6 กแช่ยาเว ไจ้ะเว๊ บี่อี้ง “ลู่ง อีซลาเอง อ ท ลือค๊างพะ พ๊าๆ, เย้า พ๊าๆ, เด้าะ อกย้องนอ ก ล ญ่อง ไบล้ะกแด้ไท้ ท แม้เตาแม้แต๊ แบ เป๊งนี่ อ ซื๊งเว๊ อางแช๊ โพล้งแบกแช่แยว้อซ้ะ แม้ จี้ ดี๊ อางแช๊ โพล้ง ลกู้งลล๊า, แม้ คางไพ้ะ ล กู่ง เฆาะ
กจุ้แฆว้ ค่าง อะซีเรีย พองนี่ โพล้ง อีซลาเอง, ลี้ ลู่ง อะซีเรีย พ้า, ลี้ อางกี เว๊ ลู่ง ทล่าง ฮาลา พ้า, ดี๊ ลู่ง ที๊ง กล้อง ฮาโบ ฆ้อง เว่ง โกซาง พ้า, ดี๊ ลู่ง โพล้ง มีดียา อ เว่ง พ้า ล จอง แบ ล จอง
เป๊งนี่ อ ซื๊งเว๊ ล คุ้ช๊องแน กแช่ยาเว อ กแช่แยว้ นอ อ ลู่ง แบ, แบเด้าะ แม้ ไพ้ะ แบ กแช่แยว้ อ ทเอิ้งล้าง, เมะเว๊ แม้ ไพ้ะ แบ ทกุ้ อ เม้ง, พี่ กแช่แยว้ อ เพล่ โมเซ อางแบเลา เว๊ นอ, ดี๊ อ ซื๊งเว๊ซีง ล ช๊องแน เว๊ แบ, ดี๊ ล แม้โพะ เว๊ อ ไค๊ แบ
บี่ซุ้ โฌ๊ไจไฆวะ โพล้ง ลกู้งลล๊า แบ, ไจแดไฆวะ ท อเกิ้งอแบ ดี๊ ตมละ นี่ โพล้ง เฆ้อ ก ชื้อ คูซยางแน่ยะ อฌ้องอเก บี่ซุ้ เกม๊า โพล้ง มืงเม๊ เกทาง ก้ะ อ ซื๊งเว๊ อ ท ลู่นี่ ก้ะ ดี๊ ดึ้ เกม๊า พูฆวี แพ่ เกทาง ก้ะ อ ฆ่อง
เมะเว๊ โพล้ง พี่ ซี๊งเคพ้ะเพิ่ง โพล้ง อ แฌ้แพ ดี๊ อ ทไคล้ ดี๊ อางกีล้าง ทดุ้ทเช ดุ้ โพล้ง พี่ อ ต้ะเซ๊ง เท่อ ลู่ง เว่ง อ ป้ะตู๊ง เลา ดี๊ ล เกม๊า ท อเกิ้งอแบ เอะ โพล้ง พี่ อ แบ ล แพ้ นอ, ดี๊ ทไคล้ พี่ อซูงอแซ ล โอ แบ
“อี้งเซ้อ, ก เยาฆ้าง จูงช่องดูง, เป๊งนี่ ลู่ง ท อ โพ๊ ลฌี้ลแอว้ แบ พี่ น นี่แบ-อ้ะ นอ, ดี๊ เป๊งนี่ ทซวีง พี่ อ โอ ลู่ง น ซื๊ง อซุ้อแกล้
ดี๊ พอง ไละพู พ้ะดุ้ เท่อ, แม้นี่ ก้ะ กพูกลี้ง, อ ซื๊งเว๊ แม้นี่ พืงแซ อ แคว๊, ลี้ อางแช๊ เว๊ ลู่ง ท ลี้ไจ เค๊เซ๊มืง โอ อ ฌ่าง, ดี๊ แม้แค้ พืงแซ อ มืง, บี่ซุ้ ลี้ ฆวี้ โอ้ ไซ้ะ อ ฌ่าง
น แม้นี่ โพล้ง ยูดา ดี๊ โพล้ง เยรูซเลง, ลี้ อางแช๊ เอะ โพล้ง กรี ลแพ นอ, บี่ซุ้ แญ่ไฆวะ อ ซื๊งเว๊ ไจ ไย้ไฆวะ ดี๊ อ ซื๊งเว๊ ซีง ลแพ อ ค่างช๊า
กเย่ โพล้ง พี่ ฆวี้ นี่-อ้ะ นอ, ไท้ แม้ซี๊งไฆวะ เว๊, ดี๊ อเตาอแต๊ ล แบ โอ แบ, ดี๊ เย่ โพล้ง พี่ อางแช๊-อ้ะ นอ, ไจ้ะเว๊, ‘อางปฆ้าทาง กแช่ยาเว, จ ทโอทช๊อง เย้า’, ดี๊ โพล้ง ลื่ง-อ้ะ นอ, ล ย๊างซ้ะ-อ้ะ แบ เฆาะ”
