Zefanias 1:18 - Manobo Western Bukidnon OT

¹⁸ Kenà ebpekelibri kandan is menge pelata zan wey menge vulawan dutun te andew te kebpeǥezama ku te pauk ku he iring te hapuy he ebpekeepur te tivuuk he tanà. Edtik-awan ku edezeeti is langun he ed-ubpà kayi he tanà.”

Zefanias 1:18 교차 참조

Genesis 6:7

Umbe ke sikandin te, “Edlumpiyuwan ku is kelibutan su edlimasen ku zutun is menge etew he linimbag ku. Edhimetayan ku is menge etew, menge langgam, menge keranapranap wey is menge tagbis he ziyà te hewhewanan, su deyzey pa pezem ke wazè ku sikandan limbaǥa.”

1 Hadì 14:22

Mibaal te salà diyà te etuvangan te Nengazen is menge etew ziyà te Juda, ne tuwas pa he zekelà is pauk te Nengazen kandan te pauk din te menge kepuun dan, su tuwas he zekelà is menge salè dan.

Job 21:30

he minsan is lalung he menge etew, egkelibri emun ebpekeuma is bangkit tenged te pauk te Megbevayà.

Job 3:15

Nekehimeley ad pezem duma te ebpemendumala he nepenù te vulawan wey pelata is menge valey zan.

Salmo 78:58

Midhimu zan he mepauk wey mebpengelikud kandan is Megbevayà pinaaǥi te kebangun dan te menge simbahan diyà te metikang he menge lugar wey te ked-azap dan te zuma he menge ed-ezapen.

Salmo 79:5

Keenu en buwa egkaawà, Nengazen, is pauk nu kenami? Taman en be te taman is pauk nu kenami? Eriyubriyub en be he iring te hapuy is kebpengelikud nu?

Erubasa 11:4

Kenà ebpulus diyà te kenikew is ketiǥeyunan emun iyan en kebpatey nu, iyan, is ketazeng mulà, ebpekelibri kenikew te kemetayen.

Erubasa 18:11

Is ketiǥeyunan te menge sepian, midtuuwan dan he iyan kutè dan he iring te metikang he verengbeng he nekeliǥuy te inged.

Isaias 1:24

Umbe, migkaǥi is Nengazen, he Mekeǥeǥehem he Megbevayà te Israel te, “Ebelesan ku sikiyu is menge tig-Jerusalem he menge kuntada ku, su wey kenà ad mesekiti tenged te menge vaal niw.

Isaias 10:17

Is Nengazen he iyan sulù te Israel wey waǥas he Megbevayè dan, egkeiring sikandin te edriyubriyub he hapuy. Ebinsulan din seled te meǥaan dà heini is duǥiyen he zezeisey he kayu he iyan is Asiria.

Isaias 10:3

Hengkey is ebeelan niw zutun te andew he edsilutan kew? Hengkey is ed-ul-ulahan niw emun ebpekeuma is kezeetan he ebpuun te meziyù? Hentei is ebuyuan niw te tavang? Wey hendei niw id-eles is ketiǥeyunan niw?

Jeremias 7:20

Ne iyan a, is Nengazen he Megbevayà, migkaǥi kayi: Ibpeǥezaman ku is utew ku kegkepauk kayi te lugar, ziyà te menge etew, ziyà te menge uyaǥen, diyà te menge kayu, wey menge abut te tanà. Is pauk ku iring te hapuy he kenà egkeevukan.”

Jeremias 7:34

Ibpeengked ku en is kegalew wey kedlipey ziyà te menge zalan te Jerusalem. Is melipayen he kegkaǥi te beuǥu kenè en egkezineg diyà te menge inged te Juda su egkehimu heini he mekevulungbulung.”

Jeremias 9:11

Su migkaǥi is Nengazen te, “Edezeetan ku is Jerusalem, ne egkehimu zà heini he ubpeey te leew he menge asu. Is menge inged diyà te Juda egkeiring te disirtu he wazà duen ed-ubpà.”

Ezekiel 16:38

Edsilutan ku sikew tenged te kebpenapew nu wey kebpenhimatey nu. Ne tenged te utew ku kegkepauk edhimetayan ku sikew.

Ezekiel 23:25

Tenged te utew ku kegkepeuki kenikew, ebpesilutan ku sikew kandan. Ne tenged te pauk dan edtinglasen dan is izung nu wey telinga nu. Ebihaǥen dan is menge anak nu, ne is egkesamà diyà te kenikew ebpenhimetayan dan te ispada etawa ebinsulan dan.

Ezekiel 7:11

Is utew zan kegkemesipala edlikù diyà te kandan he silut tenged te kelelalung dan. Wazà egkesamà kandan, ne egkahanew is langun he ketiǥeyunan dan.

Ezekiel 7:19

Ibpenimbag dan is menge pelata zan wey menge vulawan dan diyà te menge zalan he henduen be te meremerik he menge vutang. Kenà heini ebpekelibri kandan dutun te andew he ibpeehè ku is kegkepauk ku. Kenà heini ebpekahantey kandan su iyan heini hinungdan te kebaal zan te salà.

Ezekiel 7:5

“Iyan a, is Nengazen he MEGBEVAYÀ, migkaǥi te: Ebpekeuma is ebpekedtutundug he kezeetan.

Zefanias 1:11

Edsineǥew kew is ebpemen-ubpà diyà te alug he vahin te inged he Jerusalem su ebpemematey is langun he menge nigusyanti niw.

Zefanias 1:15

Keniyan he andew is kebpeǥezama te Megbevayà te pauk din. Andew haazà te kelised, kemeresayan, kezeetan, wey kepirdiyan. Merusirem wey ebpenggapun dutun he andew,

Zefanias 2:2

te kenè pa egkeuma is midtelaan he timpu te kedsegseǥa keniyu ziyà te meziyù he iring kew te menge ukap he idlayap. Iniyuǥi niw is mezaat te kenè pa egkeuma is timpu te utew kegkepauk te Nengazen.

Zefanias 3:8

“ ‘Umbe, sikiyu is menge metinumanen he menge tig-Jerusalem, teǥazi niw zà is kebpeheyaǥa ku te salà te menge nasyun. Su midisisyun ad he edtiǥumen ku is menge etew ziyà te menge nasyun wey menge ginhedian su wey ku ikepeǥezami kandan is utew ku kegkepauk he iring te hapuy he ebpekeepur te tivuuk he kelibutan.

Deuteronomio 31:17

Dutun he andew egkepeukan ku sikandan ne ed-engkezan ku sikandan. Ed-iniyuǥan ku sikandan ne egkengezeetan dan. Mahabet he menge kemeresayan wey menge kemereǥenan he ebpekeuma ziyà te kandan, ne zutun he timpu ebpekeinsè sikandan te, ‘Iyan be ingkeul-ulaha te menge kemereǥenan diyà te kenitew is tenged te wazè en mebpekiduma kenitew is Megbevayà?’