, ดี๊ จ้าทาง ไช๊อเบงคูลท๊า พี่ โพล้ง ทะ เว๊ ตกีงดีง นอ เมะ ค๊า
“เกม๊า โพล้ง อ จูง ซี แม้นี่ ท๊อง, ลูง เปย้า, ลูง ลึ้, ลูง โฌ้จีลี, ดี๊ ตไก้ยะ ลูง ไว้ะไก้ อ แย ฌี้ บี่ซุ้ดี๊ อ แม้ ไช๊อเบงคูลท๊า นอ, ไต้นี่ ตไก้ยะกล้ะทะซ้ะแน๊ ลู่ง ทอางฆื๊งนี่ กแช่แยว้ อ ซ้ะ
“เกม๊า น ไต้นี่ ไช๊อคี่งพ้าลท๊า, แม้-อ้ะ ดี๊ ลูง เปย้า น๊างเบง, เกม๊า อ ชุ้ โละซ้ะ ดี๊ ไช๊อเบงคูลท๊า นอ
“เกม๊า ท้ะนี่ ไช๊พ้ะโท๊แย๊โค๊ลท๊า, ดี๊ ตไก้ยะ ลู่ง อ แย ฌี้, ดี๊ คลื้งโมะ นอ, แม้-อ้ะ ดี๊ ตไก้ยะ ลูง ไว้ะไก้ อ แย ฌี้, ดี๊ ย่างเด้ง พลี้ง นอ, เกม๊า โพล้ง อ จูง ซี ช้ะกีงนี่ เว๊
อซื๊งเว๊ เฌ๊ฆ้าง เบ้า, โชะทางไฆวะ เว๊ อ จู, ดี๊ อ ไช๊แค่, ลี้ อางกี เว๊ ลู่ง ทล่างโอซยอง อ ค๊องโค๊, บี่ซุ้ดี๊ โมเซ อางแบเลา เว๊ นอ ล้อ
