36 ดี๊ กแช่ยาเว ดึ้ เกม๊า โพล้ง อีซลาเอง เก ทแบเมะล้างซ้ะ โพล้ง อีไย้ะ, โพล้ง อีไย้ะ เกล๊าง เอะ เว๊ อ เท่อ บี่ซุ้ดี๊ อ อางท่าง เว๊ นอ ล้อ, ทบี่นอ โพล้ง อีซลาเอง ลู่นี่ก้ะ โพล้ง อีไย้ะ อ เท่อ ล เม้ง แบ ล เม้ง นอ ล้อ
แบเด้าะ โพล้ง ล ชื้อ แย๊ พี่ อ เว๊ แม้ เอะ เว๊ อ เท่อ นอ, ก ม ต้ะเซ๊ง แม้เตาแม้แต๊-อ้ะ, ฌ้อง ลู่ง ไค๊, นชื้อนชะ ม ไจทางไฆวะ ดี๊ อคองอแซย้ แอฌี่งแอฌ้อง
แบเด้าะ กแช่ยาเว โอ ดี๊ โยซิ้ ดี๊ เนโพลทาง เอะ เว๊ ทเอทกวี้ง ลู่ง อเฌิ่งอค๊า, ดี๊ ดึ้ เกม๊า โพล้งคุ้พ้อง นอ, แบเมะล้างซ้ะ ดี๊-อ้ะ ล้อ
ดี๊ กุ้ แฌ้ พี่ โอ วะ อฆูอฆ้อง นอ, นี่ แม้ช้า-อ้ะ ดี๊ ทฆ้าทโฆ่ พี่ เก จี้, ดี๊ ท๊อง, ดี๊ ทฆ้าทโฆ่, ดี๊ ทพูแฆ่ ลื่งโด้ง, ดี๊ ท พี่ อลื่งดูฆวี้แค้, ทเทว๊ พี่ ซ้ะ โอ ม เทว๊-อ้ะ นอ โอเจ ได้ะ
ฌ้อง กแช่แยว้ ไจทางฌ้าไฆวะ อีซลาเอง, ลพ๊าฆ่าง ดี๊ จี๊, ดี๊ ท๊อง ดี๊ โพล้ง ลู่ง กแช่แยว้ อ ชื้อ นอ, ล โอ น่างแฌ้ แบ พี่ ทุ้พลุ้ทุ้เชง
ค๊องเนงอี้ง, เกม๊า น โล้ เอะ โพล้งเฌงพูฆ๊างพู, เลา ดี๊ อ มืง อ แคว๊, ม๊า อ อางท่างนี่ โพล้ง พี่ อ เด้า โอ เบ้า ลแพ นอ ทฆ้าทโฆ่, พี่ เก จี้, ดี๊ ท๊อง นอ”
กแช่ยาเว เกม๊า โพล้ง อีซลาเอง เก ท แบเมะล้างซ้ะ โพล้ง อีไย้ะ, แอเละ อ นอ ได้ะ, โมเซ ล แฌ้ อี้ง โพล้ง ทื๊งแบนะแบ เว๊ เต้ๆ, ลู่ง ค่าง อีไย้ะ พ้า, เลา ดี๊ กเย่ ฟาโร อ กดูกแซย่, ดี๊ โพล้งเฌงพูฆ๊างพู ทื๊งแบนะแบ เว๊ นอ ล้อ
พี่ กโพล้ง อเกล้อพ้า เก ทแบเมะล้างซ้ะ เอะ กแช่ยาเว นอ ทึเมะ อดีงอแด้ นอ, กแช่แยว้ ดึ้ เกม๊า เว๊ อฆู๊งอพุ้ ไท้ ดี๊-อ้ะ ซี ปะ
ดี๊ กแช่แยว้ เกม๊า กแคว๊ได้ะดีง อคูอแน่ แบ อ ซ้ะ, ดี๊ ย๊างซ้ะ ดานีเอง
อางปฆ้า ทาง กแช่ แยว้ อ เม้ง นอ ล้อ, โพล้ง ล ทื๊ง เท่อ แบ ล แพ นอ แคว่ โพล้ง ลู่ง อ ทื๊ง กแช่ เยซู นอ มึ กุ้ อ แฌ้ ปะ, กุ้ มื่ง นี้ง กแช่ เยซู เกม๊า โพล้ง พี่ อ เว๊ แม้ พ้อง พลิ้-อ้ะ ล แพ นอ, เฌ๊ โอ ซยอง แอ ทาง โฌ่ ทาง ล้อ
แม้ พ้อง ไฆวะ เว๊ ดี๊ ท น้ะ ท โน๊ง กุ้ อ เม้ง, พี่ โยซิ้ ลี้ กจุ้แฆว้ อีไย้ะ อ เมะแซ พ้า นอ, กแช่ แยว้ ดึ้ เกม๊า โยซิ้ โอ ดี๊ ท โกง ซี มอง แบ, ต้ะ กจุ้แฆว้ เฆว๊ อ ซ้ะ ดี๊ โยซิ้ ฌี้ มะ ล้อ, อางกี ล้าง โยซิ้ เก ทอดู ยู่แคว่ เอะ อ ที๊ง อ ค่าง อ เด้า อ ล่าง เลา ปะ ล้อ
