Zatù 2:19 - Manobo Western Bukidnon OT

¹⁹ Iyan, emun ebpatey en is pengulu zan, ne edlikuan dan en maan is daan he vaal zan wey edhuna pa is kandan he kebaal te salà te menge kepuun dan. Nenilbi zan wey mid-azap dan is duma he menge ed-ezapen ne wazè dan engkezi is mezaat he menge vaal wey is kebmesinupaken dan.

Zatù 2:19 교차 참조

Genesis 6:11

Naahà te Megbevayà he utew meremerik is menge ulaula te tivuuk he menusiyà wey utew kenà memetazeng is menge vaal zan.

Nehemias 9:28

“Piru emun ebmeupiyè en is kebpekesavuk dan ne ed-uman dan en maan ebaal te mezaat diyà te etuvangan nu. Ne ebey-anan nu sikandan diyà te ǥehem te menge kuntada zan su para meveyveyai sikandan. Ne emun ebuyù en maan sikandan te tavang diyà te kenikew, ne ebpemineǥen nu sikandan diyà te langit. Ne tenged te hizu nu kandan layun nu sikandan edlibriya.

Salmo 78:8

Ne kenà sikandan egkeiring te menge kepuun dan he menge supekiru, kenà menge metinumanen, kenà melig-en is kedsarig dan te Megbevayà, wey kenè dan mepezumdumahan kandin.

Exodus 32:7

Ne migkeǥiyan si Moises te Nengazen te, “Gègaani nu tupangi sikan is menge etew he mibpenguluwan nu te kegawas diyà te Ehipto su nekevaal zan te mezaat.

Jeremias 16:12

Ne sikiyu edhuna kew pa he lalung kenà te menge kepuun niw. Wazè kew mebpezumazuma kedì, kekenà, iyan niw mibpezumdumahan is kenà mepezumdumahan he mezaat he gehinawa niw.

Jeremias 23:17

Iyan heini layun egkeǥiyen dan diyà te menge etew he edsudì kedì wey ebpezumazuma te mesinupaken he ǥehinawa zan: ‘Egkehimu he utew meupiya is kebpekesavuk niw, migkaǥi is Nengazen. Wazà mezaat he egkehitavù keniyu.’

Jeremias 3:17

Dutun he timpu egngezanan niw is Jerusalem he ‘Pinuuwà te Nengazen te Kedhadì Din,’ ne is langun he menge etew ziyà te menge nasyun edtiǥum dan diyà te Jerusalem te kebayew te ngazan te Nengazen. Kenè dan en ebpezumdumahan is kegkemesinupaken te mezaat he ǥehinawa zan.

Ezekiel 20:30

“Ne ǥuntaan, keǥiyi nu is menge etew te Israel te siak, is Nengazen he MEGBEVAYÀ, migkaǥi a te, ‘Edremerikan niw ve zaan is keugelingen niw iring te mibeelan te menge kepuun niw, wey ed-azap kew ve zaan te utew mezaat he menge ed-ezapen?

Deuteronomio 31:29

Su netuenan ku he emun ebpatey ad, ne ebaal kew te mezaat ne edsuwayan niw is langun he idsuǥù ku keniyu. Dutun te huziyan he timpu ebpekeuma ziyà te keniyu is menge kemeresayan su ebaal kew te mezaat is ked-isipa te Nengazen duen ne edhimuwen niw he mepauk sikandin pinaaǥi te vaal niw.”

Josue 24:31

Nenilbi te Nengazen is menge Israilihanen dutun te kaazen pa ni Josue. Ne minsan te minatey en si Josue mibpedayun dan gihapun he ebpenilbi te Nengazen dutun te uuyag pa is ebpemendumala te menge Israilihanen he nengetau te langun he mibeelan te Nengazen para te Israel.

Zatù 10:13

Piru mid-iniyuǥan a ǥihapun keniyu su iyan niw mid-azap is duma he menge ed-ezapen. Umbe kenè ku en sikiyu edlibriyen guntaan.

Zatù 2:18

Is langun he menge pengulu he imbeǥey te Nengazen kandan ne midtevangan te Nengazen. Ne mintras uuyag pa is menge pengulu zan pedayun is kedlibriya kandan te Nengazen puun te menge kuntada zan. Su nehizuwan din sikandan dutun te kedag-es dan tenged te menge kemeresayan dan te kedèdaaǥa wey kebpesipelahi kandan.

Zatù 2:20

Umbe, utew sikandan nepeuki te Nengazen. Migkaǥi is Nengazen te, “Tenged te midrapas kayi te menge etew is midhimu ku ziyà te menge kepuun dan he kebpekid-uyun kandan, wey wazè e zan pezumdumahi,

Zatù 2:7

Nenilbi sikandan te Nengazen hein uuyag pa si Josue. Wey minsan hein minatey en si Josue mibpedayun gihapun sikandan he ebpenilbi te Nengazen dutun te uuyag pa sikan is ebpemendumala he nemekaahà te langun he egkein-inuwan he mibeelan te Nengazen para te Israel.

Zatù 4:1

Hein minatey en si Ehud, mid-uman en maan mebaal is menge Israilihanen te mezaat diyà te etuvangan te Nengazen.

Zatù 8:33

Ne wazè en meuǥet is kebpatey ni Gideon, ne mid-iniyuǥan en maan te menge Israilihanen is Megbevayà ne iyan dan en maan ed-ezapen is menge ledawan te ed-ezapen he si Baal. Midhimu zan si Baal Berit he megbevayè dan.

1 Samuel 15:23

Is kebpekidsukulà te Nengazen iring ded kezaat te kebpeveveyilan, ne is kegkemesinupaken iring ded kezaat te ked-azap te zuma he menge ed-ezapen. Geina te inselikwey nu is suǥù te Nengazen, idselikwey ke zin daan pinaaǥi te kegkeewaa kenikew he hadì.”