26 ไละ ฌี้ ไละ แอว้ โล้ เว้ เว๊ “ฌางคู โคล๊ง คู ดี๊ ท กุ้ อ เม้ง เก กแช่ แยว้ อ เท่อ ล้อ”
โพล้งเล้, เด้าะ พี่ เกล๊าง เอะ เท่อ, ลู่ง จ ม แบ เกล๊าง แก ไท้-อ้ะ นอ? ทกุ้เม้ง พี่ โอ มุ้คู เช๊ละ เลาพะ นอ, เก จ เท่อ
ฌางคูโคล๊งคู, ดี๊ ทกุ้เม้งกุ้มยู๊ ลู่ง ฌางคูโคล๊งคู นอ, เก กแช่ยาเว อ เท่อ เลา ดี๊ ฌางคูคู, ดี๊ กเย่ โพล้ง พี่ โอ ฌางคูคู นอ
จ เมะ ซู๊อางซ้ะ เท่อ นอ, จ ล โล้ แน้ แบ เมะเว๊ ฌางคูโคล๊งคู, ดี๊ เท่อ กุ้เม้งกุ้มยู๊ พี่ โอ เว๊ อ พ้า นอ, เก จ เท่อ ล้อ
ทบี่นอ, น ซื๊ง เมะ ช๊องแน จ ลู่ง เต้ๆ, ดี๊ แฌแซ จ ทเอิ้งล้าง นอ, น ซื๊ง ม เก จ เท่อ ลู่ง อ ลื่งดูฆวี้แค้, พี่ จ อางลึนี่-อ้ะ ลู่ง โพล้ง กุ้ที๊งกุ้ค่าง อ แกล้ เมะเว๊ ที๊งล่างค่างพ้า เลาพะ นอ เก จ เท่อ ล้อ
โมเซ ไจ้ะเว๊, “ท่อง จ ไจทางแดไฆวะ เว่ง พ้า อี้ง เย้า นอ, จ ม เยาทาง จ จูง ดี๊ โล้แบ กแช่ยาเว, ฌ้อง ล๊าง ล เซ๊ ล้าแบ, ดี๊ มื่งแซ ล ล้างเทะ ล้าแบ, บี่ซุ้ น ม ซีงแฌ๊-อ้ะ, ฌางคูโคล๊งคู อี้ง นอ, เก กแช่ยาเว อ เท่อ ล้อ
แบเด้าะ โพล้ง เมะ โล้ แบ น ซื๊ง, “ทอาง ล แพ อี้ง ลื่ง ทาง แบ ท เค่ง ท ฌ้าง เย้า”, เมะ บี่ นอ อาง ล้า ล ฌี้, ล เมะ น ซื๊ง ท ช๊องมอง แบ, เมะ โพล้ง ล แฌ้ แย๊ อ โล้ เอะ น ซื๊ง อ ท ช๊องมอง ล้อ, แบ ท เล้, โพล้ง อ แฌ้แพ อ ท ช๊องมอง ม แม้ ไทะทะ แย้ ซี
แคว่เซ้อ, มุ้คู ดี๊ มุ้คู พี่ อ โท๊ ทึ, ฌางคูโคล๊งคู ดี๊ ทกุ้เม้ง พี่ โอ ฌางคูโคล๊งคู นอ, เก กแช่ยาเว น กแช่แยว้ อ เท่อ ล้อ
ท กุ้ อ เม้ง พี่ กแช่ แยว้ ไต้ ล้าง เว๊ นอ, เก ท อ ฌี้, โพล้ง เมะ ฮะ นี่-อ้ะ ลู่ง ท ไจ้ะ บลึ้ กแช่ แยว้ นอ, ล เกิ้ง ญ๊อง ไฆวะ-อ้ะ น่าง เม้ง แบ
โพล้ง พี่ อ ท โอ ท ช๊อง ลู่ง ฌางคู โคล๊ง คู อี้ง นอ, โล้ เอะ-อ้ะ เกม๊า อ อางกี โท๊ อ ซ้ะ ล ฌี้, ดี๊ มื้งแล่ คองแซย้ พี่ ล เฌิ่ง ล ค๊า แบ นอ ล ฌี้, แบเด้าะ มื้งแล่ เท่อ ลู่ง กแช่ แยว้ พี่ อ ซ้ะ โพล๊ ล แฌ้ นอ, อ เว๊ เกล๊าง เอะ ก เท่อ กุ้ อ เม้ง ลู่ง ก ม โอ มึ โอ พ้า
