Numero 30:12 - Manobo Western Bukidnon OT

¹² Iyan, emun ebelavag is esawa zin dutun te kegketueni zin kayi, kenè en kinahanglan he edtumanen din heini. Ebpeseyluwen sikandin te Nengazen su mibelavag man kandin is esawa zin.

Numero 30:12 교차 참조

Jeremias 44:17

Ebeelan dey is langun he egkesuatan dey te ebaal: is kedtutung te veyewà he para te ed-ezapen dey he ‘Rayna te Langit’ wey is kedhalad diyà te kandin te pemuhat he inumen iring te mibeelan dey ziyà te menge inged diyà te Juda wey ziyà te menge zalan te Jerusalem. Ne iyan daan heini mibeelan te menge kepuun dey wey menge hadì dey wey menge upisyal. Dutun he timpu meupiya man is kebpekesavuk dey; dekelà is keenen dey wey wazà mezaat he nehitavù kenami.

Jeremias 44:19

Migkaǥi zaan is menge vahi te, “Kada timpu te kedtutung dey te veyewà he para te Rayna te Langit wey ke edhalad key te pemuhat he inumen para kandin, wey ke edhilutù key te supas para kandin he in-iring te zagwey zin, egketuenan heini te menge esawa zey.”

Numero 15:25

Ibpemuhat heini te memumuhat para mevelukasi is langun keniyu tenged te salè dan. Ebpeseyluwen ku sikandan su wazè dan man haazà tivevaa, wey mid-uwit man daan sikandan te pemuhat pinaaǥi te hapuy wey pemuhat he para idlumpiyu.

Numero 15:28

Ibpemuhat heini te memumuhat diyà te etuvangan ku su para mevelukasi haazà he etew tenged te salè din he wazè din tivevaa ne ebpeseyluwen ku sikandin.

Numero 30:11

ne mibpereremek dà is esawa zin dutun te kegketueni zin kayi su wazè din heini belevaǥi, kinahanglan he edtumanen dutun te vahi haazà.

Numero 30:13

Umbe, is maama, zuen din ketenged te kedtuǥut etawa kedwazà te minsan hengkey he impenaad etawa impenangdù te esawa zin.

Numero 30:5

Iyan, emun mibelevaǥan heini te amey zin dutun te kegketueni zin kayi, ne kenà kinahanglan he edtumanen din. Ebpeseyluwen sikandin te Nengazen emun kenè din edtumanen su mibelavag kandin is amey zin.

Numero 30:8

Piru emun ebelavag is esawa zin dutun te kegketueni zin duen, ne kenè en kinahanglan he edtumanen din haazà, minsan pa ke tekew en sikandin nenaad he wazè din mepurung meisip etawa nepurung din meisip-isip, ne ebpeseyluwen sikandin te Nengazen.

1 Samuel 1:23

Midtavak si Elkana te, “Beeli nu en ke hengkey is meupiya he egkesuatan nu. Kayi ke zà taman te egkelutas sikandin. Deyzey ke igkelipey te Nengazen is insaad nu kandin.” Ne mibpelintetaǥak si Hana is ed-etiman te anak din.