27 ซึ้พู คุ้แคว่ เท่อ นอ โล้ เว๊ บี่อี้ง, “จ ช๊องมอง โพล้ง พี่ อ เฌ๊ ซยู๊ วี่ง ล แฌ้ นอ, ซยู๊ แบด้อง ซาโด อ พู อาฮีมาอ้ะ”, กจุ้แฆว้ ไจ้ะเว๊, “โพล้ง ล แฌ้ อี้ง นอ, เก โพล้ง ฌี้, อ เว๊ เฌ๊ ดี๊ ทโล้โค ลู่ง อ ฌี้”
ซึ้พู คุ้แคว่ เท่อ, แด โพล้ง แคว๊ ล แฌ้ เด้าะ, เฌ๊ ซยู๊, ฌ้อง ซึ้พู คุ้แคว่ เท่อ นอ, โล้จู้ล้าง เอะ โพล้งคุ้แคว่เกล้ป้ะตู๊ง นอ ไจ้ะเว๊, “แคว่เซ้อ, โพล้ง แคว๊ เฌ๊ ซยู๊ โอ ล แฌ้ เด้าะ”, กจุ้แฆว้ ไจ้ะเว๊, “อ เว๊ เฌ๊ โล้ โค เท่อ ปะ ล้อ”
พี่ โยอ้ะ ไคล้ ล คลึ้ ทึ ได้ะ แบ นอ, แคว่เซ้อ, โพล้งลื่งเท่ออคู อาบียาทา อ พู เมะเว๊ โยนาทาง นอ เฌ๊ ท้อง เมาะ, ดี๊ อาโดนียา ไคล้ทาง ไจ้ะเว๊, “เฌ๊ฆ้าง แดเทา, เมะเว๊ แน้ น เก โพล้ง ลู่ง อ ฌี้ น ม เฌ๊ โล้ ทโล้โค ลู่ง อ ฌี้ เย้า”
ซึ้พู โอ คุ้แคว่ เท่อ นอ โล้ เว๊ เด้าะ ไจ้ะเว๊, “อ เว๊ ลี้ ท้อง เย้า, แบเด้าะ ล เฌ๊ไท้ ไท้ แบ, ดี๊ โพล้ง เทา เลาะ กซี ดึ้ซึ้ เท่อ นอ, แบด้องซุ้ นีงชี อ พู เยฮู อ ท เทา เลาะ กซี ดึ้ซึ้ เท่อ, เมะเว๊ เทา เว๊ แบด้อง อพลื่งอมวี๊ง นอ ล้อ”
แน๊วะ เกม๊า ทเคลง ลู่ง ท เก้านี่ดิ้นี่ อ แค๊ บี่จะเล้ นอ โพล้งโล้คิ้ไคล้คิ้ เท่อ พี่ อโต้อล้อง ดี๊ โพล้ง พี่ เจ่ทาง-อ้ะ นอ, แม้มึแม้พ้า อ เซงคู อวีงอแล้ บี่นอ ล้อ
ทโล้โค พี่ อ ฌี้ เฌ๊นี่ลู่ง ทล่าง ไย้ นอ บี่ซุ้ดี๊ ที๊งเคลง พี่ เกล๊าง เอะ โพล้ง ซู๊โอ้ซ้ะ เว๊ นอ ล้อ
โพล้ง โล้โค เท่อ อ คาง พี่ โอ ทลู่ง คู นอ, อ ฌี้ เต้ๆ, ล้อ เมะเว๊ โพล้ง โล้โค เท่อ พี่ โล้ล้าง ทฆู๊งทพุ้ ดี๊ โพล้ง โล้โค เท่อ พี่ ล้าง ซ้ะอวีงซ้ะโทะ เลา ดี๊ โพล้ง โล้ล้าง ทพ้องทพลิ้ อ คาง ดี๊ โพล้ง พี่ โล้ เอะ ซีโยง ไจ้ะเว๊, “น กแช่แยว้ ยู่แคว่ เท่อ”
ดี๊ โพล้ง ม ลี้ โล้ ล้าง ท ฌี้ อ ไฌ่ ซี บี่ จะ เล้, โพล้ง เมะ ล โอ โซ๊ง-อ้ะ น่าง แฌ้ แบ, บี่ ซุ้ ไละ ฌี้ ไละ แอว้ โล้ เว้ เว๊ “ฌี้ เต้ๆ, ล้อ พี่ โพล้ง ม เฌ๊ โล้ ล้าง ท ฌี้ อ ไฌ่”
