Micas 3:11 - Manobo Western Bukidnon OT

¹¹ Emun edhukum kew ebpeburan niw is ebeǥey te sipsip diyà te keniyu. Ne sikiyu is menge memumuhat, ebpenurù kew su ǥeina te ebeyazan kew. Ne sikiyu zaan is menge ebpeneuven, ebpenagnè kew tenged dà te selapì. Edsarig kew pa he edtevangan kew te Nengazen, su egkaǥi kew te, ‘Zuma zey is Nengazen. Umbe wazà mezaat he egkehitavù kenami.’

Micas 3:11 교차 참조

Erubasa 17:23

Is lalung he etew, edewaten din is idsipsip diyà te kandin su para kenà metuman is hustu he kukuman.

Isaias 1:23

Is menge pengulu nu ne mibpekidsukulà wey miduma te menge tekawen. Egkesuat dan he layun edsipsip, wey ebuyù sikandan te menge gasa. Wazè dan levani is ketenged dutun te menge ilu wey wazè dan pemineǥa is riklamu te valu he menge vahi.

Isaias 48:2

Egngeranan niw is keugelingen niw he meǥinged diyà te segradu he inged, ne egkaǥi kew te edsarig kew te Megbevayà te Israel, he iyan ngazan din is Nengazen he Mekeǥeǥehem.”

Isaias 5:23

Edlibriyen niw is ebpekesalà tenged te sipsip, piru wazè niw veǥayi te hustu he kukuman is wazà mekesalà.

Isaias 56:11

Iring sikandan te leǥezen he menge asu he kenà egkepezaan. Menge perevantey sikandan te Israel he wazè dan kedsavut. Is kada sevaha kandan mibpenigudu en mebaal te egkesuatan din te ebaal ne iyan dà edtinguhaan din is kandin dà he keupiyaanan.

Jeremias 23:17

Iyan heini layun egkeǥiyen dan diyà te menge etew he edsudì kedì wey ebpezumazuma te mesinupaken he ǥehinawa zan: ‘Egkehimu he utew meupiya is kebpekesavuk niw, migkaǥi is Nengazen. Wazà mezaat he egkehitavù keniyu.’

Jeremias 26:7

Is menge memumuhat, is menge ebpeneuven, wey is langun he menge etew nekezineg te migkaǥi ni Jeremias diyà te valey te Nengazen.

Jeremias 5:12

Wazè dan megkaǥi te tutuu mehitenged kedì. Migkaǥi sikandan te, ‘Kenè kiw ebmenuwen te Nengazen! Wazà kezeetan he ebpekeuma ziyà te kenitew; wazà tebek etawa vitil.

Jeremias 6:13

“Puun te kinemevevaan pehendiyà te kinetikangan is ked-etew zin, ne ebpenlimbung su para mekeselapì. Minsan is menge ebpeneuven wey is menge memumuhat ne ebpengilad daan.

Jeremias 7:4

Kenè kew pelimbung te menge etew he edtulung egkaǥi te kenè kiw egkemenu su kayi te kenitew is baley te Nengazen.

Jeremias 8:10

Umbe, ibeǥey ku ziyà te zuma he menge etew is menge esawa zan wey menge vevesukè dan. Su ǥeina te puun te kinemevevaan pehendiyà te kinetikangan is ked-etew zin, ne ebpenlimbung dan su para mekeselapì. Minsan is menge ebpeneuven wey is menge memumuhat edpenlimbung daan.

Ezekiel 22:12

Is duma mibpesuhul te kedhimatey te etew, is duma mibpeutang te utew zekelà is tuvù din, wey is duma midsepian tenged te kedlimbungi zin te zuma he etew. Nelipatan e zan en. Iyan a, is Nengazen he MEGBEVAYÀ, is migkaǥi kayi.

Ezekiel 22:27

Is menge upisyal zan iring te zumezaas he menge asu he ebpitaspitas te egkezawi zan. Edhimatey zan para zà mekeselapì sikandan.

Ezekiel 34:2

“Sikew is etew, kaǥi ka te ebpekesuǥat te menge perevantey te Israel. Keǥiyi nu sikandan he iyan a, is Nengazen he MEGBEVAYÀ migkaǥi te: Mekehizuhizu kew is menge perevantey te Israel. Keugelingen niw zà is ed-eturen niw! Kenè be is menge perevantey kinahanglan he ed-eturen din is menge kerehidu?

Hoseas 4:18

Emun ebpekepasad dan en he ed-inum, ebpenigudu en sikandan ebpekidhilavet. Is menge perezumala zan egkesuat he ebaal te mekeeled-eled he menge vaal.

Hoseas 4:8

Egkesuat kew he mekesalà is menge etew ku su wey kew mekekaan te pemuhat dan he para idlumpiyu.

Amos 5:14

Guntaan, beeli niw is meupiya ne kenà is mezaat su wey kew meuyag-uyag ne ebpekiduma keniyu is Nengazen he Megbevayà he Mekeǥeǥehem sumalà is egkeǥiyen niw he zuma niw sikandin.

Amos 9:10

ebpatey te tebek sikandan is langun. Iyan heini sikandan kes egkaǥi he wazè kun mezaat he egkehitavù kandan.”

Micas 3:5

“Iyan heini migkaǥi te Nengazen mehitenged te menge ebpeneuven he nenazin te menge etew zin, he nenaad dan te meupiya he kebpekesavuk diyà te menge mibpekaan kandan, ne mibpahayag dan te kezeetan te menge wazà mebpekaan kandan:

Micas 7:3

Nelayam sikandan te kebaal te mezaat. Is menge pengulu wey menge meghuhukum ne edawat te sipsip. Ne ebpezumdumahan dan dà is egkesuatan te menge nekilala wey gehemanen he menge etew. Nesevaha sikandan te kebulegkù te hustu he kukuman.

Zefanias 3:3

Is menge upisyal zan henduen be te edhiniǥer he erimaung. Is menge pengulu zan henduen be te zumezaas he asu, ne ebpen-ahà te egkezeesan din emun mezukilem, ne haazà ne ed-eminen din te edaas ne wazà egkesamà ke meselem.

Zefanias 3:4

Is menge ebpeneuven diyà te kandan ne menge teruen ne kenà egkeseriǥan. Midremerikan te menge memumuhat dan is baley te Nengazen wey midsupak dan is Kesuǥuan te Megbevayà.

Malakias 1:10

Migkaǥi is Nengazen he Mekeǥeǥehem, “Deyzey pezem ke zuen sevaha keniyu te menge memumuhat he edlekeb te menge pultahan te valey ku, su wey kew kenè ne meketetavun diyà te pemuhatà he para kediey te hapuy he wazè din pulus. Kenè ku edewaten is menge ibpemuhat niw, su wazè ku sikiyu ikelipey.

Malakias 2:9

Umbe, mibpengelinteuwan ku he sudia kew wey mepeel-elezi ziyà te etuvangan te langun he menge etew, su wazè niw sunuza is menge paaǥi ku, kekenà, ebpekelepew ziyà te kebpenurua niw te kesuǥuan he zuen niw ibpelavi.”

Numero 16:15

Ne utew nepauk si Moises ne ke sikandin diyà te Nengazen te, “Kenè nu zewata is menge pemuhat dan. Wazà a mekesalà diyà te minsan hentei kandan; wazà minsan sevaha he asnu he migkuwa ku ziyà te kandan.”

Numero 22:7

Umbe, migenat is menge perezumala ziyà te Moab wey Midian he uwiten dan is ibayad ki Baalam. Midtudtulan dan heini te migkaǥi ni Balak.

1 Samuel 8:3

Piru wazè dan sunuza is ulaula te amey zan. Edhuna ziyà te gehinawa zan is selapì, edawat dan te sipsip, wey edtuisen dan is hustu he kukuman.