21 ท่อง ดาเว เฌ๊ ลู่ง โอระนาง อ โอ นอ, โอระนาง แด ดาเว, ดี๊ ไจทางไฆวะ ทล่าง เพา บืง นอ อ พ้า, ไคล้ะล้าง อ คาง อ เมะ ท้องล้าง ฌางคู คู
ท่อง อซื๊งเว๊ เฌ๊ ท้อง ทล่าง เพาบืง ล จอง, ลู่ง อาท่า พ้า, พี่ โอเบ้า ดี๊ ที๊ง โจเด้ง กล้อง นอ, อซื๊งเว๊ ฌางล้างย้าล้าง, ดี๊ ฌาง น้ะ มะ, โยซิ้ มองแบม้ะแบ อ แพ่ อ นี้ง เนว๊ ชี๊ง ล้อ
โอระนาง แกยฆ้าง อ ซ้ะ แด ทมุ้คูพู, อ พูแคว๊ ลี่ง แฌ้ พี่ โอ ดี๊-อ้ะ นอ โอคุ้ซูงไฆวะ เฆาะ, เมะ โอระนาง นอ ไย่ล้างนี่ บืง ซาลี ได้ะ
ดาเว ไคล้ ดี๊ โอระนาง ไจ้ะเว๊, “เกม๊า ทล่าง เพา บืง นอ เอะ แย้ ไช้ะ, บี่ซุ้ จ ม ไต้ทางนี่ ทลื่งล่าง เทว๊ เอะ กแช่ยาเว พี่ นอ, จ ม เกม๊า แน้ อ ฆวี้ ท๊อง อ ชิ้ทาง นอ, บี่ซุ้ ทอ้าทน้ะ นอ ม เลาไฆวะแด โพล้งเฌงพูฆ๊างพู”
ดี๊ โอ ท่อง มีแล ลู่ง ทลื่งล่าง ดี้งทาง ลู่ง ทมุ้คู นอ, กแช่ยาเว อ ทมุ้คูพู นอ ลี้ทาง โพะ มีแล ลู่ง ทลื่งล่าง คู อ ไค๊ พี่ มาโนอา ดี๊ อ แม๊ คุ้แคว่ดุ้ เว๊ แค๊, ดี๊ อ ซื๊งเว๊ ซย๊องเท่งล้าง อ เมะ ฌางคู คู นอ ล้อ
ท่อง น่าง อาบีกายี แด ดาเว นอ, อ เว๊ ปชื่ง ไจล้างไฆวะ แลว้ คู, ซย๊องล้าง อ ซ้ะ ลู่ง ดาเว อ เมะแซ พ้า, อ เมะ ท้องล้าง ฌางคู คู
