Micas 2:10 - Manobo Western Bukidnon OT

¹⁰ Ne ǥuntaan awè kew kayi te Israel su heini he lugar kenè ne ebpekeveǥey keniyu te egkehimelayan, su midremerikan niw heini te menge salè niw. Egkezeetan heini he lugar ne kenè ne egkepulusan.

Micas 2:10 교차 참조

1 Hadì 9:7

ne ibpaawè ku sikiyu kayi te tanà he imbeǥey ku keniyu, ne ebeleǥazen ku heini is baley ku he iyan mibpilì ku he lugar he kayi a ebeǥayi te zengeg. Ne ed-un-undahan wey ed-engitan te langun he menge etew is Israel.

2 Hadì 15:29

Hein timpu te kedhadì ni Peka, midsurung ni Hadì Tiglat Piliser he hadì te Asiria is Israel, ne naaǥew zin is menge inged he Ion, Abel Bet Maaca, Janoa, Kedesh, wey Hazor. Naaǥew zin daan is Gilead, Galilea, wey tivuuk he tanà te Naftali. Ne mid-uwit din diyà te Asiria is menge meǥinged kayi su mibihag din.

2 Hadì 17:6

Ne hein ikesiyam he tuig te kedhadì ni Hoshea, mid-aǥew en duen te hadì diyà te Asiria is Samaria, ne miduma zin is menge tig-Israel ziyà te Asiria su mibihag din sikandan. Diyè din sikandan ibpeubpà te inged he Hala, diyà te menge lugar he uvey te Wahig he Habor he ziyà te Gozan, wey ziyà te menge inged te menge Midianhen.

2 Cronica 7:20

ne ibpaawè ku sikiyu kayi te tanà he imbeǥey ku keniyu, ne ebeleǥazen ku heini is baley ku he iyan mibpilì ku he lugar he kayi a ebeǥayi te zengeg. Ne ed-un-undahan wey ed-engitan te menge etew.

Salmo 106:38

he menge ed-ezapen te menge tig-Canaan. Ne tenged dutun te kebpenhimetayi zan te menge anak dan he wazè pa hanew, midremerikan dan is tanà he Canaan,

Salmo 95:11

Ne tenged te pauk ku, ne utew meheǥet is lalag ku he kenè dan ebpekeseled diyà te tanà he zutun ku pezem sikandan ibpehimeley.”

Jeremias 10:18

Su iyan heini migkaǥi te Nengazen: Pemineg kew! Ibpaawè ku sikiyu kayi he tanà. Edresayen ku sikiyu wey niw meǥezami is pauk ku.

Jeremias 3:2

“Tengtengi niw is demilag te menge vuvungan. Duen pe be lugar zutun he wazè niw meremeriki? Midremerikan niw is tanà pinaaǥi te ked-azap niw te zuma he menge ed-ezapen wey menge kelelalung niw. Iring kew te vahi he ebelegyà te zengeg din he ebpimpinuu ziyà te kilid te zalan is edtaǥad te maama. Iring kew zaan te tulisan he ed-ayan te egkeizen din.

Jeremias 9:19

Pemineǥa niw is kedlelendag diyà te Jerusalem. Egkaǥi is menge etew te, ‘Nezeetan kiw! Mekeeled-eled heini is nehitavù kenitew! Kinahanglan he ed-ewaan tew heini is tanè tew su mibpenregdas is menge valey tew!’ ”

Ezekiel 36:17

“Sikew is etew, hein ed-ubpè pa is menge Israilihanen diyà te tanè dan, midremerikan dan heini pinaaǥi te mezaat he menge vaal zan. Is baal zan iring keremerik te vahi he midlengesahan.

Ezekiel 36:19

Impeyapat ku sikandan diyà te zuma he menge nasyun. Mibeelan ku ziyà te kandan is ereg he ibales te menge vetasan dan wey menge ulaula zan.

Deuteronomio 12:9

emun ebpekeuma kew en duen te lugar he zutun kew ebpekehimeley. Heini he lugar ibeǥey keniyu te Nengazen he Megbevayè niw he ibpepengevilin din keniyu.

Deuteronomio 30:18

ne ebpetizeenan ku en sikiyu ǥuntaan he kenà duwazuwa he egkengezeetan kew. Kenè kew ebmantas duen te tanà he edselezan niw su ed-engkenen niw he ziyà layun te Jordan.

Deuteronomio 4:26

“Guntaan he andew ibpetistiǥu ku is langit wey tanà he emun ebaal kew te ledawan he ed-ezapen ne meǥaan kew zà egkahanew puun duen te tanà he ed-engkenen niw ziyà layun te Jordan. Mevavè dà he timpu is kebpekeubpè niw zutun ne egkepurung kew en egkezeeti.