Nahum 2:11 - Manobo Western Bukidnon OT

^11-12 Is Nineve iring te surung he mid-ubpaan te senge paris he erimaung, wey menge anak dan. Kunaan dan ke wazà ebpekekaid kandan dutun te surung. Edhimetayan wey ebpitpitasen duen te meemahan he erimaung is egkezawi zin ne ibpemeǥey zin diyà te esawa zin wey menge anak dan. Ebpenuen din is surung din te sapù te egkezawi zin. Piru ǥuntaan, edezeetan en is Nineve.

Nahum 2:11 교차 참조

Genesis 49:9

Iring ka te nati he erimaung he ebpekaahà te edewiyen din, ne edlikù sikandin diyà te elesè din, ne ziyà sikandin edleku. Ne wazà minsan hentei he ebpekesamuk kandin.

Isaias 13:7

Dutun he timpu eguyaan is langun he menge velad. Egkaawà is kevurut te langun he menge etew.

Isaias 31:4

Iyan heini migkaǥi te Nengazen kayi te kedì, “Wazà ebpekeeǥen te erimaung te kedawi te edewiyen din minsan ebpengulahì pa is menge ebantey zutun te edewiyen. Ne iring daan kediey, wazà ebpekeeǥen kedì te kedipinsahi ku te Buvungan he Zion.

Isaias 5:29

Dutun te ked-surung dan ebpengulahì dan he iring te edhiniǥer he erimaung. Ne is egkebiktima zan, ed-uwiten dan diyà te meziyù ne wazà egkelibri kandan.

Jeremias 2:15

Is menge kuntada zin henduen be te erimaung he edhiniǥer ziyà te kandin. Mibpendezeetan dan is menge tanà kayi, wey mibpemengkag dan is menge inged duen, ne wazè en ed-ubpà duen.

Jeremias 4:7

Edsurung en is ebpendezaat te menge nasyun he henduen be te erimaung he migawas puun te elesè din. Migenat en sikandin puun te inged din su edezeetan din is tanè niw. Ebengkaǥen din is menge inged niw taman te kenè en egkehimu he ed-ubpaan.

Jeremias 50:17

“Is menge Israilihanen neiring te netazin he menge kerehidu he midal-as te menge erimaung. Hein aney, migkaan sikandan te hadì te Asiria, ne mid-ul-ulan is menge tulan dan te Babilonia.

Jeremias 50:44

“Edtik-ew a edsurung diyà te Babilonia he iring a te erimaung he ebpuun te ketelunan diyà te Jordan he edhendiyà te menge kerehidu ziyà te penebtavà. Edsegseǥen ku sikandan ne iyan ku ibpezumala te Babilonia is etew he mibpilì ku. Hentei is iring kediey? Hentei is ebpeǥaruǥaru he edsukul kediey? Hentei is pengulu he ebpekigkuntada kedì?

Ezekiel 32:2

“Sikew is etew, penhulùhulù ka mehitenged te Faraon he hadì te Ehipto. Ne keǥiya nu heini ziyà te kandin: Mid-isip nu he iring ka te erimaung he ibpedleleyunè din dà te edhipanew is menge nasyun. Piru iyan benar is iring ke zà te vuaya he ed-en-enunung diyà te wahig nu. Edsimbeǥen nu te paa nu is wahig ne egkeleveg heini.

Joel 2:6

Is menge etew he ebpekaahà kandan egkahandek ne ebmemeluntak.

Micas 5:6

Edaaǥen dan wey egkezumala zan is Asiria he tanà ni Nimrod, pinaaǥi te menge ǥumaan dan. Umbe edlibriyen kiw zan emun edsurung is menge tig-Asiria kayi te tanè tew.

Nahum 3:1

Mekerurunù is inged he Nineve, is inged te menge kriminal wey menge teruen. Mahabet is menge azen dan he tinavan dan, ne layun dan en duen ebiktimahan.

Zefanias 3:3

Is menge upisyal zan henduen be te edhiniǥer he erimaung. Is menge pengulu zan henduen be te zumezaas he asu, ne ebpen-ahà te egkezeesan din emun mezukilem, ne haazà ne ed-eminen din te edaas ne wazà egkesamà ke meselem.

Numero 23:24

Heini he menge etew iring te erimaung he andam he edawi ne kenà edhimeley taman te egkekaan din is ebiktimahan din wey egkesupsup din is lengesa kayi.”