Numero 20:12 - Manobo Western Bukidnon OT

¹² Piru migkaǥi is Nengazen diyà te ki Moises wey ki Aaron te, “Tenged te wazè kew medsarig kedì pinaaǥi te kebpaahà te kegkewaǥas ku ziyà te etuvangan te menge Israilihanen, kenè kew iyan ebpekepengulu te keduma kayi te menge etew pehendiyà te tanà he ibeǥey ku kandan.”

Numero 20:12 교차 참조

2 Cronica 20:20

Meselem dutun te sunud he andew, si Jehoshafat wey is menge sundaru zin, midhipanew zan pehendiyà te sibsivayan te Tekoa. Te kemulu pa sikandan edhipanew, midteren si Jehoshafat ne migkaǥi te, “Pemineǥa a keniyu, sikiyu is tig-Juda wey tig-Jerusalem! Tuu kew te Nengazen he Megbevayè niw, ne ebmelig-en kew. Tuuwi niw is menge ebpeneuven din ne ebmezeeǥen kew.”

Salmo 106:32

Ne hein diyè daan is menge Israilihanen te serebseb te Meriba, midhimu zan gihapun is igkepauk te Nengazen, ne utew ingkesemuki ni Moises is menge vaal zan.

Salmo 99:8

Nengazen he Megbevayè dey, midtavak nu is menge kebpengemuyù te menge etew nu. Impeehè nu kandan he mepeseyluwen ka he Megbevayà minsan midsilutan nu sikandan tenged te menge salè dan.

Isaias 8:13

Siak, is Nengazen he Mekeǥeǥehem, kinahanglan he egkilelaan a keniyu he waǥas. Iyan a ereg he egkehendekan niw.

Ezekiel 20:41

Emun egkekuwa ku en sikiyu puun diyà te nekedseselekawà menge nasyun he zutun kew mekepeyapat, edewaten ku sikiyu he iring te pemuhat he veyewà he mehemut. Pinaaǥi kayi te ebeelan ku ziyà te keniyu igkepeehè ku ziyà te keniyu is kegkewaǥas ku egkaahà heini te menge zuma he nasyun.

Ezekiel 36:23

Iyan a, is Nengazen he MEGBEVAYÀ, migkaǥi te ibpeehè ku ke sengemenu is kegkewaǥas te zengeg te ngazan ku ziyà te menge nasyun he zutun niw pendezeisaya heini. Ne egketuenan te menge etew keniyan he menge nasyun he iyan a Nengazen emun igkepeehè ku en kandan is kegkewaǥas ku pinaaǥi te ebeelan ku ziyà te keniyu.

Ezekiel 38:10

Mibpedayun megkaǥi is Nengazen he MEGBEVAYÀ te, “Dutun he timpu ebpelanu ka te mezaat.

Leviticus 10:3

Ne migkeǥiyan ni Moises si Aaron te, “Iyan heini ibpesavut te Nengazen hein migkaǥi sikandin te, ‘Kinahanglan he egkilelaan te menge memumuhat is kegkewaǥas ku, wey kinahanglan he ebeǥayan a te zengeg te langun he menge etew ku.’ ” Wazà meketavak si Aaron.

Numero 11:15

Emun iyan heini ebeelan nu kediey ne himetayi ad nasì kenikew ǥuntaan. Emun nekepenunuat a kenikew, ne kenà a kenikew vey-ani he egkerasey!”

Numero 20:24

“He Aaron, neume en is timpu he idtampu ke en diyà te menge kezuzumahi nu he nemematey en. Kenè ka ebpekeseled diyà te tanà he ibeǥey ku te menge Israilihanen su midsupak kew ki Moises te suǥù ku hein diyè kew te serebseb te Meriba.

Numero 27:14

Su hein nekidsukulà kedì is menge Israilihanen diyà te serebseb diyà te sibsivayan he Zin, midsupak niw ki Aaron is suǥù ku te kebpaahà te kegkewaǥas ku ziyà te menge etew.” (Heini he serebseb iyan is Meriba Kadesh he ziyà te sibsivayan he Zin.)

Deuteronomio 1:37

“Ne tenged keniyu, minsan siak, ne nepeukan a te Nengazen. Ke sikandin te, ‘Ne sikew zaan, Moises, ne kenè ka ebpekeseled dutun he tanà.

Deuteronomio 34:4

Ne zutun migkaǥi is Nengazen diyà te ki Moises te, “Iyan heeyan sikan is tanà he impenaad ku ziyà te ki Abraham, ki Isaac, wey ki Jacob, ne migkaǥi a ziyà te kandan te ibeǥey ku heeyan diyà te menge kevuwazan dan. Impeehè ku heeyan kenikew piru kenè ka mulà ebpekehengkeniyan.”

Deuteronomio 4:21

“Nepeukan a te Nengazen tenged keniyu, ne utew meheǥet is kegkeǥiyi zin kedì he kenà a ebpekelayun te Jordan ne kenà a ebpekeseled duen te meupiya he tanà he ibeǥey keniyu te Nengazen he Megbevayè niw.

Josue 1:2

“Minatey en is suluǥuen ku he si Moises. Umbe sikew wey is langun he menge Israilihanen, pengendami niw is kedlayun niw te Wahig he Jordan pehendiyà te tanà he ibeǥey ku keniyu.