Zatù 4:21 - Manobo Western Bukidnon OT

²¹ Ne tenged te utew kegkeveley ni Sisera ne nehurep sikandin. Migkuwa si Jael te mertilyu wey palpal te tulda ne midnaney sikandin med-uvey ziyà te ki Sisera. Ne mibpelpalan din is titingkazan ni Sisera taman te midlambas diyà te tanà, ne minatey si Sisera.

Zatù 4:21 교차 참조

Salmo 3:7

Sigi en, Nengazen he Megbevayè ku, libriya a! Su zengan mibpeel-elezan nu is langun he kuntada ku he menge lalung; ne in-awè nu is gehem dan he iyan pezem kedezaat kedì.

Zatù 15:15

Ne nekaahà si Samson te tulan te bakà te asnu he veǥu pa he minatey. Migkuwa zin haazà ne migamit din te kedhimatey te 1,000 he menge Filistihanen.

Zatù 3:21

midhulavut ni Ehud te ǥivang he velad din sikan is ubpit he ziyà te kewanan he vuvun din, ne midsundang din diyà te getek haazà is hadì.

Zatù 3:31

Is nekesunud ki Ehud he pengulu iyan si Shamgar he anak ni Anat. Midlibri zin is Israel puun te menge Filistihanen. Menge 600 he menge Filistihanen is mibpenhimetayan din pinaaǥi te tuked he gelemiten te kedsegseg te vaka.

Zatù 4:20

Migkeǥiyan ni Sisera si Jael te, “Hithitindeg ke zà keniyan te ǥemawan te tulda ne emun duen ebpekeuma he ed-insà ke zuen duma he etew ne kaǥi ka te wazà.”

Zatù 4:22

Ne hein nekeuma si Barak is ebpen-ahà ki Sisera, midsinuǥung sikandin ni Jael ne migkeǥiyan din te, “Laus ka, su ibpeehè ku kenikew is etew he ebpen-ahaan nu.” Umbe miduma si Barak ki Jael ziyà te seled duen te tulda. Ne zutun neehè din si Sisera is nekehidhizeǥà he minatey en he midlembasan te palpal is titingkazan din.

Zatù 4:9

Midtavak si Debora te, “Uya, eduma a kenikew; iyan, kenà kenikew is dengeg su vahi is ebpengelinteuwan te Nengazen he ebpekezaag ki Sisera.” Ne miduma si Debora ki Barak ne midhendiyè dan te Kedesh.

1 Samuel 17:43

Migkeǥiyan din si David te, “Asu e ve he mid-uwitan nu te lagkut?” Ne midrewakan din si David pinaaǥi te ngazan te ed-ezapen din.