Micas 6:8 - Manobo Western Bukidnon OT

⁸ Midtavak si Micas te, “Mibpenurù kiw en te Nengazen ke hengkey is meupiya. Ne iyan heini egkesuatan din he tumana tew: Ebeelan tew ke hengkey is metazeng, ibpelavi tew is kegkehizu te zuma, wey edsunud kiw te Megbevayè tew duma is kenà kebpelavew.”

Micas 6:8 교차 참조

Genesis 18:19

Mibpilì ku si Abraham su wey zin ikepenurù diyà te menge anak din wey menge kevuwazan din he med-ikul zan te ibayè ku te Nengazen pinaaǥi te ked-ul-ulaha zan te metazeng wey hustu. Pinaaǥi kayi, egketuman is menge pesarig ku kandin.”

Genesis 5:22

Ne puun dutun te ked-enaka ki Metusela, 300 pa he tuig is keluǥayad te untung ni Enoc, ne zuen duma pa zaan he menge anak din he vahi wey maama. Dutun he timpu utew meupiya is kedepità ni Enoc wey Megbevayà, umbe nekeuma te 365 is keluǥayad te untung din ne nahanew sikandin, su midtulus sikandin te Megbevayà.

2 Cronica 30:11

Piru zuen ebpemuun diyà te Asher, Manase, wey Zebulun he wazà mebpelavew ne midhendiyè dan mulà te Jerusalem.

2 Cronica 32:26

Ne mid-engkezan ni Hezekia wey te menge tig-Jerusalem is kebpelavew zan. Umbe wazà ipeseǥazi kandan te Nengazen is rimeǥas te pauk din dutun te uuyag pa si Hezekia.

2 Cronica 33:19

Is pengemuyù ni Manase wey is tavak te Nengazen kandin, ragkes en is langun he menge salè din wey menge kedsupak din te Nengazen, ne ingkesurat diyà te libru te menge ebpeneuven. Ingkelista zaan kayi is menge lugar he mibpehitindeǥan din te menge simbahan, te menge tukud he simbulu te vahi he ed-ezapen he si Ashera, wey is duma pa he menge ed-ezapen he mid-azap din dutun te kemulu pa sikandin ebpelavew ziyà te etuvangan te Megbevayà.

2 Cronica 33:23

Piru kenà sikandin iring te amey zin, su wazè din mulà ibpekevavà is keugelingen din diyà te etuvangan te Nengazen, kekenà, mid-umanan din pa is kebaal zin te salà.

2 Cronica 34:27

Mibpemineg ku is pengemuyù nu tenged te kedsendit nu wey kebpekevevaa nu te keugelingen nu ziyà te etuvangan ku hein nezineg nu is migkaǥi ku he ebpekesuǥat kayi he lugar wey te menge meǥinged kayi. Mibindas nu is kumbalè nu wey midsineǥew ka ziyà te etuvangan ku su nekedsendit ka. Umbe siak is Nengazen migkaǥi a te

Nehemias 9:13

“Puun te langit nenaug ka pehendiyà te Buntud he Sinai ne nekidlalag ka kandan. Mibeǥayan nu sikandan te hustu he menge penurù wey meupiya he menge suǥù wey menge sulunuzen.

Salmo 101:1

Nengazen, egkanta a mehitenged te ǥaǥew nu wey hustu he kukuman. Egkanta a te menge idalig kenikew.

Salmo 112:4

Minsan merusirem duen gihapun kerayag para te menge etew he hustu is paaǥi zan te kebpengungubpaan, kelelaǥan, hihizuwen, wey metazeng.

Salmo 112:9

Kelelaǥan sikandin diyà te menge pubri; is keupiya zin egketenuzan taman te taman ne ebeǥayan sikandin te Megbevayà te zengeg pinaaǥi te ked-umani te Megbevayà te egkehimu zin.

Salmo 37:26

Layun pa sikandan ebpekepememeǥey wey ebpekepesambey, ne is menge anak dan nehimu he tuvad diyà te zuma he menge etew.

Salmo 73:28

Piru mid-isip ku mulà he utew meupiya is ked-uvey ziyà te kenikew, Megbevayà. Nengazen he MEGBEVAYÀ, midhimu ku sikew he kutè ku, su wey ku ikeseysey is langun he menge vaal nu.

Erubasa 21:3

Lavew pa he igkesuat te Nengazen is ked-ulaula te etew te meupiya wey metazeng kenà is kebpemuhat din te menge ibpemuhat.

Megwewali 12:13

Ne ǥuntaan te nevasa nu en heini is langun, ne iyan heini penapus he egkeǥiyen ku kenikew: Tehuza nu is Megbevayà wey tumana nu is menge suǥù din, su iyan heini ketengdanan te kada etew.

Isaias 56:1

Iyan heini egkeǥiyen te Nengazen: “Ipeehè niw is hustu he kukuman wey veeli niw is metazeng, su kenè en egkeuǥet edlibriyen ku en sikiyu wey egkeehè niw is ketazeng ku.

Isaias 57:15

Iyan daan heini egkeǥiyen te Utew Lavew he Megbevayà, kes Waǥas he Megbevayà he wazà pidtemanan te untung din: “Diyà a ed-ubpà te metikang wey segradu he lugar, piru ed-ubpa a zaan duma te menge etew he kenà ebpelavew wey mid-iniyug te mezaat he ulaula su wey ku sikandan melig-eni.

Isaias 66:2

Kenè be iyan a mibaal te langun he menge vutang? “Siak, is Nengazen egkaǥi te: Edseǥipaan ku is menge etew he kenà ebpelavew wey ed-engked he ebaal te salà wey igkahandek dan is lalag ku.

Jeremias 22:16

Midlevanan din is ketenged te menge pubri wey egkengeey-eyuwan, umbe midlampus sikandin. Iyan heeyan hustu he paaǥi te kedtehuza kedì te Nengazen.

Jeremias 22:3

Migkaǥi is Nengazen te: Baal kew te hustu wey metazeng. Tevangi niw is menge mibpenekawan; libriya niw sikandan puun te gehem te midrasey kandan. Kenè niw dèdaaǥa wey pesipelahi is kenà menge Israilihanen, is menge ilu, wey is menge valu. Kenè kew zaan himatey te wazà mekesalà.

Jeremias 9:23

Migkaǥi pa is Nengazen te, “Kenà ereg he ibpahambug te uluwanen is ketau zin, wey is desen din emun mezesen sikandin, wey is ketiǥeyunan din emun sepian sikandin.

Penhulùhulù 3:26

Meupiya ke edtaǥad ki he mepelevayen te kedlibri te Nengazen kenita.

Ezekiel 16:63

Egketenuzan nu is menge salè nu ne egkeeled ka, ne kenè ke en ebpekekaǥi tenged te utew nu kegkeeled emun ebpeseyluwen ku en sikew tenged te langun he mibeelan nu. Iyan a, is Nengazen he MEGBEVAYÀ, is migkaǥi kayi.”

Ezekiel 33:14

Ne emun egkeǥiyan ku is lalung he etew he siguradu he ebpatey sikandin, piru mibpezumdumahan din is sambag kandin ne mid-engkezan din is mezaat he menge vaal zin ne mibaal te hustu wey metazeng–

Daniel 4:37

Umbe, ǥuntaan edeliǥen ku wey ebeǥayan ku te zengeg is hadì diyà te langit, su hustu wey metazeng is langun he menge vaal zin ne ibpekevavè din is minsan hentei he ebpelavew.”

Hoseas 12:6

“Umbe sikiyu is menge kevuwazan ni Jacob, likù kew en diyà te Megbevayè niw, ne ipeehè niw is kebmahal wey hustu he kukuman. Ne pedayun kew sarig te Megbevayè niw.”

Hoseas 6:6

Su kenè ku iyan egkesuatan is menge pemuhat niw, kekenà, iyan is kebmahala niw kedì. Igkesuat ku pa is kegkilelaa niw kedì kenà is kebpemuhat niw te menge pemuhat he edtutungen.

Amos 5:24

Piru ipeehè niw is hustu he kukuman ne veeli niw is metazeng; kenè niw heini engkezi iring te wahig he kenà ed-engked he edtudà.

Micas 6:9

Pemineǥa niw is migkaǥi te Nengazen diyà te inged he Jerusalem, su is edtahud kandin iyan duen din hustu he ketau: “Sikiyu is menge sakup te tribu te Juda, tiǥum kew ziyà te inged he Jerusalem ne pemineg kew.

Zefanias 2:3

Ne sikiyu is kenà mepelavawen he menge etew kayi te nasyun, he edsunud te menge suǥù te Nengazen, dangep kew ziyà te kandin. Ipedayun niw is kebaal niw te metazeng wey is kenè niw kebpelavew. Su kela ke kenè kew mulà mekeizi zutun he andew te kebpeǥezama te Nengazen te pauk din.”

Zacarias 7:9

“Iyan heini migkaǥi ku ziyà te menge etew ku: ‘Iveǥey niw is metazeng he kukuman. Ipeehè niw is keupiya niw wey kebpekedhihizuwè niw.

Deuteronomio 27:10

Sunuza niw is Nengazen he Megbevayè niw ne tumana niw is menge suǥù din wey menge sulunuzen he ibeǥey ku keniyu ǥuntaan.”

Deuteronomio 30:15

“Pemineg kew! Guntaan he andew ibpepilì ku sikiyu kayi: untung etawa kemetayen, keuswagan etawa kezeetan.

Josue 24:14

“Umbe ǥuntaan, ezapa niw is Nengazen ne penilbi kew kandin te tinutuuwà. Engkezi niw en is menge ed-ezapen he ebpen-ezapen dengan te menge kepuun niw ziyà layun te Wahig he Eufrates wey ziyà te Ehipto, ne penilbi kew te Nengazen.

1 Samuel 12:23

“Emun mehitenged kediey, layun ku sikiyu ibpengemuyù diyà te Nengazen, su emun kenè ku heini ebeelan ne ebpekesalà a ziyà te Nengazen. Ne ebpenuruen ku sikiyu te kebpengungubpaan he meupiya wey hustu.

1 Samuel 15:22

Midtavak si Samuel te, “Igkelipey ves te Nengazen is kebpemuhat niw kenà is kebpezumazuma kandin? Meupiya is kebpezumazuma te Nengazen kenà is kebpemuhat. Meupiya pa is kebpemineg kandin kenà is kebpemuhat te menge melambeg ke kerehidu.