Numero 16:5 - Manobo Western Bukidnon OT

^5-6 Ne migkeǥiyan din si Kora wey is langun he sumusunud kandin te, “Keeselem ke meselem ibpezayag te Nengazen ke hentei is tutuu he mibpilì din he ebpenilbi kandin pinaaǥi te kegkememumuhat, su ibpeuvey zin diyà te etuvangan din is mibpilì din. Umbe iyan heini veeli niw keeselem: Kuwa kew te teleǥuey te menge veyewà,

Numero 16:5 교차 참조

Salmo 105:26

Ne zutun midsuǥù din si Moises he suluǥuen din wey si Aaron he pinilì din.

Salmo 65:4

Deyzey is etew he mibpilì nu wey midhinggat nu he ziyà med-ubpà te valey nu. Diyà te valey nu he iyan kes segradu he ubpeey nu egkeveyangan key te meupiya he menge vutang.

Exodus 28:1

“Ipeviza nu puun te zuma he menge etew is suled nu he si Aaron wey sikan is menge anak din he ensi Nadab, Abihu, Eleazar, wey Itamar, su edhimuwen ku sikandan he menge memumuhat he ebpenilbi kedì.

Exodus 28:41

“Bistiyi nu kayi is suled nu he si Aaron wey sikan is menge anak din he maama. Ne ebpetiǥisan sikandan te lana tuus te kegkehimuwa kandan he memumuhat. Ne ipehinungud nu sikandan kediey su wey sikandan mekepenilbi kedì pinaaǥi te kebpemuhat.

Exodus 28:43

Emun edseled si Aaron wey sikan is menge anak din duen te Tulda he Edtelevukaayan, etawa ed-uvey zan duen te pemuhatà diyà te Segradu he Lugar su ebpemuhat sikandan, kinahanglan he egemiten dan heini su edhimetayan ku sikandan emun ibpeǥawaǥawa zan is pid-etawan dan. Heini he sulunuzen pehendiyè en te egkelapislapis he kevuwazan ni Aaron is kedtumana zan kayi.

Jeremias 30:21

Is pengulu zan, ne ziyè mismu ebpuun te kandan. Ibpeuvey ku sikandin kayi te kediey, ne ed-uvey sikandin. Su wazà etew he ebpeǥaruǥaru ed-uvey kayi te kedì emun kenè ku ibpeuvey. Iyan a, is Nengazen, is migkaǥi kayi.

Jeremias 49:19

Edtik-ew a edsurung diyà te Edom he iring a te erimaung he ebpuun te ketelunan diyà te Jordan he edhendiyà te menge kerehidu ziyà te penebtavà. Edsegseǥen ku sikandan ne iyan ku ibpezumala te Edom is etew he mibpilì ku. Hentei is iring kediey? Hentei is ebpeǥaruǥaru he edsukul kediey? Hentei is pengulu he ebpekigkuntada kedì?

Jeremias 50:44

“Edtik-ew a edsurung diyà te Babilonia he iring a te erimaung he ebpuun te ketelunan diyà te Jordan he edhendiyà te menge kerehidu ziyà te penebtavà. Edsegseǥen ku sikandan ne iyan ku ibpezumala te Babilonia is etew he mibpilì ku. Hentei is iring kediey? Hentei is ebpeǥaruǥaru he edsukul kediey? Hentei is pengulu he ebpekigkuntada kedì?

Ezekiel 40:46

Ne is ruǥu he ebpekesinaru ziyà te zizaya ne para te menge memumuhat he edumala te pemuhatà. Heini sikandan menge kevuwazan ni Zadok, ne iyan dà sikandan kevuwazan ni Levi he midtuǥutan te ked-uvey ziyà te etuvangan te Nengazen te ebpenilbi kandin.

Ezekiel 43:19

Is menge memumuhat he ebpenilbi kedì, he ebpuun te tribu ni Levi he menge kevuwazan ni Zadok, ebeǥayan te turiti he vaka he ibpemuhat dan he pemuhat he para idlumpiyu.

Leviticus 10:3

Ne migkeǥiyan ni Moises si Aaron te, “Iyan heini ibpesavut te Nengazen hein migkaǥi sikandin te, ‘Kinahanglan he egkilelaan te menge memumuhat is kegkewaǥas ku, wey kinahanglan he ebeǥayan a te zengeg te langun he menge etew ku.’ ” Wazà meketavak si Aaron.

Leviticus 8:2

“Ipehendiyè nu si Aaron wey sikan is menge anak din he maama te ǥemawan te Tulda he Edtelevukaayan, ne tiǥuma nu ziyà is langun he menge Israilihanen. Ipeuwit nu is menge visti he para te menge memumuhat, is lana he para te idlana, is tudu he vaka he pemuhat he para idlumpiyu, is dezuwa he meemahan he menge kerehidu, wey is revan he midteǥuan te menge supas he wazè din tapey.”

Malakias 3:18

Ne egkeuman niw en maan egkaahà is mibizahayan te metazeng wey lalung, is mibizahayan te ebpenilbi te Megbevayà wey kenà ebpenilbi kandin.”

Numero 16:3

Midsevaha sikandan medhendiyà te ki Moises wey ki Aaron, he ke sikandan te, “Subre en heini is ebeelan niw kenami! Maan is ibpelavew niw is keugelingen niw kayi te mahabet he menge etew te Nengazen he mibpilì man pezem te Nengazen is tivuuk he menge Israilihanen he ebpenilbi kandin ne ebpekiduma zaan sikandin kayi?”

Numero 17:5

Ne zutun ebpeneringsing is tuked te etew he ebpilien ku he ebpenilbi kedì pinaaǥi te kegkememumuhat ne pinaaǥi kayi egkeengked en is kedriklamu te menge Israilihanen ki Aaron wey kenikew.”

Numero 17:8

Ne hein nepawà, midseled si Moises duen te Tulda he midsevukan te Kesuǥuan. Ne neehè din is tuked ni Aaron he midriprisintar te tribu ni Levi, ne kenè dà te neneringsing heini, kekena, midtuvù, nengevukad, wey nemeǥas te almindru.

1 Samuel 2:28

Is langun he tribu te Israel, iyan ku mibpilì is pemilya zin he edhimuwen ku he menge memumuhat he ebpenilbi ziyà te pemuhatà, edtutung te veyewà, wey igkukumbalè dan is ipud diyà te etuvangan ku. Imbeǥey ku zaan is bahin duen te menge pemuhat pinaaǥi te hapuy he ibpemuhat te menge Israilihanen.