10 “ยี๊แด นอ, จ โอ ลู่ง ทลู่ง คู, ด้องซุ้ ลู่ง แย๊ ล พ๊า อู้ง, อ นี้ง ลี่งชี๊ง อ ซ๊าง ลี่งชี๊ง ล ว๊าง แย๊ นอ, กแช่ยาเว คุ้ช๊องแน แย้ ปะ, กแช่ยาเว ล แบ อ ซ้ะ แบ, พี่ ม แม้ เฌ๊ฌ้อง น ซื๊ง นอ
โมเซ ลี้ฆ้าง ลู่ง ทเอิง พ้า นอ, ดี๊ ลี้ทาง ลู่ง ทลู่ง คู, โมเซ โอ ทลู่ง คู นอ นี้ง ลี่ง ชี๊ง ซ๊าง ลี่ง ชี๊ง นอ ล้อ
ฌ้อง กแช่ยาเว เปลงไท้ อ ซ้ะ, ล แม้อ้าแม้ซ๊าง อ พู อ ลี้ง บี่ซุ้ดี๊ อ ไจ้ะเว๊ นอ ล้าแบ
กแช่ยาเว ไคล้ช๊า โมเซ ไจ้ะเว๊, “เท่อ พี่ น อางท่าง นอ จ ม แม้ เอะ แน้, เมะเว๊ น เก โพล้ง ลู่ง อ แบเมะล้างซ้ะ แย้ เย้า, ดี๊ จ ซีงแฌ๊ น เม้ง”
โมเซ ลี้ฆ้าง โอ กแช่ยาเว, โอ พี่ นอ นี้ง ลี่ง ชี๊ง ซ๊าง ลี่ง ชี๊ง, อ เว๊ ล อาง แบ มี้ โอ้ แบ ที๊ง แบ, อ เว๊ กวิ้ล้าง ทไคล้ ทเอิ้งล้าง ลู่ง โล่ง ปางเป คู นอ, เมะเว๊ ทอางแม้เลา อ เม้ง ล ชี๊ง
“อ เว๊ แม้ พ้อง พลิ้ โพล้ง อ แฌ้แพ ซี, แบ เด้าะ แม้ พ้อง พลิ้ อ กแช่ อ ซ้ะ ซี เอะ, อ เว๊ เมะ เก โพล้ง อีซลาเอง อ กจุ้แฆว้ เต้ๆ, นอ, เกม๊า อ ไจ ล้าง ไฆวะ เซง ป้างกิ้ ล้อง ค๊องเนงอี้ง, ฌ้อง ก ม ชู่ง ม นะ-อ้ะ ล้อ
กแช่ยาเว ไคล้ ดี๊ แย้ ไจ้ะเว๊, ‘เกม๊า น เฌ้เทิงทาง, ลี้ วี่ง โพล้งเฌงพูฆ๊างพู เด้าะ แดเทา, บี่ซุ้ อ ซื๊งเว๊ ซีง ลแพ, ม นึฆ้าง แม้นี่ก้ะ ที๊งล่างค่างพ้า, พี่ ก อืงล้าง เว้ เอะ อ ซื๊งเว๊ อ พี๊งชู้ พู๊งชู้ ลู่ง แย๊ อู้ง, ก ไจ้ะ ม เกล๊าง เอะ-อ้ะ นอ ล้อ’
“ยี๊แด, จ คะด้ะ ล้างซ้ะ แบ้ทาง เท่อ, ลู่ง กแช่ยาเว อ เมะแซ พ้า, อ นี้ง ลี่งชี๊ง, อ ซ๊าง ลี่งชี๊ง, อไฌ่บี่อี้ง, กแช่ยาเว ไจ้ะเว๊ ม แม้ ซี๊งทู่งอูงเล้งไฆวะ น ซื๊ง ซีง ลแพ ล้อ
