Zefanias 1:5 - Manobo Western Bukidnon OT

⁵ Edezeetan ku zaan is menge ebpemenahik diyà te atep te valey zan su ed-azap dan te andew, bulan, wey menge vituen. Edezeetan ku is menge ed-azap wey nenangdù he ebpenilbi kayi te kedì piru nenangdù daan he ebpenilbi ziyà te ed-ezapen he si Molec.

Zefanias 1:5 교차 참조

1 Hadì 11:33

Ne iyan ibeeli ku kayi su ǥeina te mid-iniyuǥan e zin ne iyan din mid-azap si Ashtoret, kes bahi he ed-ezapen te menge Sidunhanen, si Kemosh kes ed-ezapen te menge Moabitanhen, wey si Molec, kes ed-ezapen te menge Amunihanen. Wazà sikandin medsunud te menge paaǥi ku wey wazà mebpengungubpaan te hustu ziyà te etuvangan ku. Wazà sikandin medtuman te menge sulunuzen wey menge suǥù ku; kenà sikandin iring te amey zin he si David.

1 Hadì 11:5

Mid-azap din si Ashtoret, kes vahi he ed-ezapen te menge Sidunhanen, wey si Molec, kes utew mezaat he ed-ezapen te menge Amunihanen.

1 Hadì 18:21

Mid-uvey si Elias diyà te menge etew is migkaǥi te, “Sengemenu keluǥayad is kedsunud niw te zezuwa he tuluuwen? Emun iyan Megbevayà is Nengazen ne sunuza niw sikandin piru emun iyan Megbevayà si Baal ne iyan niw sunuza.” Piru wazà medtavak is menge etew.

2 Hadì 17:32

Ed-azap sikandan te Nengazen, piru iyan sikandan mibpilì te menge memumuhat he menge zuma zan mismu he ebpekepengulu kandan te kebpemuhat diyà te menge simbahan diyà te metikang he menge lugar.

2 Hadì 17:33

Ed-azap sikandan te Nengazen piru ed-azap daan sikandan te keugelingen dan he menge ed-ezapen sumalà te neleyaman te menge etew ziyà te menge nasyun he ebpuunan dan.

2 Hadì 17:41

Dutun te ked-ezapa zan te Nengazen, ed-ezapen dan daan is duma he menge ed-ezapen dan. Ne taman en guntaan iyan heini ebeelan te menge kevuwazan dan.

2 Hadì 23:12

Imperundus din daan is menge pemuhatà he mibeelan te menge hadì diyà te Juda ziyà te patag he atep he zivavew te ruǥu ni Ahaz; elin daan imperundus din is menge pemuhatà he mibpeveelan ni Manase ziyà te zezuwa he lama zuen te valey te Nengazen. Impevekbek din heini ne insimburè din diyà te zal-ug te Kidron.

Isaias 22:1

Heini he menge lalag ne mehitenged te suǥud-suǥud he zuen duen egkengelewasan: Hengkey is nehitavù. Maan is nemenahik kew is langun diyà te menge atep?

Isaias 44:5

Duen egkaǥi te, ‘Gaked a te Nengazen,’ ne is duma egkaǥi te, ‘Kevuwazan a ni Jacob.’ Duen daan idsurat dan diyà te menge velad dan is ngazan te Nengazen, ne ed-isipen dan is keugelingen dan he ragkes sikandan te menge Israilihanen.

Isaias 45:23

Nenangdù a pinaaǥi te keugelingen ku, ne egkeseriǥan is mibpengaǥi ku ne kenè en heini egkahalin: Edluhuzan a te langun he etew, ne ebpenangdù dan he ebpekid-uunungen sikandan kediey.

Isaias 48:1

“Pemineg kew is menge kevuwazan ni Jacob, he egngezanan te Israel, he ebpuun diyà te tribu ni Juda. Nenangdù kew pinaaǥi te ngazan te Nengazen, wey mid-umew niw is Megbevayà te Israel. Piru kenà heini ebpuun diyà te gehinawa niw, su kenè kew menge metazeng.

Jeremias 12:16

Emun ebpurungan dan ed-istudyuwi is menge paaǥi te kebpengungubpaan te menge etew ku ne edheǥeten dan is penangdù dan pinaaǥi te ngazan ku, iring te impenurù dan dengan te menge etew ku he kedheǥeta te penangdù pinaaǥi te ngazan ni Baal, egkehimu zan he kevahin te menge etew ku.

Jeremias 19:13

Uya, is langun he ubpeey ziyà te Jerusalem, ragkes en is turuǥan te menge hadì te Juda, ed-isipen he meremerik iring te Tofet. Diyà te atep kayi he menge valey, edtutung is menge etew te menge veyewà he para te ed-ezapen dan he menge vituen, wey ebpemuhat dan kayi te pemuhat he inumen he para te zuma he menge ed-ezapen.’ ”

Jeremias 32:29

Edselezan dan heini he inged ne ebinsulan. Elin daan ebinsulan dan is menge valey he zutun te atep dan edtutungen is beyewà para ki Baal. Ne zutun daan edhalad dan te idhalad he menge inumen para te zuma he menge ed-ezapen he utew ku ingkeepes.

Jeremias 4:2

ne ngazan ku zà is gemita nu emun edheǥeten nu is penangdù nu ne pengungubpaan ka he egkeseriǥan, hustu wey metazeng, ne egkehimu ka he tuvad te menge nasyun, ne ebeǥayan ke zan te zengeg.”

Jeremias 49:1

Iyan heini migkaǥi te Nengazen he mehitenged te menge Amunihanen: “Sikiyu is menge etew he ed-azap te ed-ezapen he si Molec, maan is mid-ubpaan niw is menge inged diyà te tanà ni Gad? Wazè be menge kevuwazan ni Israel he nekepengevilin kayi he tanà?

Jeremias 5:2

Iyan, minsan pa te edheǥeten niw is penangdù niw pinaaǥi te ngazan ku, edtarùtarù kew ǥihapun.”

Jeremias 5:7

Migkaǥi is Nengazen te, “Kenè ku en sikiyu ebpeseyluwen. Su minsan is menge anak niw midselikwey kedì, wey emun edheǥeten dan is penangdù dan, ngazan te tarù he megbevayà is egemiten dan. Imbeǥey ku kandan is menge kinahanglan dan piru nekehimu zan gihapun he ebpengumpadi, ne edhahasekhasek dan en diyà te valey te menge vahi he ebelegyà te zengeg dan.

Jeremias 7:10

Ne mid-uvey kew wey midhitindeg diyà te etuvangan ku kayi te valey ku, he mibpili ku he kayi a ebeǥayi te zengeg. Ne migkaǥi kew te, “Wazè kiw memenu.” Ne mibpedayun kew gihapun mebaal te utew mezaat he menge vaal.

Jeremias 7:9

Nenakew kew, nememunù, nengumpadi, nenangdù te tarù, midtutung te veyewà diyà te ki Baal, wey mid-azap kew te zuma he menge ed-ezapen he wazè niw ganì mekilala.

Jeremias 8:2

Ne ebpekepeyapat heini ziyà te tanà he egkesilaan te andew, bulan wey menge vituen he mibmahal zan, midsunud dan, midengepan dan, wey mid-azap dan. Kenè en edtiǥumen is menge tulan dan wey ikeleveng, kekenà, ebpekepeyapat dà heini ziyà te tanà he henduen be te menge tai.

Hoseas 10:2

Menge limbungan sikandan, ne ǥuntaan ereg sikandan he ebpekaantus tenged te menge salè dan. Ebengkaǥen te Nengazen is menge pemuhatè dan wey is tedeman he menge vatu.

Hoseas 4:15

“Menge tig-Israel, minsan mid-iniyuǥan a keniyu he iring kew te vahi he nengumpadi, ne kenè niw uwit-uwita is menge tig-Juda. “Ne sikiyu is menge tig-Juda, kenè kew medhendiyà te Gilgal wey Bet Aven te ked-azap kediey etawa kebpenaad pinaaǥi te ngazan ku.

Amos 5:26

Ne ǥuntaan edtulungan niw ed-uwita si Sakut, kes ed-ezapen he mid-isip niw he hadì niw, wey si Kaywan, kes ed-ezapen niw he vituen. Mibeelan niw heini he menge ledawan su ed-ezapen niw.

Deuteronomio 10:20

Tehuza niw is Nengazen he Megbevayè niw wey silbiyi niw sikandin. Kenè kew awà diyà te kandin ne ngazan din dà is gemita niw emun ebpenangdù kew.

Deuteronomio 4:19

Kinahanglan he kenè kew egke-iniyat he edsimba te egkengeehè niw ziyà te langit–andew, bulan wey menge vituen. Insavuk heini te Nengazen he Megbevayè niw he para te tivuuk he keet-etawan kayì te kelibutan.

Josue 23:7

Kenè kew pekidsevaha te menge etew ziyà te menge nasyun he kemulu zuma niw, kenè niw sempita is ngazan te menge ed-ezapen dan wey kenè kew penangdù pinaaǥi te kegemita te ngazan kayi. Kenè kew zaan med-azap wey mebpenilbi kandan.