26 “Diyà te egkehuna he andew zutun te Pista te Kedraǥun, ne emun timpu en te kebpemuhat niw ziyà te Nengazen te veǥu he neraǥun niw he trigu, tiǥum kew te ked-azap te Nengazen ne kenè kew terebahu zutun he andew.
Dutun te egkehuna he andew tiǥum kew te ked-azap kedì ne umana niw heini ul-ulaha zutun te ikepitu he andew. Kinahanglan he wazà duma he terebahu niw seled dutun te pitu he andew, kekenà, iyan dà is kebaal te egkekaan te uman sevaha keniyu.
Silibraha niw zaan is Pista te Kedraǥun pinaaǥi te kedhelaza niw kayi te kediey te egkehuna he menge sebpet niw ziyà te menge bevesukè niw. Ne elin daan silibriha niw is Pista te Tevas emun egkezerengdeng niw en is menge sebpet niw zutun te kegketapus te tuig.
“Silibraha niw is Pista te Kedraǥun pinaaǥi te ked-uwit kayi te kediey te egkehuna he sebpet te trigu niw, wey silibraha niw zaan is Pista te Tevas emun egketapus en is tuig.
Seled te pitu he andew pemuhatà niw is Nengazen te pemuhat pinaaǥi te hapuy. Ne zutun te ikepitu he andew ne kenè kew en maan terebahu, kekenà, tiǥum kew te ked-azap te Nengazen.
Pemuhat kew te pemuhat he edtutungen: he dezuwa he turiti he vaka, sevaha he meǥurang en he meemahan he kerehidu wey pitu he meemahan he nati he kerehidu he tig senge-tuig is keǥurang dan. Is kehemut kayi he pemuhat ebpekepenunuat te Nengazen.
“Diyà te egkehuna he andew te ikepitu he vulan, tiǥum kew para te ked-azap te Nengazen, ne kenè kew terebahu. Iyan heini andew te kebpezaǥing niw te menge trumpita.
