11 ดี๊ ดาเว นอ, ล แบ อ ซ้ะ ดี๊ เท่อ พี่ กแช่ยาเว อ ทซ้ะทาง ซยุ้ทาง แบ อุ้ซา นอ แบ, โพล้ง กุ้ ทล่าง ล จอง นอ อ เม้ง, เปเรอุ้ซา ท้อง กุ้ มื่งนี้ง อี้ง ล้อ
ทบี่นอ, โพล้ง อีซลาเอง ล อาง ท อทองอแพล่ พี่ โอ กีงแก้ไท้ะ อ ช๊า นอ แบ, ท้อง ค๊องเนงอี้ง, เมะเว๊ กแช่แยว้ ต้องแบ ยาคุ้ อ กีงแก้ อ ช๊า อทองอแพล่ ลู่ง กีงแก้ไท้ะ นอ ล้อ
ล ทีง ฆ่าง นอ, กแช่ยาเว อ ทซ้ะทาง ซยุ้ทาง แบ อุ้ซา, ดี๊ กแช่แยว้ แม้ซี๊ง-อ้ะ พี่ นอ, เป๊งนี่ ลู่ง อ เว๊ อ ทไพ้ะทแม นอ ล้อ, อ เว๊ ซี๊ง ลู่ง กแช่แยว้ อ ไฮะ ฆ้อง นอ ล้อ
ล นี้ง แย๊ นอ ดาเว ซ้ะเม กแช่ยาเว, ดี๊ ไจ้ะเว๊, “กแช่ยาเว อ ไฮะ ม เฌ๊ ท้อง แย้ ซี บี่จะเล้?”
ดี๊ กแช่ยาเว อ ทซ้ะทาง ซยุ้ทาง แบ อุ้ซา, ดี๊ กแช่แยว้ แม้ซี๊ง-อ้ะ เฆาะ, เป๊งนี่ พี่ อ เว๊ เยาทาง อ จูง ต้องแบ ไฮะ นอ, ดี๊ อ เว๊ ซี๊ง พี่ นอ ลู่ง กแช่แยว้ อ เมะแซ พ้า
ดี๊ ล นี้ง แย๊ นอ ดาเว ยางแบซ้ะเม กแช่แยว้, ดาเว ไจ้ะเว๊, “จ ม แม้นี่ กแช่แยว้ อ ไฮะ ลี้ ท้อง จ โอ ซี บี่จะเล้?”
เมะเว๊ น ซื๊ง, ล นี่ ลี้ ยุ้ แบ ลู่ง อ วี่งคู ล พ๊า อู้ง แบ, อ กย้อง บี่นอ, กแช่ยาเว ก กแช่แยว้ อ ทซ้ะทาง ซยุ้ทาง แบ เฆ้อ, เมะเว๊ เฆ้อ ก ล อางฆื๊ง อางจ้ะ นี่ เท่อ ดี๊-อ้ะ, บี่ซุ้ดี๊ ทอางกีล้าง โอ นอ แบ
โอ ล เม้ง ได้ะ, โพล้งลื่งเท่ออคู พี่ อ เฌ๊ โอ กแช่ยาเว นอ, เกม๊า อ ซื๊งเว๊ อางกี ฌี้ ล้าง อ ซ้ะ เกม๊า อฌี้อแอว้, เมะ ล แม้ บี่นอ แบ นอ, ไค๊ไก้ะ กแช่ยาเว ม แม้เตาแม้แต๊-อ้ะ”
ดี๊ กแช่ยาเว ไจ้ะเว๊, “ท พี่ น ซ้ะทาง บี่อี้ง นอ, ฌี้ เย้า โบ่?”
แบเด้าะ กแช่แยว้ ไคล้ ดี๊ โยนา ไจ้ะเว๊, “พี่ น ซ้ะทาง ลู่ง กีงไทะ อกย้องนอ, ฌี้ เย้า โบ่?”, อ เว๊ ไจ้ะเว๊, “พี่ จ ซ้ะทาง ท้อง ลู่ง แบซ้ะ ซี๊ง อี้ง นอ ฌี้ เย้า, กแช่แยว้-เอ้อ”
ดี๊ กแช่แยว้ เคิงล้างบ้า-อ้ะ ลู่ง ทลู่ง คางไท้ะ, ลู่ง ค่าง โมอา พ้า, โอ กแท้ โละซ้ะ ดี๊ เบเปโอ, ท้อง ล นี้ง แย๊ อี้ง นอ, โพล้ง ล โอ ซีงแฌ๊ ทล่าง เคิงล้างบ้า อ จู น่างแฌ้ แบ ล้อ
โยชูวา แม้นี่ โล่ง ล ชี๊ง คี๊ง โพลง, ช๊างล้าง เว๊ ลู่ง ที๊ง โจเด้ง กล้อง อ ซ้ะเคิง พ้า, ฆ้าง ดี๊ โพล้งลื่งเท่ออคู พี่ ยุ้ ไฮะ ทเอิ้งล้าง อ คาง ล่าง นอ, โล่ง ลแพ นอ โอ พี่ นอ ท้อง ค๊องเนงอี้ง ได้ะ
