Mid-uman megkaǥi si Balak diyà te ki Balaam te, “Hendini ka, su edumahan ku sikew ziyà te selakew en maan he lugar. Su kela ke zutun he lugar ebpezumezume en is Megbevayà he edrewakan nu is Israel para kedì.”
Migkaǥi si Balaam diyà te ki Balak te, “Peveeli a kayi te pitu he pemuhatà, ne endami a te pitu he tudu he vaka wey pitu he meemahan he kerehidu para kedì.”
Hein nepurung mesavut ni Balaam he egkesuat is Nengazen he penubtuvazi is Israel, wazè din en gemita is kebpeveveyilan din he iring te nehuna he vaal zin. Kekenà, midsinaru sikandin diyà te sibsivayan,
