19 พี่ น โอ ท้อง ซ๊า นี้ง เย้า นอ, กี๊ตโฌ้ ล นี้ง นอ เกม๊า น ลี้ล้าง เมะ เพล, ลี้ ลู่ง ทล่าง พี่ น โอคุ้ซูง ลี้ง เท่อ, ลู่ง มื่ง นี้ง พี่ ทกึทาง อ ซ้ะ อี้ง, ดี๊ โอ-อ้ะ ลู่ง ไล๊ เอเซง ฌ๊างไท้ะ นอ
ซาอู โล้ เอะ อ พูแคว๊ โยนาทาง, ดี๊ กเย่ อ กดูกแซย่ ลแพ นอ เกม๊า แม้ซี๊งไฆวะ ดาเว, แบเด้าะ ซาอู อ พูแคว๊ โยนาทาง นอ เอ ดาเว เต้ๆ
ดี๊ โยนาทาง โล้ เอะ ดาเว ไจ้ะเว๊, “จ แพ่ ซาอู เฌา อางฆื๊ง เกล้ พี่ ม แม้ซี๊ง แน้, ทบี่นอ, ลู่ง โฌ้ โฆะ ปโล่ล้าง น ซ้ะ เมะ ฌี้, โอ-อ้ะ ลู่ง ท กดื้งกทะ พ้า, อางกีซูงล้าง น ซ้ะ
ฌ้อง โยนาทาง ไคล้ ดี๊ ดาเว ไจ้ะเว๊, “ลู่ง โฌ้ โฆะ นอ, เก มื่ง ทาง ซ๊าง ล นี้ง, ดี๊ โพล้ง ม แด เว๊ น ล โอ แบ, เมะเว๊ น ล่าง ชี๊น้าง ม โอโปล้
จ ม ค้ะ คลีง แช ซ๊า บ้อง ลี้ ลู่ง ทฆ้อง นอ, ด้องซุ้ จ ค้ะ เท่อ ล เม้ง
ทพ้างทาง โฌ้โค๊, โยนาทาง ลี้ ลู่ง ญ้าง พ้า ทเคแกล้, บี่ซุ้ ดี๊ อ พ้ะ เว้ โละซ้ะ ดี๊ ดาเว นอ, พืงแซ โอ ล แฌ้ ลี้ ดี๊-อ้ะ
ดาเว ไคล้ ดี๊ โยนาทาง ไจ้ะเว๊, “แคว่เซ้อ, ลู่ง โฌ้ โฆะ เก มื่ง ทาง ซ๊าง ล นี้ง แย้ จ แบ ชี๊น้าง อางซยอง เท่อ ดี๊ กจุ้แฆว้, แบเด้าะ เปล้ แย้ เกม๊า จ ลี้ โอคุ้ซูง ลู่ง ญ้าง พ้า ทเคแกล้, ท๊อง อ ท้อง ลู่ง กี๊ ตโฌ้ มื่งแฌล้าง โค๊
