Ruth 4:15 - Manobo Western Bukidnon OT

¹⁵ Mahal ka ziyà te ǥehinawa te ambey nu ne minsan pa ke pitu pa is menge anak nu he maama kenà egkehimu he egkelevawan dan is tavang kenikew ni Ruth. Ne ǥuntaan pinaaǥi kandin mid-apù ke en. Pinaaǥi kayi te vatà meupiya zed is kebpekesavuk nu keuzemà ke ebmeǥurang ka su iyan ed-elima kenikew.”

Ruth 4:15 교차 참조

Genesis 45:11

Ne emun diyè en sikandin te Goshen, ne ed-elimahan ku sikandin su zuen pa lelima he tuig he vitil he ebpeebuten. Kenè ku egkesuatan he egkeumes sikandin wey is menge pemilya zin ragkes is menge uyaǥen din.”

Genesis 47:12

Ne is amey zin, is menge suled din, wey is langun he menge sakup te amey zin ragkes te menge vatà, ne midsupurtar ni Jose te egkeenen.

Salmo 55:22

Isarig nu ziyà te Nengazen is igkeseeng nu, ne edtevangan ke zin. Kenà egkehimu he ebpesegdanen din is menge metazeng te minsan hengkey he timpu.

Erubasa 18:24

Duen kebpeemiǥuwà he kenà egkeuǥet, iyan, duen daan kebpeemiǥuwà he edhuna pa te kedtelesuled.

Isaias 46:4

Minsan ebmeǥurang kew en wey ed-uvanen en, iyan a ed-atur keniyu. Midlimbag ku sikiyu ne ebentayan ku sikiyu. Edtevangan ku sikiyu wey edlibriyen.

Ruth 4:16

Layun egkuwaa ni Naomi haazà is batà su edsekepuwen din. Iyan sikandin ed-elima zuen te vatà.

1 Samuel 1:8

Migkeǥiyan ni Elkana sikandin te, “Maan is edsineǥew ka? Maan is kenè ka egkaan? Maan is layun ke zà egkeseeng? Kenè be mibmahal e pa kenikew kenà te sepulù he menge vatà?”

1 Samuel 2:5

Is egkengezeyzey zengan, ne ebpesuhul su wey zan meuyag. Ne is nengevitil zengan, guntaan nengehantey en sikandan. Kes wazà med-anak dengan guntaan mid-anak te mezakel. Ne sikan is mahabet is anak neeminan.