4 น ซื๊ง แด แบ เท่อ พี่ จ แม้ เอะ โพล้ง อีไย้ะ นอ เย้า, ดี๊ พี่ จ โชะทางโท๊ น ซื๊ง ด้องซุ้ ดี๊ ไละ พ้ะดู อ ได้ะ, บี่ซุ้ เฌ๊ฌ้า น ซื๊ง เฌ๊ท้อง แย้
แบเด้าะ อ ซื๊งเว๊ ซีง ลแพ, พี่ โอคุ้แท๊ กแช่ยาเว นอ, ม นี่แบ ไฌ่แบ้ อ ซ๊าง ล้อ อ เว๊ ม ยู้งทาง ดี๊ ได้ะ บี่ซุ้ดี๊ ไละ พ้ะดู อ เว๊ ม ซยู๊ ดี๊ ล ล้างเพาล้างแช่ แบ อ เว๊ ม ไจ ดี๊ ท ล ไปว้ะ อ ซ้ะ แบ
ทน้ะ แบ กแช่แยว้ อ ซ้ะ, ลู่ง อ เว๊ อ ทน้ะทโน๊ง พ้า เลาพะ ฌ้อง ทมุ้คู พู พี่ โอ กแช่แยว้ อ เมะแซ พ้า นอ, แม้ช้า อ ซื๊งเว๊ เกม๊า อ พ้องพลิ้ กแช่แยว้ เทะนี่ไท้-อ้ะ ดี๊ อ ทเอทกวี้ง, ดี๊ อ ท ย๊างเซิงย๊างซ้ะ ล้อ กแช่แยว้ โชะทาง อ ซื๊งเว๊, ดี๊ ลี้ โชะ เว๊ ครึๆ, ลู่ง อไยะอเช้
พี่ อีซลาเอง พืงแซ ได้ะ นอ, ก เอ-อ้ะ ก กุ้นี่ ก พู ไจทางไฆวะ อีไย้ะ พ้า
บี่ซุ้ดี๊ ทเอิ้งล้าง พี่ ก แม้ -อ้ะ ดี๊ น ซื๊ง, พี่ น ซื๊ง ไจทางไฆวะ อีไย้ะ พ้า อู้ง ดี๊ กวีงกแล้ โอ ลู่ง น ซื๊ง อซุ้อแกล้ พ้า, ซ้ะเม ล ฌี้ เฆาะ
เฆ้อ กุ้ แฌ้ ก แพ่ โอ ล แฌ้ ล เมะ แบ-อ้า?, กแช่แยว้ ล แฌ้ นี่ ไต้ล้าง เฆ้อ ล เมะ แบ-อ้า?, ฌ้อง แบทเล้ ก แม้ กไบล้ะกแบล โละ ก ซ้ะ, ดึ้ เกม๊า ก พี๊งพู๊งลู่งแย๊อู้ง ลู่ง แย๊ อู้ง อ ทเอิ้งล้าง เก ทแบอ้า?
กแช่ยาเว น กแช่แยว้, พี่ อ ลี้ ลู่ง น เมะแซ พ้า นอ, อ เว๊ ม ดึ้ซึ้ เท่อ ลู่ง น ฌ่าง, ด้องซุ้ พี่ อ เว๊ แม้ เท่อ กุ้เม้ง ลู่ง น ซื๊ง ฌ่าง, ลู่ง ค่าง อีไย้ะ พ้า, ลู่ง น เมะแซ พ้า นอ ล้อ
ดี๊ ลู่ง แพะคูทเคแกล้ นอ พี่ น แด แบ กแช่ยาเว น กแช่แยว้, โชะทาง แน้, ด้องซุ้ แพ่ โชะ อ พู, ทึเกล้ทึพ้า, พี่ น ซื๊ง ลี้-อ้ะ นอ, ท้อง ลู่ง น ซื๊ง ซีง ลแพ, เฌ๊ ท้อง พี่ อี้ง ล้อ’
อ อี้ง นอ เก ทไคล้ ลู่ง ทเอิ้งล้าง พ้า, พี่ กแช่ยาเว อางแบเลา โมเซ, เกม๊า อ แม้ เว๊ ดี๊ โพล้ง อีซลาเอง, ลู่ง ค่าง โมอา พ้า, ทเอิ้งล้าง พี่ กแช่แยว้ แม้ เว๊ ดี๊-อ้ะ ลู่ง ทลู่ง โฮเร คู นอ, โอเจ ได้ะ
โมเซ กุ้นี่ กเย่ โพล้ง อีซลาเอง นอ เฌ๊, ดี๊ โล้ เอะ อ ซื๊งเว๊ บี่อี้ง, “น ซื๊ง ซีง ลแพ, แด แบ ท กุ้เม้ง ดี๊ น เมะ, พี่ กแช่ยาเว แม้ เว๊ ลู่ง ค่าง อีไย้ะ พ้า, แม้ เอะ ฟาโร ดี๊ อ เพล่ กดูกแซย่, ดี๊ อที๊งอค่าง เลาพะ
“แบเด้าะ เกม๊า ปโล่ ล้าง น ซ้ะ, ดี๊ แฌแซกต้าง นวีงนแล้ เมะ ฌี้, ไค๊ไก้ะ น ซื๊ง ม ซ้ะนาง เท่อ, พี่ น เมะคลี๊ง แด แบ-อ้ะ นอ, ดี๊ ไค๊ไก้ะ ท ลแพ นอ, ม ล้างแม่ไฆวะ ลู่ง น ซ้ะ พ้า เพล้า น ชู้, เกม๊า น ดึ้ ซีงแฌ๊ น พู ดี๊ น ลี้ง, ซีงแฌ๊ ทไฌ่ ลแพ อี้ง
น ซื๊ง แด แบ ท กุ้ อ เม้ง พี่ กแช่ยาเว น กแช่แยว้ แม้ เอะ โพล้งกุ้ชื้อกุ้ชะ ลแพ อี้ง ลู่ง น ซื๊ง ฌ่าง, เมะเว๊ กแช่ยาเว น กแช่แยว้ ดึ้ซึ้ เท่อ ลู่ง น ซื๊ง ฌ่าง
แบเด้าะ กมืง ล แฌ้ นอ นี่ แบ ไละ พ้ะดู อ ได้ะ พี่ ม ยู้ง ลี้ ก้ะ ลู่ง แพะคู ตเค แกล้, ท้อง อ ล่าง พี่ อ เว๊ ม แบ ท แฌแซ-อ้ะ ท้องบ้ะ ซ๊า เนง คึ
