Micas 1:16 - Manobo Western Bukidnon OT

¹⁶ Is pelanggè niw he menge anak, egkuwaan diyà te keniyu ne ed-uwiten diyà te zuma he lugar, umbe idlalew niw is menge anak niw ne ibpeehè niw heini pinaaǥi te kegkiskisi niw te ulu niw iring te ulu te vanug.”

Micas 1:16 교차 참조

2 Hadì 17:6

Ne hein ikesiyam he tuig te kedhadì ni Hoshea, mid-aǥew en duen te hadì diyà te Asiria is Samaria, ne miduma zin is menge tig-Israel ziyà te Asiria su mibihag din sikandan. Diyè din sikandan ibpeubpà te inged he Hala, diyà te menge lugar he uvey te Wahig he Habor he ziyà te Gozan, wey ziyà te menge inged te menge Midianhen.

Job 1:20

Ne hein nezineg haazà ni Job, midhitindeg sikandin ne mibindas din is bisti zin tenged te kegkeseeng din. Ne impekiskisan din is ulu zin ne midlangkeb sikandin diyà te tanà te ked-azap te Nengazen.

Isaias 15:2

Edtekezeg is menge tig-Dibon diyà te lavew he simbahan dan wey ziyà te menge simbahan dan diyà te metikang he menge lugar su edsineǥew zan dutun. Edsineǥawan te menge tig-Moab is Nebo wey Medeba. Is kada sevaha kandan mibpevangul wey mibpemarbas su ibpeehè dan is kedlalew zan.

Isaias 22:12

Dutun he andew mid-umew kew te Nengazen he MEGBEVAYÀ he Mekeǥeǥehem su ibperuǥur kew zin wey ibpesineǥew. Migkeǥiyan kew zin he ipetuusi niw is kedlalew niw pinaaǥi te kepevangul niw wey kebivisti niw te saku.

Jeremias 16:6

Ebpematey is minsan hentei kayi he tanà, sepian man etawa pubri, ne wazà ebpekeleveng kandan wey wazà edlalew tenged kandan. Wazè en ebpelian din is lawa zin etawa ebpevangul su ibpetuusan din is kedlalew zin tenged te minatey he zuma zin.

Jeremias 4:8

Umbe, bivisti kew te saku he tuus te kegkeseeng niw. Lelendag kew su utew kiw egkepeuki te Nengazen.

Jeremias 47:5

Is menge tig-Gaza ebpemevangul su ibpeehè dan is kedlalew zan, ne is menge tig-Ashkelon ebpereremek he egkengeseeng. Sikiyu is menge meǥinged diyà te menge suǥud, kenè bes egkeengked is kebpelii niw te lawa niw he tuus te kedlalew?

Jeremias 6:26

Sikiyu is menge emurè ku te inged, bivisti kew te saku wey telilid kew te avu he tuus te kedlalew niw. Purung kew seengseeng he iring te minatey is budtung he anak niw he maama. Su kenè en egkeuǥet edsurungen kiw en te kuntada tew.

Jeremias 7:29

He menge tig-Jerusalem, pekiskisi niw is menge ulu niw ne itimbag is menge vulvul niw he tuus te kegkeseeng niw. Lalew kew ziyà te menge zemilag he menge vuvungan, su inselikwey wey mibey-anan kew te Nengazen is lapis te menge kevuwazan niw he egkepeukan din.”

Penhulùhulù 2:19

Enew kew ke mezukilem ne buyù kew te tavang diyà te Nengazen. Ivuswang niw ziyà te kandin is langun he ziyà te gehinawa niw he iring te ebusbus kew te wahig. Ivayew niw is menge velad niw te kedhangyù para te untung te menge anak niw he egkengevidtawan diyà te menge zalan tenged te kegkevitil.

Amos 7:11

Su iyan heini migkaǥi zin: ‘Ebpatey si Jeroboam pinaaǥi te tebek, ne siguradu he ebihaǥen is menge tig-Israel pehendiyà te zuma he nasyun.’ ”

Amos 8:10

Edhimuwen ku he sineǥawan is kedlipey niw emun timpu te pista, ne edhimuwen ku he hulùhulù is menge kegkanta niw. Ebpevistiyan ku sikiyu te saku wey edsuǥuen ku he mebpevangul su wey niw ikepaahà is kedlalew niw, iring te menge ǥinikanan he edsineǥew tenged te kebpatey te vudtung he anak dan. Piru edhuna pa he mesakit is ketepusan kayi he menge silut.”

Deuteronomio 28:41

Ebpenganak kew piru kenà haazà edtinir ziyà te keniyu su ebihaǥen sikandan.