Numero 14:14 - Manobo Western Bukidnon OT

¹⁴ Emun edèdeetan nu heini is menge etew nu, edtudtulen dan heini ziyà te menge meǥinged te Canaan. Ne heini is menge Canaanhen, nezineg dan en daan he iyan ka is Nengazen nekiduma te menge Israilihanen he mibpaahà pinaaǥi te ǥapun he egiya kandan. Edhuna ka kandan emun maandew pinaaǥi te ǥapun he henduen te tukud, ne emun mezukilem pinaaǥi te hapuy he henduen daan te tukud.

Numero 14:14 교차 참조

Genesis 32:30

Migngezanan haazà ni Jacob he tanà te Peniel, he ke và dà egkeǥiya, “Neehè ku is dagwey te Megbevayà piru uuyag e zed.”

Nehemias 9:12

Emun maandew egiyahan nu sikandan pinaaǥi te mekepal he ǥapun he egkeiring te tukud, ne emun mezukilem pinaaǥi te regreg he egkeiring te tukud, su para meteyawi is ibayè dan.

Nehemias 9:19

Piru tenged te zekelà he hizu nu kandan, wazè nu sikandan bey-ani ziyà te sibsivayan. Wazè nu iawà sikan is mekepal he ǥapun he egiya kandan emun maandew, wey sikan is regreg he edtayew te edhipenawan dan emun mezukilem.

Salmo 105:39

Dutun te timpu te kedhipanew te menge tig-Israel, midsavuk is Megbevayà te ǥapun su para melembungi sikandan wey hapuy he ebpeketayew kandan emun mezukilem.

Salmo 78:14

Emun maandew, egiyahan din sikandan pinaaǥi te ǥapun, ne te mezukilem, ne pinaaǥi te kerayag te hapuy.

Exodus 15:14

Egkezineg heini te zuma he menge nasyun ne egkerkeren sikandan te kegkahandek. Utew egkeherati is menge Filistihanen.

Exodus 33:11

Ed-etuvangen en te Nengazen si Moises emun edlelaǥan din; iring sikandin te etew he ebpekidlalag te emiǥu zin. Ne ed-ulì si Moises diyà te kampu. Ne sikan mulà is menguhed he maama he timbang din he iyan si Josue he anak ni Nun, ne kenà mulà ed-awà duen te Tulda.

Exodus 33:16

Is kedumahi nu kenami iyan igketueni te zuma he menge etew he nekepenunuat kenikew is menge etew wey siaken. Is kebpekiduma nu kenami iyan ibpekeviza zey te zuma he menge etew kayi te tanà.”

Exodus 40:38

Sikan is gapun he simbulu he zutun is Nengazen he kenà ed-awà diyà te zivavew zuen te Tulda emun maandew, ne emun mezukilem duen dutun hapuy he ǥapun su para maahà heini te langun he Israilihanen dutun te kedhipanew zan.

Numero 10:34

Emun maandew, ziyà sikan is gapun te Nengazen te zivavew zan te edhipanew.

Numero 12:8

Emun ebpekidlalag a kandin, ne iring te ebpeetuvangè key su keladu is kebpekidlalag ku. Ne iring ded te neehè e zin. Piru minsan pa te iyan haazà wazè kew mahandek he egkaǥi te mezaat he ebpekesuǥat diyà te suluǥuen ku he si Moises?”

Deuteronomio 1:19

“Ne tenged te mandù kenitew te Nengazen he Megbevayè tew, mid-awè kiw ziyà te Horeb ne midhipanew tew is meluag wey mekahandekhandek he sibsivayan he neehè niw mismu, ne midhendiyè kiw te vuvungan he ed-ubpaan te menge Amorihanen. Ne hein nekeuma kiw ziyà te Kadesh Barnea,

Deuteronomio 34:10

Puun dutun wazè en ebpeneuven diyà te Israel he iring ki Moises te nepurung mekilala te Nengazen.

Deuteronomio 5:24

ne ke sikandan te, ‘Impaahà kenitew te Nengazen he Megbevayè tew is mekeǥeǥehem he kebpekiduma zin kenitew wey is dengeg din, ne nezineg tew is laǥeng din he ebpuun te hapuy. Ne neseksiyan tew ǥuntaan he egkeuyag ded bes is etew minsan ebpekidlalag kandin is Megbevayà.

Deuteronomio 5:4

Dutun te vuntud mibpekidlalag is Nengazen keniyu he ziyà ebpuun is laǥeng din te hapuy ne zutun henduen be te ziyè en sikandin te etuvangan niw.

Josue 5:1

Netudtulan is langun he menge hadì he menge Amorihanen he ziyà te zapit te edsenlepan te Jordan wey is langun he menge hadì he menge Canaanhen he ziyà te veyvey te Mediteraneo ke mibmenumenu te Nengazen is kebpemezahi zin te Wahig he Jordan hein midlayun is menge Israilihanen. Umbe nengahandek sikandan ne naawà is kevurut dan te kebpekidtebek te menge Israilihanen.