2 “โล้ เอะ โพล้ง อีซลาเอง นอ เกม๊า อ เฌ๊ โชะ ทฆ้าทโฆ่ เทว๊ เอะ แย้, แม้นี่ เท่อ ดี๊ โพล้ง พี่ อ แบซ้ะ เทว๊ เว๊ ลแพ นอ กุ้ แฌ้
ดี๊ กุ้ แฌ้ พี่ โอ วะ อฆูอฆ้อง นอ, นี่ แม้ช้า-อ้ะ ดี๊ ทฆ้าทโฆ่ พี่ เก จี้, ดี๊ ท๊อง, ดี๊ ทฆ้าทโฆ่, ดี๊ ทพูแฆ่ ลื่งโด้ง, ดี๊ ท พี่ อลื่งดูฆวี้แค้, ทเทว๊ พี่ ซ้ะ โอ ม เทว๊-อ้ะ นอ โอเจ ได้ะ
เด้าคูล่างพ้า อคูอแน่ แบ ล แฌ้ๆ, ท่อง อ เฌ๊ ท้อง กแช่ยาเว อล่างโอ พ้า, ลู่ง โอ เยรูซเลง พ้า นอ, เทว๊ เท่อ ท๊อง อ ซ้ะ โอ ม เทว๊ เว๊ ลู่ง กแช่แยว้อล่างโอ อ ฌ่าง, บี่ซุ้ ม ไต้ทางไท้ กแช่แยว้อล่างโอ พี่ อ ล่างๆ
ท๊อง นอ อ ซื๊งเว๊ เทว๊ ทลื่งทาง เช้า ทพูแฆ่ น๊างดื้ง ครึๆ, เทว๊ ทลื่งทาง ลู่ง แล้ทางไท้ ล ซ๊าง ล นี้ง, ดี๊ ต๊าง กแช่ยาเว อ ทไฌ่ แม้มึอางอวีง ลแพ นอ อ แค๊ ล ว๊างๆ ดี๊ เทว๊ ทลื่งทาง ท๊อง ซ้ะ โอ แบซ้ะ เทว๊ เอะ กแช่ยาเว
ล พ๊า ฆ่าง ดี๊ จี้ ดี๊ ท๊อง เลาพะ, พี่ น ม อางฆื๊ง นี่-อ้ะ เฆ้ง เว่งดูคล้องโท๊ บาบีโลง พ้า, เลา ดี๊ ทเทว๊ พี่ โพล้งเฌงพูฆ๊างพู ดี๊ โพล้งลื่งเท่ออคู, อ ซ้ะ โอ ม เทว๊ เอะ อ กแช่แยว้อล่างโอ, พี่ โอ เยรูซเลง พ้า นอ
ดี๊ โพล้งเฌงพูฆ๊างพู นี่ ไจ้ะบลึ้ กเย่ โพล้ง, พี่ แบ อ ซ้ะ ลี้ โอ เยรูซเลง พ้า
โพล้ง ลชื้อฆ่าง ดี๊ แน้, ม เทว๊ล้างอซ้ะ เลาเซิงเลาซ้ะ ลู่ง นดู้งนยาง อ มื่งนี้ง พ้า, พี่ น ซุ้ ฆ้าโฆ่ ลู่ง อฌี้อแอว้ นอ ลู่ง ทพ้างทาง โฌ้โค๊ อ ฌู่โพ๊ง นอ ปช้างที๊ง ลู่ง น่างบางซ้ะบาง เก น เท่อ
กแช่ยาเว ไคล้ ดี๊ โมเซ ไจ้ะเว๊
ทเทว๊ พี่ น ม แม้นี่ ดี๊ อ ซื๊งเว๊ ลแพ นอ เมะเว๊ ท๊อง, จี้, ท่องบ้าง
เมะ โพล้ง อีซลาเอง อ ทชี๊งเชโป้ง, พี่ อ เฌ๊ เทว๊ เอะ กแช่ยาเว เก ทเทว๊ นอ, จ เกล๊าง เอะ โพล้ง เลวี เก อคองอแซย้, อกย้องบี่นอ, จ โล้ เอะ อซื๊งเว๊ บี่อี้ง, อ ซื๊งเว๊ ล นี่แบ คองแซย้ ลู่ง โพล้ง อีซลาเอง อ ซุ้ อ แกล้ พ้า แบ”
โพล้ง กุ้ อ แฌ้ แบ เกล๊าง บี่ ซุ้ อ ช๊องมอง เว๊ ลู่ง อ ซ้ะ พ้า นอ, แบ เกล๊าง ดี๊ อ ซ้ะ โพล๊, ล เมะ โพล้ง แคแน-อ้ะ แบ, อ ไฌ่ บี่ อี้ง กแช่ แยว้ เอ โพล้ง พี่ อ เกล๊าง เท่อ ดี๊ ท เซิง มึ ซ้ะ มึ
แย้ จ ซ้ะ โอ ล แพ้ ฆ่าง ดี๊ โพล้ง อีซลาเอง อ กดูกแซย่ พี่ อ ซ้ะ โอ ม แม้ เท่อ นอ ลู่ง โพล้งเฌงพูฆ๊างพู อ แกล้ เกม๊า อางปฆ้าทาง กแช่ยาเว
