Nehemias 1:10 - Manobo Western Bukidnon OT

¹⁰ “Menge suluǥuen key kenikew wey menge etew nu he midlibri nu pinaaǥi te zekelà he ǥehem nu wey zesen nu.

Nehemias 1:10 교차 참조

Salmo 136:12

Impeǥawas din sikandan pinaaǥi te zekelà he ǥehem din. Wazà pidtemanan te ǥaǥew zin.

Salmo 74:2

He Megbevayà, tentenuzi nu is menge etew nu he mibpilì nu zengan para mehimu he kenikew ne midlibri nu para maangken nu en. Tentenuzi nu is Buvungan he Zion he ubpeey nu.

Salmo 89:14

Is kedhadì nu egkezumahan te ketazeng wey hustu he kukuman, wey egkezumahan daan te ǥaǥew wey kebmetinumanen.

Exodus 13:14

Dutun te huziyan he timpu, emun ed-insà is menge anak niw ke hengkey is ibpesavut dutun, ne ke sikiyu te, ‘Impeǥawas kiw te Nengazen puun diyà te Ehipto su midlibri kiw zin te kegkeuripena kenitew pinaaǥi te kegemita zin te ǥehem din.

Exodus 13:16

Heini he tulumanen, iring te patik diyà te velad wey vuked he kenà egkelipatan su layun egkaahà su pinaaǥi kayi kenà egkelipatan is kebpeǥewasa kenitew te Nengazen puun diyà te Ehipto pinaaǥi te kegamit din te ǥehem din.”

Exodus 13:3

Ne migkeǥiyan ni Moises is menge etew te, “Tentenuzi niw heini he andew is andew te kebpeǥewasa keniyu ziyà te Ehipto, he zutun kew mengeuripen, ne tenged te kebpeǥewasa zin keniyu zutun pinaaǥi te mekeǥeǥehem he velad din. Kenè kew kaan te edtepayan.

Exodus 13:9

Heini he pista, igkepetug-iring te patik diyà te menge velad niw etawa vuked niw he ebpetanudtanud keniyu he kinahanglan he edtudtulen niw is insuǥù te Nengazen su impeǥawas kew zin diyà te Ehipto pinaaǥi te ǥehem din.

Exodus 15:13

Tenged te hizu nu he ebpedayun, mibpenguluwan nu is menge etew he midlibri nu. Pinaaǥi te zesen nu, egiyahan nu sikandan pehendiyà te segradu he ubpeey nu.

Exodus 32:11

Iyan, midhangyù si Moises diyà te Nengazen he iyan Megbevayè din he ke sikandin te, “He Nengazen, maan is utew nu egkepeuki is menge etew nu he impeǥawas nu ziyà te Ehipto pinaaǥi te zekelà he ǥehem nu?

Exodus 6:1

Ne migkaǥi is Nengazen diyà te ki Moises te, “Egkeehè nu en human is ed-ul-ulahan ku ziyà te hadì te Ehipto. Pinaaǥi te ǥehem he ibpeehè ku, edtuǥut sikandin he mekeǥenat kew puun te nasyun din. Ne egketeǥel sikandin te kebpeǥenat keniyu.”

Exodus 6:6

Umbe, keǥiyi nu is menge Israilihanen: ‘Iyan a Nengazen. Ne ibpeǥawas ku sikiyu te kegkeuripena keniyu te menge Ehiptohanen. Pinaaǥi te ǥehem ku, ebpurungan ku edsiluti is menge Ehiptohanen, ne edlibriyen ku sikiyu.

Exodus 6:7

Ed-isipen ku sikiyu he menge etew ku ne iyan a egkehimu he Megbevayè niw. Ne egketuenan niw he siak is Nengazen he Megbevayè niw, iyan a mibpeǥawas keniyu puun te kegkeuripena keniyu te menge tig-Ehipto.

Isaias 64:9

Nengazen, kenè nu pesubrahi is kegkepeuki nu kenami; kenè nu tentenuzi taman te taman is menge salè dey. Edhangyù key ziyà te kenikew he seǥipaa key, su menge etew key kenikew is langun.

Deuteronomio 15:15

Tentenuzi niw he menge uripen kew zengan diyà te Ehipto ne impeǥawas kew te Nengazen he Megbevayè niw. Iyan heeyan hinungdan ke maan is ibeǥey ku heini keniyu he suǥù guntaan.

Deuteronomio 9:29

“ ‘Piru menge etew nu sikandan. Iyan sikandan menge etew he ǥaked nu ne impeǥawas nu puun te Ehipto pinaaǥi te zekelà he ǥehem nu.’