1 Yoane 4:6 - Wapongte Mic-Yowa Gbolicne

⁶ Nongileng Wapongtacni. Ilec ngic-ngigac Wapong ngagegaing, yenge nongileng yowa hedec kwelu ngagecaigaing. Aime monic ye Wapongtacni miyac, yedibac nongileng yowa mi ngagecaigac. Aibaba iwa hocne nongileng yowa noinele Asu nga asu kwesacine ngani-motodabelengte.

1 Yoane 4:6 교차 참조

Luka 10:22

“Mamacnedi wiyac sasawa neleme na yogo damongkelu gagabac. Aime monicti Madecte fungine nalic mi ngagegac, Mamacti sugu ngagegac. Ingucnehac monicti Mamacte fungine nalic mi ngagegac, Madecti sugu ye ngagegac. Ailu Madecti ngic-ngigac bawosaecebalu edalicebagac, yengi sugu Mamac ngagegaing.”

Yoane 10:16

“Ailu lamafocne gocne gagaing, yenge oda yagowacni miyac. Aime nani yenge mengocebabe yowa-malacne ngagedaingte. Aime nale lama habu biyac migabac, yengeholec taocebabe lama habu moniyang aibong yengele damong moniyang sugu nani aidacte.

Yoane 10:27

Lamafocne yenge nale yowa ngagecaigaing. Aime na ngageyelebe yenge balaibecnulu gagaing.

Yoane 10:3

Aime nule damongti yele ailu oda nuine nalic laliyedaicte. Laliyeme lama yenge yowa-malacine ngagebong, yeuctihac lama wacnginang wacebame kwesibong molickeyeleme yenge momoc lobeina haudaingte.

Yoane 13:20

Foinac, nani ngic me ngigac monic salebe kwesime monicti hefolegac, ye na hefolecnugac. Nga monic ye na hefolecnugac, ye Wapong na salecnuwec, ye momochac hefolegac, yogo noinebenang edocngebagabac.”

Yoane 14:17

Ailu ye yowa noinele Asu. Aime himongtowale ngic-ngigac yenge ye mi nganicaigaing. Ailu ye mi ngagegaingte nalic mi badaingte. Nga ngengibac ye ngagegaing, ye ngengele hewacka gacaigac, ailu kwelenginang hocne gadaicte.

Yoane 15:26

“Ngic-hewacngineng kwesidaicte, ye Mamactacni salengelebe kwesidaicte. Ailu yedi hocne yowa noinele Asu. Aime yedi kwesilu nale mime yegengkedaicte.

Yoane 16:13

Yowa noinele Asu wadaicte, yedibac bacngebalu yowa noina mengocngebame hikedaingte. Ailu ye yeicne kweleinele yowa mi midaicte. Ye Wapongtacni yowa ngagecaigac, yogo midaicte ailu pasi lobewa fikedaicte, yogolec momoc edocngebadaicte.

Yoane 18:37

Inguc mime Pailatdi miwec, “Foinac, ga ngictau monic, me?” Inguc mime Yesudi ameine bafaliyelu yanguc miwec, “Gagi nale ngictau monic migic. Oc, na fikelu yowa noinele bole balu yogolec mibasanang aiyelelu mibe yegengkenale himongtowa yagowa waiba. Aime ngic-ngigac monic ye yowa noine balaibelu gagac, yedi nale yowa ngagedaicte.”

Yoane 20:21

Aime Yesudi hatacmac yanguc edocebawec, “Kwele-mogung ngengela fana. Mamacnedi salecnume kwesilu gagabac. Aime nani ingucnehac ngenge salecngebagabac.”

Yoane 8:19

Inguc mime Farisaio yengi yanguc uwacnoibong, “Gale mamac ye wenuwa gagac?” Mibong Yesudi bafaliyelu yanguc edocebawec, “Ngenge na mi ngagecnugaing, ailu Mamacne inguchac mi ngagegaing. Ngenge na ngagecnudabongka midec, ibac Mamacne inguchac ngagedabong.”

Yoane 8:23

Inguc mibong yanguc edocebawec, “Ngenge dumeng himongkacni, nga nabac himongkacni miyac, na wilengkacni.

Roma 1:1

Na Poldi hibi yago kwelengkegabac. Na Kristo Yesule kwelec kwekwe ngic. Wapongti bawosaecnulu wacnume na salecebaicne bole balu yeicne Siduc Madicne mibe yegengkedaic.

Roma 11:8

Yengele yowa monic yanguc kwelengkeicne fagac, “Wapongti pasi bame yenge asungineng gung kwomocbenang fagac ingucne gaibong. Ailu dongenginengti wiyac monic mi nganiibong. Nga hedecnginengti wiyac monic mi ngageibong. Yenge ingucne gaibongti yakumac gagainghac.” (Yef 29:4; Yes 29:10)

1 Korin 14:37

Ngengelacni monicti yeicne yanguc ngagegac, “Na siduc-mimi ngic, ailu na Asule ngage-ngageholec gagabac.” Ye inguc ngagelu nani hibi kwelengkecaigabac, yogo ngani-ngagec ailu yogo Sugucnele ung-yowa, inguc biyac ngage-motodaic.

2 Korin 10:7

Aime monicti yanguc ngagedaicte, “Na Kristole ngic gagabac.” Ye yeuctihac inguc ngagepangkedaictewa, nonge Kristole ngic ye ingucnehac gagabeleng. Yogo inguchac yeuctihac ngagesidaic. Ngenge inguc ngagesibong, ye nga nonge aibabanonggengti ngengela fikelu yegengkedaic.

2 Tesalonika 1:8

Ye dac-ubilangineholecti kwesilu ngic Wapong mi ngagecaigaing, nga Sugucnenonggeng Yesule Siduc Madicnele yowa mi balaibecaigaing, yenge bikicnginengte ameine baduyeledaicte.

1 Timoti 4:1

Tili Asudi yowa yegena yanguc milu gagac, yakuc dameng moto-motoina ngic gocne yenge ngage-ngagesingngineng wickebong wadaicte. Ailu yenge aleng yengele yowa ngagebong, asu haicine monic-monic yengi kwesac-yowa aiyelelu bacebadaingte.

2 Pita 3:2

Wapongte siduc-mimile bingec, yenge wiyac lobewa fikenale yowa yogo biyachac kwelengkeibong. Aime Sugucne Asa-baba ngicnonggengti ung-yowa salecebaicne yeleme, yengi ngengela kwesilu yogo edocngebaibong. Aime yogo ngagebong fawecte hatacmac hole-gboliyengelegabac.

1 Yoane 4:1

Agofocne kwelenedi ngengele angac ngagegabac, siduc-mimi ngic kwesacine bocyacti himongtowa yagowa lolickelu gagaingte ailu, ngenge yowangineng sasawa mi ngagesingkedaing. Ngenge ngani-wosaec ailu yengele asu yogo Wapongtacni me miyac, yogo ngani-motodaing.

1 Yoane 4:4

Adu-madecfocne, ngenge Wapongtacni. I yangucte, ye ngengele kwelewa ngiyegac, yele tapilidi Kindololo fileine himongtowa yagowa gagac, yele tapili ewaligac. Ilec ailu ngenge siduc-mimi ngic kwesacine biyachac ewalicebalu gagaing.

1 Yoane 4:8

Wapongti kwele-angacka gagale fungine aigac. Ilec monic ye kweleina angac mi ngagelu aicaigac, ye Wapong mi ngagegac.

1 Yoane 5:19

Aime nongileng Wapongte adu-madecfocine gagabeleng, yogo ngage-motogabeleng. Aime himongtowa yago nga ngic-ngigac ngage-ngagesing mikac yenge Kindololo fileinele tapilile bagewa fagaing.

Yude 1:17

Agofocne kwelenedi ngengele angac ngagegabac, Sugucnenonggeng Yesu Kristole salecebaicne yenge wiyac fikenale esecne miibong, ngenge yowa yogo ngagesidaing.