25 ซาอู ดี๊ อ ซกุ้ ซีง อางฆื๊ง แคว่-อ้ะ, โพล้ง โล้ เอะ ดาเว, อ เว๊ ลี้ล้าง ลู่ง ไล๊ แกล้, ดี๊ โอ ลู่ง แพะคูทเคแกล้ มาโอง, ท่อง ซาอู ซีงแฌ๊ เว๊ นอ, ลี้ อางฆื๊ง ช่อง ดาเว, ลู่ง แพะคูทเคแกล้ มาโอง พ้า
อ เว๊ ไจ้ะเว๊ “กแช่ยาเว เก จ ไล๊, จ ทล่าง ทุ้กดื้งซ้ะ ลู่ง อเฌิ่งอค๊า, ดี๊ เก โพล้ง พี่ อ แม้พ้องพลิ้ แย้
ฌ้อง เซงซาง แม้ซี๊ง โพล้ง ลแพ นอ เก ทแม้ซี๊ง พ้ะดู ล พ๊า, อ เว๊ ลี้ล้าง โอ ลู่ง ไล๊ เช้า เอตาง พ้า
อ ซื๊งเว๊ เฌ้เทิงทาง ลี้ ลู่ง ซิ้ ลี้ วี่ง ซาอู แบเด้าะ ดาเว ดี๊ อ ซกุ้ นอ, โอ ลู่ง แพะคูทเคแกล้ มาโอง พ้า, ลู่ง อาราบา พ้า ลู่ง เยซิ้โมง อ เช๊ละ
ซาอู ลี้ ลู่ง ทลู่ง อ แพ้ล้อง ลแพ้ แด, ดาเว ดี๊ อ ซกุ้ โอ ลู่ง, ทลู่ง คู ลแพ้ แด เด้าะ, ดาเว ปชื่ง ไจคุ้ซูงแดไฆวะ ซาอู, เมะเว๊ ซาอู ดี๊ อ ซกุ้ เฌ๊ฆ้าง พ้องวะ เท่อ, เบ้า ดี๊ ดาเว ดี๊ อ ซกุ้ ซีงลแพ นอ, บี่ซุ้ ม พองนี่ เว๊
ซาอู ล ล้องช่อง ดาเว ล้าแบ, อ เว๊ เฌ๊ไท้ ลี้ ดึ้ซึ้ ดี๊ โพล้ง ฟีลีเตีย, โพล้ง กุ้ก้ะ ทล่าง ล จอง นอ อ เม้ง, ไล๊ พ้องไฆวะ ดี๊ ทอ้าทซ๊าง
