Nehemias 7:2 - Manobo Western Bukidnon OT

² Imbeǥey ku is ketengdanan te kedumala te Jerusalem diyà te suled ku he si Hanani, ne iyan duma zin si Hanania he peremandar te menge vantey te melig-en he kutà. Mibpilì ku si Hanania su egkeseriǥan sikandin wey zekelà is kedtahud din te Megbevayà lavew te kezekelan.

Nehemias 7:2 교차 참조

Genesis 42:18

Ne zutun te iketelu he andew migkeǥiyan sikandan ni Jose te, “Duen ebpeveelan ku keniyu wey kew melibri su siak, edtahud a te Megbevayà.

2 Samuel 23:3

Is Megbevayà he iyan is endilungà he vatu te Israel, migkaǥi sikandin kedì, ke sikandin te, ‘Is etew he metazeng is kedumala wey zuen din kegkehandek te Megbevayà,

1 Hadì 18:12

Hengkey ke ebpekeiniyug a ǥuntaan ne ed-uwiten ka te Mulin-ulin te Nengazen diyà te lugar he wazè ku metueni? Ne emun ebpekeuma kayi si Ahab he wazè ke en, ne edhimetayan e zin. Piru, datù, nenilbi a te Nengazen puun te menguhed e pa.

1 Hadì 18:3

Umbe, impetawag ni Ahab si Obadias he iyan edumala te turuǥan din. (Ne si Obadias, dekelà is kedtahud din te Nengazen.

Nehemias 1:2

Midhendiyà te kedì si Hanani is sevaha te menge suled ku; ebpuun sikandin diyà te Juda duma te nepipira he menge maama. Mid-insaan ku sikandan mehitenged te Jerusalem wey te menge Judio he vihag te Babilonia he nemenlikù diyà.

Nehemias 13:13

Is impezumala ku te menge budiga iyan si Shelemia he memumuhat, si Zadok he menunudlù te Kesuǥuan, wey si Pedaya he sevaha he Levihanen. Ne impeuǥup ku kandan si Hanan he anak ni Zacur wey apù ni Matania. Iyan sikandan mibpilì ku su egkeseriǥan sikandan. Insarig ku zaan kandan is kebpemeǥey te menge vahin te iring dan he ebpemenerebahu ziyà te valey te Nengazen.

Nehemias 2:8

Emun egkehimu beǥayi a zaan te surat he igkeveǥey ku ki Asaf, te ebantey te ketelunan nu, su para veǥayi e zin te menge kayu he egemiten te kebaal te pultahan te melig-en he kutà diyà te avey te valey te Nengazen, wey kebangun te verengbeng te inged, wey para te valey he ed-ubpaan ku.” Intuǥut te hadì haazà is menge hangyù ku su mibpurungan a te Megbevayà.

Nehemias 5:15

Piru is menge gubirnedur he nehuna kediey nehimu he peveǥat te menge etew, su kada andew ebuyù dan te egkekaan dan wey egkeinum dan he vinu wey 40 he vuuk he pelata. Minsan is menge upisyal zan mibpehimulus diyà te menge etew. Piru wazè ku mulà haazà beeli, su zuen ku kedtahud te Megbevayà.

Nehemias 7:3

Migkeǥiyan ku sikandin te, “Kenè niw pesegdana he ebirtu is menge pultahan te inged ke meudtu, minsan duen ebantey he menge vantey. Kinahanglan he edsirahan heini wey egkendeduwan. Ipevantey niw is menge vantey he meǥinged te Jerusalem. Is duma kandan diyè niw ipevantey te verengbeng te inged he uvey te menge valey zan, ne is duma pa ziyè niw ipevantey te zuma pa he menge vahin duen te verengbeng.”

Job 1:1

Duen etew he ed-ubpà diyà te tanà he Uz he iyan ngazan din si Job. Metazeng wey wazà igkesawey kandin. Edtahud sikandin te Megbevayà wey ebpeninguhà he kenà mekevaal te mezaat.

Salmo 101:6

Piru ibpeehè ku is keupiya ku ziyà te menge etew kayi te kenitew he menge metinumanen he edsunud te Megbevayà wey nengungubpaan he wazà igkesawey kandan. Ibpeubpè ku sikandan duma kedì ne edtuǥutan ku he ebpenilbi kedì.

Exodus 18:21

Iyan, pilì ka te metau he menge etew he ebpekeuǥup kenikew te kebpenhusey nu. Kinahanglan he metau sikandan he edhusey, edtahud te Megbevayà, egkeseriǥan, ne kenà edawat te sipsip. Himuwa sikandan he menge zatù te menge grupu te menge etew he tig-1,000, tig-100, tig-50 wey tig-10.

Daniel 6:4

Ne tenged dutun nesina sikan is dezuwa he zuma zin he menge administradur wey is menge gubirnedur ne mibpekeventayan dan si Daniel su wey zan maahà is sayep din te kedumala zin su wey zan sikandin ikesumbung. Piru wazà egkeehè dan he sayep su egkeseriǥan si Daniel ne meupiya is kedumala zin.

Numero 12:7

Piru kenà iring keniyan emun iyan ku edlelaǥan is suluǥuen ku he si Moises, he egkeseriǥan he pengulu te menge etew ku.