Megwewali 2:7 - Manobo Western Bukidnon OT

⁷ Nemasa a te menge uripen menge maama wey menge vahi, ne is duma ne ziyè en mengeetew te valey ku. Ne iyan a utew mahabet is menge uyaǥen te langun he nekeubpà diyà te Jerusalem.

Megwewali 2:7 교차 참조

Genesis 13:2

Utew en sepian si Abram su utew mezakel is menge ayam din wey mezakel is menge azen din he pelata wey vulawan.

Genesis 14:14

Ne hein nezineg ni Abram he nevihag is enaken din, midtiǥum din is 318 he sakup din he egkeseriǥan din. Heini sikandan, menge sakup din puun pa te ked-enaka kandan, ne miduma zin sikandan, ne midal-as dan sikan is heepat he hadì taman te inged he Dan.

Genesis 15:3

Ne impelaus pa ni Abram is egkeǥiyen din, ne ke sikandin te, “Geina te wazè nu himuwa he mevuwad a, iyan ebpekepengevilin te menge azen ku is suluǥuen ku zà.”

1 Hadì 4:23

sepulù he vaka he impelambù diyà te tudil, 20 he vaka he impelayud dà diyà te penebtavà, 100 he kerehidu etawa kambing, kenà ragkes is nekedseselekawà he klasi te menge selazeng, wey meupiya he klasi te menge tagbis wey menge manuk.

2 Hadì 3:4

Si Hadì Mesha he hadì te Moab, mid-uyag te menge kerehidu, ne geina te sakup te Israel is Moab, ebeǥey si Mesha ziyà te hadì te Israel te 100,000 he nati he menge kerehidu he meemahan, wey vulvul te 100,000 he meǥurang en he meemahan he menge kerehidu.

2 Cronica 26:10

Midtukud daan sikandin te menge turi ziyà te sibsivayan ne mibpekalut te mezakel he menge vudsi he punduwà te wahig su utew mezakel is menge ayam din diyà te menge mibuntud-buntud diyà te edsenlepan wey ziyà te menge suǥud. Mevasuk daan sikandin. Duen din menge sakup he ebantey zutun te menge vevesukè din wey menge pemuleey te paras diyà te menge vuvungan wey ziyà te egkeveluyan he menge suǥud.

Ezra 2:55

Mid-ulì daan puun te kegkevihag is menge kevuwazan te menge suluǥuen ni Solomon: He iyan is menge kevuwazan eni Sotai, Hasoferet, Peruda, Jaala, Darkon, Gidel, Shefatia, Hatil, Pokeret Hazebaim, wey Ami.

Ezra 2:58

Is kahabet te kevuwazan te menge suluǥuen diyà te valey te Nengazen ragkes is kahabet te menge suluǥuen ni Solomon ne 392.

Nehemias 7:57

Nemen-ulì daan puun te kegkevihaǥa kandan is menge kevuwazan te menge suluǥuen ni Solomon: Is menge kevuwazan ni Sotai, Soferet, Perida, Jaala, Darkon, Gidel, Shefatia, Hatil, Pokeret Hazebaim, wey ni Amon.

Job 1:3

Duen din 7,000 he menge kerehidu, 3,000 he menge kemilyu, 500 he paris he vaka, wey 500 he menge vehiyan he menge asnu. Ne zuen din daan mahabet he menge suluǥuen. Iyan sikandin pinekesepian te langun he menge etew ziyà te zapit te edsilaan te Israel.

Job 42:12

Umbe, midtuvazan te Nengazen is huziyan he vahin te ked-ubpà ni Job te lavew pa zuen te nehuna. Mibeǥayan din sikandin te 14,000 he menge kerehidu, 6,000 he menge kemilyu, 1,000 he paris te menge vaka, wey 1,000 he vehiyan he menge asnu.