29 โอก้ะ ลู่ง ไค๊ ชี๊งคี๊ง แล้ เด้าะ, กจุ้แฆว้ ไจ ดุ้ ลู่ง บลาง อ คู ท้ะ ล คะ นอ ลู่ง บาบีโลง พ้า
กแช่ยาเว ไจ้ะเว๊, “จวีงจแล้ ล ดึ้ โละซ้ะ ดี๊ กโพล้ง แบ ล้างชู้ล้างแกย, เมะเว๊ กโพล้ง นอ, เก ที่ไพ้ะแย, อ มื่งนี้ง อช๊าอโท่ นอ, เมะเว๊ ล แย้ คี๊ง ชี๊ง เนง นอ ล้อ”
เมะเว๊ ท แม้เตาแม้แต๊ บี่ซุ้ดี๊ ท ต้ะเซ๊ง โพล้ง พี่ แม้ ทอ้าทซ๊าง นอ, ล กึทาง เพล เพล้าเด้า แบ, ทบี่นอ, กเย่ กโพล้ง อเซิงอซ้ะ เฌา แม้ ที่ ทอ้าทซ๊าง ล้อ
อ เว๊ แม้ เซ๊ พ้ะดู อ ลู่ง, ดี๊ ไคล้ ไจ้ะเว๊, ‘เคาไฆวะ เซง มื่งเทิง อี้ง, ดี๊ กล้างไฆวะ อ ได้, ดิ้ไฆวะ อ แล, ฌ้อง เกม๊า อ แซ ลีงแล่ไฆวะ อ ซ้ะ, เกม๊า ทพูแฆ่ เม้ง ไจแดไฆวะ อ มื่งเทิง เช๊ละ, ดี๊ เกม๊า ทู ยู้งแดไฆวะ อ ได้
จ กจุ้แฆว้-เอ้อ, อ อี้ง เมะเว๊ แน้ ล้อ, พี่ น เกทางเกโท๊, ดี๊ นชองนไคล๊, น ทดูทโท๊ นอ นี่ ดูทางโท๊ทาง ท้อง ทมุ้คู, ดี๊ น ท โพะคอง นอ ลี้ ท้อง มุ้คูทึ ฌางคูทึ ล้อ
ฌ้อง กจุ้แฆว้ ไจ้ะเว๊ บี่อี้ง, “อ อี้ง เก บาบีโลง ดู ทึ พี่ ก นี่ ไต้ทาง-อ้ะ ดี๊ กดู้งกยาง ลู่ง อดูอโท๊, เกม๊า อ เก ก ล่างโอล่างช๊อง, ดี๊ บี่ซุ้ เก กฆี๊งกแล้ ลู่ง อดูอโท๊ ล เมะ แบ-อ้า?”
อ นอ, เก โพล้ง พี่ อ ล ชู่ง ล นะ กแช่ แยว้ แบ, ลู่ง โนอา อ ชู้ แค๊ เย้า นอ, ล ว๊าง แย๊ พี่ โนอา ไต้ทาง กบ้าง ที๊ง พ้ะดู อู้งนอ, กแช่ แยว้ เอ้า อ ซ้ะ ล แม้ เตา แม้ แต๊ โพล้ง ได้ะ แบ, แบเด้าะ โพล้ง โอ แซย้ โคะ ล้อ, เมะ เว๊ โฆะ แฌ้ พี่ อ ทาง กบ้าง ที๊ง คู ฌ้อง พ้อง ไฆวะ ดี๊ ที๊ง
พี่ กแช่ แยว้ เอ้า อ ซ้ะ ไยะ เย้า นอ, เกม๊า น ซื๊ง แคว่-อ้ะ เก บี่ ซุ้ อ เว๊ อางกี ท อ ช๊า อ โท่, ลู่ง ม แม้ พ้อง พลิ้ น ซื๊ง, บี่ ซุ้ ก ด๊างพื่งวี่ เปาโล พี่ ก เอ-อ้ะ, อ เว๊ กวิ้ เอะ น ซื๊ง ไละ บี่ นอ เย้า ปะ, กวิ้ เว๊ ดี๊ ท โกง ท มอง พี่ กแช่ แยว้ เกล๊าง เอะ-อ้ะ นอ ล้อ
จ อางกี เอะ กมืง ล แฌ้ นอ อ ช๊า อ โท่ เกม๊า อ เปลง ไท้ อ ซ้ะ เย้า, แบเด้าะ อ เว๊ นอ ล แบ ซ้ะ เปลง ไท้ อ ซ้ะ ลู่ง อ ท แม้ กแม มืง กแม แคว๊ นอ แบ เฆาะ
