Ne hein nepasad ni Aaron haazà is langun, imbayew zin is menge velad din dutun te ked-ampù din para te menge etew. Ne mibpenaug sikandin puun duen te pemuhatà.
“Iyan heini sulunuzen he para te sevaha he Nazareo. Piru emun edsaad is sevaha he Nazareo he ebpemuhat sikandin diyà te Nengazen he ebpesubrahan din is ibpetuman kandin he penaad he egkehimu he Nazareo, kinahanglan he edtumanen din heini.”
Kinahanglan daan he edhendutun sikan is menge memumuhat he menge kevuwazan ni Levi, su mibpilì sikandan te Nengazen he Megbevayè niw he para ebpenilbi wey ebpenuvadtuvad pinaaǥi te ngazan te Nengazen, wey te kedhusey te langun he samuk.
