13 ฌ้อง น ซื๊ง แบ เอ้า ซ้ะ โละ ซ้ะ, โพล้ง เมะ แม้ ไพ้ะ แม้ แม แบ น ซื๊ง นอ ทื๊ง นี่ นะ นี่-อ้ะ ล ฌี้, บี่ ซุ้ ดี๊ กแช่ เยซู คริ้ ล ทื๊ง นี่ นะ นี่ น ท ไพ้ะ ท แม แบ ปะ ล้อ
กโพล้ง อ ทไพ่ทแซย๊ นอ, ดึ้ เกม๊า อ เว๊ ซ้ะทาง โกย้ ดี๊ ท แพล่ไฆวะ ทไพ้ะทแม นอ, เก ทฆี๊งทแล้ เอะ-อ้ะ ล้อ
เมะ ยี๊ แด จ โล้ เอะ น ซื๊ง ซีง บี่ อี้ง, เอ โพล้ง พี่ อ แช๊เมะ ไฌ๊ซ้ะ ดี๊ น ซื๊ง, ชูแพ เท่อ ลู่ง โพล้ง, พี่ อ แม้ น้ะ แม้ โน๊ง น ซื๊ง ล แพ นอ อ ฌ่าง
พี่ ก แม้ ไพ้ะ แบ แน้ นอ, ทื๊ง นี่ นะ นี่-อ้ะ ล ฌี้ บี่ ซุ้ ดี๊ โพล้ง แม้ ไพ้ะ แบ เฆ้อ นอ, ก ล ทื๊ง นี่ นะ นี่ แบ ปะ ล้อ
พี่ น ซื๊ง ชูแพ เท่อ อ โท้ นอ, ทื๊ง นี่ นะ นี่ โพล้ง พี่ อ แม้ ไพ้ะ แบ น ซื๊ง น่าง แฌ้ ล้า ล ฌี้, บี่ ซุ้ น แพ่ โอ ลู่ง มุ้คู นอ ล ทื๊ง นี่ นะ นี่ น ท ไพ้ะ ท แม ล้า แบ ปะ ล้อ”
พี่ ก แม้ ไพ้ะ แบ แน้ นอ ทื๊ง นี่ นะ นี่-อ้ะ ล ฌี้ เมะ เว๊ โพล้ง แม้ ไพ้ะ แบ เฆ้อ นอ, ก ล ทื๊ง นี่ นะ นี่-อ้ะ น่าง แฌ้ แบ ปะ ล้อ เกม๊า เต้ ก แบ ท ลองดุ้ ล ฌี้”
เมะ กแช่ เยซู นอ อางท่าง เท่อ บี่ อี้ง, “แพ่-เอ้อ, ทื๊ง นี่ นะ นี่-อ้ะ ล ฌี้, อ ซื๊ง เว๊ ล ซีงแฌ๊ แบ เมะ อ แม้ ท เม้ง เล้” ซึ้พู ตาง โละ อ ซ้ะ พี่ ม อางน้าง พ้ะ กแช่ เยซู อ ไช๊ อ ช้าง
ท บี่ นอ, เกม๊า น ซื๊ง ตองช้า ฮะช้า โละ ซ้ะ ดี๊ ท มึ ท พ้า, บี่ ซุ้ กแช่ เยซู คริ้ ตองช้า ฮะช้า น ซื๊ง, แม้ บี่ อี้ง เมะ เว๊ น แม้ ฆี๊ง แม้ แล้ กแช่ แยว้
พี่ น ซื๊ง ล ทื๊ง นี่ โพล้ง ลู่ง อ แม้ ไพ้ะ เท่อ นอ แบ, จ ล ทื๊ง นี่ โพล้ง ล แฌ้ นอ แบ ปะ, อ ไฌ่ บี่ อี้ง พี่ จ ล ทื๊ง นี่ โพล้ง อ ท ไพ้ะ แบ, (เมะ โอ ล เม้ง ล เม้ง พี่ จ ล แบ ทื๊ง นี่-อ้ะ แบ), จ ล ทื๊ง-อ้ะ แบ ลู่ง น ซื๊ง ฌ่าง ลู่ง กแช่ เยซู คริ้ อ เมะแซ พ้า
ก เก โพล้ง ฌี้ โพล้ง แอว้, โอ ดี๊ ท ซีงแฌ๊ แน่ฌ๊า, ท เอ้า เซิง เอ้า ซ้ะ, ท เซิง ช้า ซ้ะ ช้า, ก โอ ดี๊ วีง ฌี้ แล้ แอว้ ดี๊ ท เอ ท กวี้ง เต้ๆ
แบ แม้ช้า โละ ซ้ะ ลู่ง ท แก ท เฌ้ ล แฌ้ แบ ล แฌ้ อ ฌ่าง, เมะ แม้ บี่ นอ น ม แม้ โพะ กแช่ เยซู คริ้ อ ทอางแม้เลา อ ไค๊
เกม๊า น ซื๊ง ชาง ล้าง ซ้ะ โอ ดี๊ เซิง ฌี้ ซ้ะ ช้า, โอ โก้ง โอ คุ้ เท่อ, ดี๊ โอ โก้ง โละ ซ้ะ ลู่ง ท เอ ท กวี้ง
แบเด้าะ แบ โอ ดี๊ ท ย๊างเซิง ย๊างซ้ะ ดี๊ ท เซิงช้า ซ้ะช้า โละ ซ้ะ, ทื๊ง นี่ นะ นี่ โละ ซ้ะ ล ฌี้, บี่ ซุ้ กแช่ แยว้ ล ทื๊ง นี่ นะ นี่ น ซื๊ง แบ ปะ ลู่ง กแช่ เยซู คริ้ อ กย้อง นอ ล้อ
เกม๊า น ซื๊ง โอ ดี๊ ท เอ ท กวี้ง, บี่ ซุ้ กแช่ เยซู คริ้ เอ เฆ้อ ดี๊ ญ่อง ซี๊ง ล้าง อ ซ้ะ ลู่ง ก ฌ่าง, เก ท โบง ท แบ้ ดี๊ ท ลื่ง ทาง ลู่ง อ น๊าอวีง น๊าม๊า, พี่ กแช่ แยว้ เฆว๊ อ ซ้ะ
น ซื๊ง เก กแช่ แยว้ อ พู อ ลี้ง, อ เว๊ เอ น ซื๊ง กวี้ง น ซื๊ง ดี๊ อางลึ นี่ น ซื๊ง ม เก อ เท่อ แด เว๊ ท บี่ นอ, น ซื๊ง แบ โอ ดี๊ ท ย๊างเซิง ย๊างซ้ะ, ท เซิง ช้า ซ้ะ ช้า, ท ชาง ล้าง เซิง ชาง ล้าง ซ้ะ, ท เซิง ฌี้ ซ้ะ ช้า, ท เอ้า เซิง เอ้า ซ้ะ
อ ไฌ่ บี่ อี้ง, ลู่ง กแช่ แยว้ ต้ะเซ๊ง เท่อ โคะ นอ, อ เว๊ ล ย๊างซ้ะ แบ โพล้ง ลู่ง อ ท ย๊างซ้ะ ล โอ แบ นอ ล้อ, แบเด้าะ ท ย๊างซ้ะ นอ แม้ น้า แบ ท ต้ะเซ๊ง นอ ล้อ
กแช่ แยว้ กุ้ นี่ น ซื๊ง, เกม๊า น แม้ บี่ นอ, อ ไฌ่ บี่ อี้ง, กแช่ เยซู คริ้ โท่ง ท น้ะ ท โน๊ง ลู่ง น ซื๊ง ฌ่าง ปะ, เก ท อ ด้อง เอะ น ซื๊ง, บี่ ซุ้ น ซื๊ง ม ไย่ โพะ ก้ะ กแช่ เยซู อ คางล่าง
