Numero 19:13 - Manobo Western Bukidnon OT

¹³ Is minsan hentei he ebpekeǥawed te minatey he kenè din edlumpiyuwan is keugelingen din ne midremerikan din is Tulda te Nengazen. Kinahanglan he haazà he etew, kenà ed-isipen he sakup niw. Ne tenged te wazà sikandin mepiriki zuen te wahig he egemiten te kebpenlumpiyu, kenà egkaawà is kegkeremeriki kandin.

Numero 19:13 교차 참조

Exodus 30:33

Is minsan hentei keniyu he ebaal te iring kayi he lana he ibpenlana zin etawa idlana zin te zuma he etew zà duen su kenà memumuhat, ne kenè niw en sikandin isipa he zuma niw.”

Erubasa 14:32

Edezeetan te Megbevayà is menge mekesesalà tenged te mezat he ulaula zan, piru ebpengelangan din is metazeng minsan ke ebpatey, ne zuen din mulà egkeeputan.

Ezekiel 44:26

Emun ebpekesamsam dan te minatey, kinahanglan he mebpekelumpiyu sikandan wey medtaǥad dan te pitu he andew,

Leviticus 15:31

Migkeǥiyan te Nengazen si Moises wey si Aaron he kinahanglan he ebpekeventayan te menge Israilihanen is mehitenged te igkehimuwa kandan he meremerik, su wey zan kenà mebpatey emun edseled sikandan diyà te tulda te Nengazen he ziyà te teliwazà te kampu.

Leviticus 20:3

Egkeepesan ku heeyan he etew ne kenè niw en isipa he zuma niw, su zutun te kebpemuhata zin te anak din diyà te ki Molec, midremerikan din is lugar he zutun a keniyu ed-ezapa ne mibpendezeisey zin is ngazan ku. Emun ebey-anan niw zà haazà he etew,

Leviticus 22:3

Emun duen keniyu ǥuntaan etawa menge kevuwazan niw taman te huziyan he lapis te menge kevuwazan he edsamsam te pemuhat kayi te kedì, dutun te meremerik sikandin, kenè en egkehimu he ebpekepenilbi pinaaǥi te kegkememumuhat din. Iyan a kes Nengazen.

Leviticus 22:4

Wazà minsan hentei keniyu he egkehimu he egkaan te pemuhat, emun duen din daru te lundis, etawa zuen egawas diyà te sudiyè din tenged te zaru zin, etawa nekesamsam te azen he nehimu he meremerik su nekeseǥahid te minatey, etawa migewasan te similya, etawa nekesamsam te langgam, etawa etew he ed-isipen he meremerik. Wey zà sikandin egkehimu he egkaan te menge pemuhat emun ebpekepemeziǥù sikandin, piru medtaǥad pa sikandin taman te mahapun, dutun te edsanlep en is andew, ne egkehimu en human he egkaan sikandin te menge pemuhat he iyan keuyaǥan din su memumuhat man sikandin.

Leviticus 5:17

Emun nekerapas te suǥù te Nengazen is sevaha he etew he wazè din metueni, nekesalà sikandin, ne zuen din televaken diyà te Nengazen.

Leviticus 5:3

Emun nekeǥawed sikandin te meremerik he vutang te etew he wazè din metueni he igkehimu ves kandin he meremerik is kegkeveeli zin dutun, ebpekesalà sikandin dutun te timpu te kegketueni zin kayi.

Leviticus 5:6

Ne veyazi zin haazà is salà he neveelan din pinaaǥi te kebpemuhat din diyà te Nengazen te sevaha he vehiyan he kerehidu etawa kambing he pemuhat he para idlumpiyu. Iyan is memumuhat ebpemuhat kayi para mevelukasi sikandin te salè din.

Leviticus 7:20

Piru is minsan hentei he ed-isipen he meremerik he egkaan kayi te usa he para te Nengazen, ne heeyan he etew kenè niw en isipa he zuma niw.

Leviticus 7:21

Emun duen ebpezegkit dutun te minsan hengkey he ed-isipen he meremerik, iring te meremerik he menge vutang te etew, etawa meremerik he langgam, etawa minsan hengkey he meremerik, ne egkaan sikandin te usa kayi he pemuhat he para te Nengazen, ne heeyan he etew kenè niw en isipa he zuma niw.

Numero 15:30

“Piru sikan is midtivevà is kebaal zin te salà, Israilihanen man etawa kenà, ne midsumpalit e zin. Ne kinahanglan he kenè en sikandin egkilelaan he zuma niw.

Numero 19:14

“Iyan heini sulunuzen he edsunuzen emun duen ebpatey ziyà te sevaha he tulda: Is minsan hentei he edseled dutun te tulda etawa zutun en he zaan te tulda he mibpetayan, ed-isipen he meremerik seled te pitu he andew.

Numero 19:18

Ne is etew he ed-isipen he lumpiyu, ne megkuwa te senge rupung he isupu, ne ibpevudseng din heini zuen te wahig ne ipirik din diyà te tulda he mibpetayan wey ziyà te langun he gelemiten kayi, wey is menge etew zutun te tulda. Ebpirikan daan is etew he nekesamsam te tulan te minatey he etew, leveng, etawa minatey he etew he nevunù etawa minatey te netural he kemetayen.

Numero 19:19

Dutun te iketelu wey ikepitu he andew, ebpirikan te etew he ed-isipen he lumpiyu is etew he mid-isip he meremerik. Ne emun ikepitu he andew, haazà is etew he midlumpiyuwan kinahanglan he ebpemìpì te visti zin wey ebpemeziǥù, ne zutun te kegkesakep ed-isipen en sikandin he lumpiyu.

Numero 19:20

Iyan, emun kenà ebpenlumpiyu is etew he meremerik, ne kinahanglan he kenà sikandin ed-isipen he zuma niw su midremerikan din is Tulda te Nengazen. Su wazà sikandin mepiriki te wahig he egemiten te kedlumpiyu, meremerik sikandin.

Numero 19:9

“Is etew he ed-isipen he lumpiyu iyan megkuwa te igmuk duen te vaka, ne isavuk din haazà diyà te lugar he ed-isipen he lumpiyu, he ziyà te gawas te kampu. Ne edtipiǥan heini zutun su egemiten te menge Israilihanen he idsahug te wahig he egemiten te kebpenlumpiyu. Ebeelan heini he tulumanen su para maawà is salà.

Numero 8:7

Iyan heini veeli nu te kedlumpiyu kandan: Piriki nu sikandan te wahig he ǥelemiten te kedlumpiyu ne pekiskisi nu is tivuuk he lawa zan wey pepìpii nu is menge visti zan. Ne kegkepesad dutun ed-isipen en sikandan he lumpiyu.

Numero 9:13

“Piru is etew he lumpiyu wey wazà medhipanew ziyà te meziyù he wazà medsilibra te Pista te Kedlavey te Belinsuǥuen, heeyan he etew kinahanglan he kenè en egkilelaan he zuma niw, su wazà sikandin mebpemuhat te pemuhat he para te Nengazen dutun te midtelaan he timpu. Heeyan he etew egkerasey tenged te salè din.