Zefanias 1:12 - Manobo Western Bukidnon OT

¹² “Dutun he timpu ebpurungan ku edsusiya is menge tig-Jerusalem ne edsilutan ku is menge etew he ebpeeyehey zà he egkaǥi ziyà te gehinawa zan, ‘Wazà ebeelan te Nengazen he meupiya etawa mezaat.’

Zefanias 1:12 교차 참조

Job 21:15

Hentei ke man is egngezanan he Mekeǥeǥehem? Maan is ereg ka he edsilbiyan dey? Ne hengkey is egkekuwa zey emun ed-ampù key ziyà te kenikew?’

Salmo 10:4

Tenged te kegkemepelevawen te menge lalung, ne kenè en sikandan ebpetavang kenikew. Kenè dan ed-isipen is mehitenged kenikew.

Salmo 14:1

Is menge tulebung, egkaǥi sikandan diyà te gehinawa zan te, “Wazà Megbevayà!” Pudu sikandan lalung ne utew mezaat is menge vaal zan. Wazà minsan sevaha kandan he ebaal te meupiya.

Salmo 94:7

Ke sikandan te, “Kenà egkaahà te Nengazen is menge vaal tew; kenè en heini edseǥipaan te Megbevayà ni Jacob.”

Isaias 5:19

Ed-undaunda kew pa he ke sikiyu te, “Egègaanen te Waǥas he Megbevayà te Israel is kedsilut din sumalà te migkaǥi zin he ebeelan din, su wey zey maahà. Deyzey ke egkehitavù en is pelanu zin su wey zey metueni heini.”

Jeremias 10:5

Heini he menge ed-ezapen iring dà te menge etew-etew he pelihandek te maya su kenà ebpekekaǥi. Kinahanglan he ebitbiten su kenà ebpekehipanew. Kenè niw ikahandek heini he menge ed-ezapen su kenà heini ebpekevaal te kezeetan wey keupiyaanan.”

Jeremias 48:11

Dezeyaan is ked-ubpà diyà te Moab puun pa te nehuna he timpu. Wazè keenu mevihag is menge etew kayi. Neiring heini te vinu he wazà welenga etawa wazà ihalin diyà te selakew en he teleǥuey. Umbe wazà mahalin is taam din wey ngazeg din.

Ezekiel 8:12

Ne migkaǥi is Megbevayà kayi te kedì te, “Sikew is etew, neehè nu en be ke hengkey is ebeelan he meeles te menge edumala te Israel? Diyà is kada sevaha kandan te ruǥu te ed-ezapen din, su ke sikandan te, ‘Kenè kiw egkaahà te Nengazen; inselikwey zin en is Israel.’ ”

Ezekiel 9:4

ne migkeǥiyan din te, “Liǥuya is Jerusalem ne merkahi nu is buked duen te ingkeseeng dan is utew mezaat he menge vaal he mibeelan diyà te seled te inged.”

Ezekiel 9:9

Midtavak sikandin kediey te, “Utew en subra is salà te menge etew te Israel wey Juda. Subre en is kebpehimhimetayà ne wazè en hustu he kukuman diyà te inged. Egkaǥi pa sikandan te kenà edtengteng is Nengazen kenitew, su inselikwey zin en is Israel!

Amos 6:1

Kehizu niw te menge pengulu ziyà te Zion wey Samaria, he ebpeeyehey zà he wazà igkeipeng. Mid-isip niw is keugelingen niw he dungganen he menge etew ziyà te lavew he nasyun, ne iyan kew edengepan te menge meǥinged diyà te keniyu.

Obadias 1:6

Ebpen-ahaan dan wey egkuwaan is menge ketiǥeyunan niw te menge kevuwazan ni Esau.

Malakias 2:17

Migkaǥi pa si Malakias te, “Neperahan en is Nengazen he ebpemineg te menge lalag niw. Ne ed-insè kew te, ‘Hengkey is mibeelan dey he iyan ingkeperahi te Nengazen te menge lalag dey?’ Migkaǥi kew te is langun he mibaal te mezaat ne meupiya is ked-ahaa kandan te Nengazen, ne nekepenunuat sikandan kandin. Migkaǥi kew pa te, ‘Hendei en buwa is Megbevayà he metazeng is kukuman din?’ ”